ຕະຫລາດຫວຽດນາມນຳມາເຊິ່ງກາລະໂອກາດທີ່ດີໃຫ້ວິສາຫະກິດອັງກິດ
(ທ່ານ ຮອງນາຍົກລັດຖະມົນຕີ ຫວູວັນນິງ ພົບປະກັບ ເຈົ້າຊາຍ Andrew)
(vovworld) – ວັນທີ 10/9, ຢູ່ລອນດອນ, ສະຖານທູດ ຫວຽດນາມ ປະຈຳ ລາຊະອານາຈັກ ອັງກິດ ແລະ ໄອແລນເໜືອ ຈັດຕັ້ງເວທີປາໄສເສດຖະກິດ ຫວຽດນາມ ດ້ວຍຫົວຂໍ້ “ຄູ່ຮ່ວມມືເພື່ອການພັດທະນາ: ກາລະໂອກາດຮ່ວມມືໃຫ້ວິສາຫະກິດ ຫວຽດນາມ - ອັງກິດ” ເພື່ອແນໃສ່ແບ່ງປັນຂໍ້ມູນຂ່າວສານ ແລະ ເພີ່ມທະວີການຮ່ວມມືລະຫວ່າງວິສາຫະກິດ 2 ປະເທດ.
ກ່າວຄຳເຫັນທີ່ເວທີປາໄສ, ທ່ານຮອງນາຍົກລັດຖະມົນຕີ ຫວູວັນນິງ ໃຫ້ຮູ້ວ່າ: ສະພາບການເສດຖະກິດມະຫາພາກຂອງ ຫວຽດນາມ ສືບຕໍ່ໄດ້ຮັບການຮັກສາເປັນປົກກະຕິ, ການເຕີບໂຕເສດຖະກິດນັບມື້ນັບສູງຂຶ້ນ, ໄພເງິນເຟີ້ໄດ້ຄວບຄຸມເປັນຢ່າງດີ, ຊີວິດການເປັນຢູ່ຂອງປະຊາຊົນນັບມື້ນັບໄດ້ຍົກສູງຂຶ້ນ. ທ່ານຮອງນາຍົກລັດຖະມົນຕີ ຫວູວັນນິງ ຢືນຢັນວ່າ: ລັດຖະບານ ຫວຽດນາມ ໃຫ້ຄຳໝັ້ນສັນຍາສ້າງທຸກເງື່ອນໄຂສະດວກ ເພື່ອໃຫ້ບັນດານັກລົງທຶນ ອັງກິດ ເພີ່ມທະວີການຮ່ວມມື, ລົງທຶນໝັ້ນຄົງຢູ່ ຫວຽດນາມ.
ສ່ວນເຈົ້າຊາຍ Andrew ຢືນຢັນວ່າ: ລາດຊະວົງ ອັງກິດ ຍາມໃດກໍສະໜັບສະໜູນລັດຖະບານ 2 ປະເທດເພີ່ມທະວີການຮ່ວມມືຢ່າງແໜ້ນແຟ້ນ, ໜູນຊ່ວຍໃຫ້ບັນດາວິສາຫະກິດ ເພື່ອການພັດທະນາເສດຖະກິດຂອງແຕ່ລະປະເທດ. ເຈົ້າຊາຍ Andrew ກໍຕີລາຄາສູງບັນດາຄວາມມານະພະຍາຍາມປະຕິຮູບຂອງ ຫວຽດນາມ ໃນປະຈຸບັນ ເພື່ອແນໃສ່ເປົ້າໝາຍພັດທະນາເສດຖະກິດ - ສັງຄົມ.
ແລະຕອນບ່າຍໃນວັນດຽວກັນ, ທ່ານຮອງນາຍົກລັດຖະມົນຕີ ຫວູວັນນິງ ມີການພົບປະກັບ ເຈົ້າຊາຍ Andrew ຢູ່ ວັງ Buckingham ເພື່ອແນໃສ່ແລກປ່ຽນທິດທາງເພີ່ມທະວີການພົວພັນຮ່ວມມືລະຫວ່າງ ຫວຽດນາມ ແລະ ລາຊະອານາຈັກ ອັງກິດ ໃນໄລຍະຈະມາເຖິງ.