ທ່ານປະທານສະພາແຫ່ງຊາດ ຫວຽດນາມ ເວືອງດິ່ງເຫ້ວ ສິ້ນສຸດການຢ້ຽມຢາມ ສປປ ລາວ ຢ່າງເປັນທາງການ
(VOVWORLD) -ຕອນຄ່ຳວັນທີ 17 ພຶດສະພາ, ທ່ານປະທານສະພາແຫ່ງຊາດຫວຽດນາມ ເວືອງດິ່ງເຫ້ວ ໄດ້ກັບມາເຖິງສະໜາມບິນ ໂນ້ຍບາຍ (ຮ່າໂນ້ຍ), ສິ້ນສຸດການຢ້ຽມຢາມ ສາທາລະນະລັດ ປະຊາທິປະໄຕ ປະຊາຊົນລາວ ຢ່າງເປັນທາງການ ຕາມຄຳເຊີນຂອງທ່ານປະທານສະພາແຫ່ງຊາດລາວ ໄຊສົມພອນ ພົມວິຫານ ແຕ່ວັນທີ 15-17 ພຶດສະພາ.
 ທ່ານປະທານສະພາ ຫວຽດນາມ ເວືອງດິ່ງເຫ້ວ ແລະ ທ່ານປະທານສະພາແຫ່ງຊາດ ລາວ ໄຊສົມພອນ ພົມວິຫານ (ພາບ: TTXVN) |
ໂດຍຕາງໜ້າໃຫ້ຄະນະຜູ້ແທນຂັ້ນສູງສະພາແຫ່ງຊາດ ສາທາລະນະລັດ ສັງຄົມນິຍົມ ຫວຽດນາມ, ທ່ານປະທານສະພາແຫ່ງຊາດ ເວືອງດິ່ງເຫ້ວ ໄດ້ສະແດງຄວາມຂອບໃຈຕໍ່ການຕ້ອນຮັບຢ່າງສົມກຽດ, ຖີ່ຖວ້ນ ຂອງການນຳພັກ ແລະ ລັດລາວ… ທ່ານປະທານສະພາ ເວືອງດິ່ງເຫ້ວ ຕີລາຄາສູງທີ່ສຸດຕໍ່ໝາກຜົນການຢ້ຽມຢາມ, ສອງຝ່າຍໄດ້ແລກປ່ຽນຢ່າງກົງໄປກົງມາ, ຈິງໃຈ, ເປີດອົກເປີດໃຈ ແລະ ໄວ້ເນື້ອເຊື່ອໃຈເພື່ອປະກອບສ່ວນເພີ່ມທະວີການພົວພັນມິດຕະພາບຍິ່ງໃຫ່ຍ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນ ຫວຽດນາມ - ລາວ, ລາວ - ຫວຽດນາມ ເວົ້າລວມ. ເວົ້າສະເພາະແມ່ນການພົວພັນລະຫວ່າງສະພາແຫ່ງຊາດຂອງສອງປະເທດນັບມື້ນັບພັດທະນາ.
ທ່ານປະທານສະພາແຫ່ງຊາດ ເວືອງດິ່ງເຫ້ວ ເຊື່ອໝັ້ນວ່າ ໃນໄລຍະຈະມາເຖິງ, ສະພາແຫ່ງຊາດ 2 ປະເທດຈະສືບຕໍ່ສົມທົບກັນຢ່າງແໜ້ນແຟ້ນ, ປະຕິບັດ ຂໍ້ຕົກລົງຮ່ວມມືລະຫວ່າງສະພາແຫ່ງຊາດສອງປະເທດ ຫາກໍ່ໄດ້ລົງນາມຢ່າງມີປະສິດທິຜົນ, ປະກອບສ່ວນແທດຈິງ ເຂົ້າໃນການປັງປຸງ ແລະ ພັດທະນາສາຍພົວພັນແບບພິເສດ ຫວຽດນາມ-ລາວ ຢ່າງບໍ່ຢຸດເຊົາ.