ຕັ້ງໜ້າກະທຳບັນລຸຄາດໝາຍຄວບຄຸມການຕິດເຊື້ອHIV/AIDS

ວັນອັງຄານ ທີ 24 ພະຈິກ ຄ.ສ. 2015 | 17:47:54

ທ່ານ ຫວູດຶກດາມ ກ່າວຄຳເຫັນທີ່ກອງປະຊຸມ
ວິທະຍາສາດແຫ່ງຊາດກ່ຽວກັບ HIV / AIDS
(ພາບ: VanHai)

(vovworld) – “ ຕັ້ງໜ້າກະທຳບັນລຸຄາດໝາຍຄວບຄຸມການຕິດເຊື້ອ HIV / AIDS ” ນີ້ແມ່ນຄຳເນັ້ນໜັກຂອງທ່ານ ຫວູດຶກດາມ ຮອງນາຍົກລັດຖະມົນຕີ ຫວຽດນາມ ຢູ່ກອງປະຊຸມວິທະຍາສາດແຫ່ງຊາດກ່ຽວກັບ HIV / AIDS ໄດ້ດຳເນີນໃນຕອນເຊົ້າວັນທີ 24/11 ຢູ່ຮ່າໂນ້ຍ. ທ່ານ ຮອງນາຍົກລັດຖະມົນຕີ ຫວູດຶກດາມ ຕີລາຄາສູງກອງປະຊຸມແມ່ນການກະທຳທີ່ແທດຈິງໃນເດືອນດຳເນີນງານແຫ່ງຊາດຄວບຄຸມການຕິດເຊື້ອ HIV / AIDS ແລະ ປະກອບສ່ວນປະຕິບັດເປົ້າໝາຍ 90 – 90 – 90. ທ່ານ ຮອງນາຍົກລັດຖະມົນຕີ ຫວູດຶກດາມ ເນັ້ນໜັກວ່າ: ປີ 1994, ຫວຽດນາມ ແມ່ນໜຶ່ງໃນຈຳນວນກ່ວາ 40 ປະເທດເຂົ້າຮ່ວມກອງປະຊຸມສຸດຍອດທົ່ວໂລກທຳອິດກ່ຽວກັບ HIV / AIDS ແລະ ຫລັງຈາກນັ້ນ 20 ປີພາຍຫລັງ ຫວຽດນາມ ແມ່ນປະເທດທຳອິດຂອງພາກພື້ນ ອາຊີ - ປາຊີຟິກ ທີ່ຕອບສະໜອງການປະຕິບັດເປົ້າໝາຍ 90 – 90 – 90 ຂອງ ສປຊ. ທ່ານ ຮອງນາຍົກລັດຖະມົນຕີ ຫວູດຶກດາມ ໃຫ້ຮູ້ວ່າ:

“ເປົ້າໝາຍຄວບຄຸມການຕິດເຊື້ອ HIV / AIDS ເຊິ່ງ ສປຊ ໄດ້ວາງອອກ ບໍ່ແມ່ນງ່າຍດາຍ ແລະ ກໍ່ບໍ່ຫຍຸ້ງຍາກ. ພວກເຮົາບໍ່ຄວນຂາດຄວາມລະມັດລະວັງ ແຕ່ວ່າຕ້ອງມີຄວາມເຊື່ອໝັ້ນ ແລະ ຄວາມຫວັງຢ່າງສີ້ນເຊີງ ແລະ ຈົ່ງກະທຳ ເພື່ອຄວາມຫວັງນັ້ນໃຫ້ປະກົດຜົນເປັນຈິງ ດ້ວຍຄວາມຮັບຜິດຊອບ ແລະ ດ້ວຍຈິດໃຈຂອງຕົນ. ພວກເຮົາຈົ່ງມີການກະທຳ ບໍ່ພຽງແຕ່ດ້ວຍເປົ້າໝາຍ 90 - 90 - 90 ເທົ່ານັ້ນ ຫາກຍັງຕ້ອງແມ່ນ 100 - 100 – 100 ອີກດ້ວຍ. ບໍ່ຄວນລໍຖ້າຮອດປີ 2020 ຫາກຕ້ອງກະທຳນັບແຕ່ວັນນີ້”.