(VOVWORLD) - ຕອນບ່າຍວັນທີ 10 ກໍລະກົດ, ທີ່ສຳນັກງານລັດຖະບານ, ທ່ານນາຍົກລັດຖະມົນຕີ ຫວຽດນາມ ຫງວຽນຊວັນຟຸກ ໄດ້ເປັນປະທານການເຮັດວຽກກັບຄະນະຊີ້ນຳແຫ່ງຊາດກ່ຽວກັບການປ້ອງກັນ, ສະກັດກັ້ນໂລກລະບາດໂຄວິດ-19.
 ທີ່ການເຮັດວຽກ (ພາບ: TTXVN) |
ກ່າວຄຳເຫັນທີ່ການເຮັດວຽກ, ທ່ານນາຍົກລັດຖະມົນຕີ ຫງວຽນຊວັນຟຸກ ຊີ້ແຈ້ງວ່າ: ປະຈຸບັນ ຄວາມຕ້ອງການຂອງນັກຊ່ຽວຊານ, ແຮງງານທີ່ມີສີມືເຕັກນິກສູງ, ນັກລົງທຶນຕ່າງປະເທດຢາກເຂົ້າມາ ຫວຽດນາມ ແມ່ນຫລາຍທີ່ສຸດ. ສະນັ້ນ, ຖ້າບໍ່ມີວິທີການແກ້ໄຂເປັນຢ່າງດີ ແລະ ວ່ອງໄວນັ້ນ ຈະສົ່ງຜົນສະທ້ອນຢ່າງໃຫຍ່ຫລວງຕໍ່ຄວາມຄືບໜ້າໃນການປະຕິບັດໂຄງການ, ການຈັດຕັ້ງດຳເນີນທຸລະກິດ, ການຟື້ນຟູເສດຖະກິດ. ທີສອງແມ່ນ, ຄວາມຕ້ອງການກັບມາປະເທດຂອງຊາວ ຫວຽດນາມ ທີ່ອາໄສຢູ່ຕ່າງປະເທດ, ເປັນຕົ້ນແມ່ນຜູ້ມີອາຍຸສູງ, ເດັກນ້ອຍ, ນັກສຶກສາ, ຊາວຜູ້ອອກແຮງງານ…ສະນັ້ນ ຕ້ອງສ້າງເງື່ອນໄຂສະດວກໃຫ້ແກ່ເຂົາເຈົ້າໄດ້ກັບມາປະເທດ ບົນເນື້ອໃນຈິດໃຈປ້ອງກັນ, ສະກັດກັ້ນໂລກລະບາດຢ່າງແໜ້ນແຟ້ນ, ເປີດເຜີຍ, ກະຈ່າງແຈ້ງ.
ທ່ານນາຍົກລັດຖະມົນຕີ ຫງວຽນຊວັນຟຸກ ກໍ່ສະເໜີໃຫ້ການນຳລັດຖະບານ, ບັນດາກະຊວງ, ຂະແໜງການ ຈົ່ງປຶກສາຫາລືບັນດາມາດຕະການ ປະຕິບັດເປົ້າໝາຍຄວບຄູ່: ປ້ອງກັນ, ສະກັດກັ້ນໂລກລະບາດ ບໍ່ອາດລະເຫຼີງ ແຕ່ເປີດປະຕູໃຫ້ແກ່ບັນດາເປົ້າໝາຍດັ່ງກ່າວ ເພື່ອພັດທະນາເສດຖະກິດ-ສັງຄົມ ຍ້ອນທັງ 2 ຝ່າຍລ້ວນແຕ່ມີຄວາມຕ້ອງການ. ພ້ອມກັນນັ້ນ, ຄວນໂຄສະນາຢ່າງເປີດເຜີຍ, ກະຈ່າງແຈ້ງ ເພື່ອໃຫ້ປະຊາຊົນທຸກຄົນຮັບຮູ້ແຜນນະໂຍບາຍຂອງລັດຖະບານ, ຄະນະຊີ້ນຳແຫ່ງຊາດ; ເພື່ອໃຫ້ທຸກຄົນມີຄວາມອຸ່ນອ່ຽນໃຈ.