ທ່ານປະທານປະເທດ ເຈືອງເຕີນຊາງ ໄດ້ເປັນສັກຂີພິຍານພິທີລົງນາມຂໍ້ກຳນົດສົມທົບວຽກ ງານລະຫວ່າງກະຊວງຕຳຫຼວດ ແລະ ຫ້ອງວ່າການປະທານປະເທດ
(ພາບ: truongtansang.net) (vovworld) - ຕອນບ່າຍວັນທີ 21/2, ຢູ່ຮ່າໂນ້ຍ, ທ່ານປະທານປະເທດຫວຽດນາມ ເຈືອງເຕີນຊາງ ໄດ້ມີການເຮັດວຽກກັບກະຊວງຕຳຫຼວດກ່ຽວກັບໂຄງການປະຕິບັດງານປີ 2012. ກ່າວຄຳເຫັນຢູ່ທີ່ນີ້, ທ່ານປະທານປະເທດ ເຈືອງເຕີນຊາງ ໄດ້ຍ້ອງຍໍຊົມເຊີຍບັນດາໝາກຜົນທີ່ກຳລັງຕຳຫຼວດປະຊາຊົນບັນລຸໄດ້ໃນປີ 2011, ໃນນັ້ນກະຊວງຕຳຫຼວດໄດ້ຊີ້ນຳຢ່າງໃກ້ຊິດບັນດາໜ້າທີ່ວຽກງານຈຸດສຸມທີ່ໄດ້ວາງອອກ, ພິເສດແມ່ນປົກປັກຮັກສາຄວາມປອດໄພບັນດາເຫດການດ້ານການເມືອງຂອງປະເທດຊາດ, ພິເສດແມ່ນກອງປະຊຸມໃຫຍ່ທ່ົວປະເທດຄັ້ງທີ 11 ຂອງພັກກອມມູນິດຫວຽດນາມ, ການເລືອກຕັ້ງສະມາຊິກສາພະແຫ່ງຊາດຊຸດທີ 13, ການເລືອກຕັ້ງສະມາຊິກສະພາປະຊາຊົນຂັ້ນຕ່າງໆ ແລະ ກອງປະຊຸມສາກົນທີ່ສຳຄັນຖືກດຳເນີນຢູ່ຮ່າໂນ້ຍ.
ທ່ານປະທານປະເທດ ເຈືອງເຕີນຊາງ ເນັ້ນໜັກວ່າ ກະຊວງຕຳຫຼວດຍາມໃດກໍຄວນເປັນເຈົ້າການໃນການປະຕິບັດໜ້າທີ່, ພິເສດແມ່ນບັນດາໜ້າທີ່ປົກປັກຮັກສາສະຖຽນລະພາບທາງດ້ານການເມືອງ, ສັງຄົມ. ກະຊວງຕຳຫຼວດບໍ່ໄດ້ເລີ່ນເລີ້, ຂາດສະຕິລະວັງຕົວ, ຕ້ອງນຳໜ້າ, ເດັດດຽວຕໍ່ສູ້, ຮັກສາຄວາມສະຫງົບປອດໄພແຫ່ງຊາດ, ຮັກສາຄວາມເປັນລະບຽບຮຽບຮ້ອຍທາງສັງຄົມໃນທຸກສະຖານະການ, ຮັບປະກັນຮັກສາສະຖຽນລະພາບເພື່ອໃຫ້ປະເທດພັດທະນາ.
ສິ້ນສຸດການເຮັດວຽກ, ທ່ານປະທານປະເທດ ເຈືອງເຕີນຊາງ ແລະ ບັນດາຜູ້ແທນໄດ້ເປັນສັກຂີພິຍານພິທີລົງນາມຂໍ້ກຳນົດສົມທົບວຽກງານລະຫວ່າງກະຊວງຕຳຫຼວດ ແລະ ຫ້ອງວ່າການປະທານປະເທດ.