ທ່ານປະທານາທິບໍດີ ອາເມລິກາ - ອີຣັກ ເຫັນດີເປັນເອກະພາບຮັກສາການພົວພັນ “ຄູ່ຮ່ວມມືທາງດ້ານຄວາມໝັ້ນຄົງ”
(VOVWORLD) -ວັນທີ 22 ມັງກອນ, ທໍານຽບຂາວ ໃຫ້ຮູ້ວ່າ ທ່ານປະທານາທິບໍດີ ອາເມລິກາ Donald Trump ແລະ ຄູ່ຕໍາແໜ່ງ ອີຣັກ Barham Saleh ໄດ້ເຫັນດີກ່ຽວກັບຄວາມຈໍາເປັນຂອງເລື່ອງ ກອງທັບ ອາເມລິກາ ສືບຕໍ່ສວມບົດບາດຂອງຕົນຢູ່ Baghdad.
 ທ່ານປະທານາທິບໍດີ ອາເມລິກາ Donald Trump ແລະ ຄູ່ຕໍາແໜ່ງ ອີຣັກ Barham Saleh (ພາບ: AP) |
ຢູ່ Davos, ປະເທດ ສະວິດ, ປະທານາທິບໍດີ ສອງປະເທດ ໄດ້ມີການພົບປະຄັ້ງທໍາອິດ ນັບແຕ່ເມື່ອ ອາເມລິກາ ເຂັ່ນຂ້າ ທ່ານພົນຈັດຕະວາ Qasem Soleimani, ຜູ້ບັນຊາການກົມກອງ Quds ຂຶ້ນກັບກໍາລັງພິທັກຮັກສາປະຕິວັດ ອິດສະລາມ ອີຣານ ຢູ່ Baghdad ໃນວັນທີ 3 ມັງກອນ ຜ່ານມາ, ເຊິ່ງເປັນສາເຫດເຮັດໃຫ້ ສະພາແຫ່ງຊາດ ອີຣັກ ຮຽກຮ້ອງໃຫ້ເນລະເທດນາຍທະຫານ ອາເມລິກາ.
ໃນແຈ້ງການຂອງທໍານຽບຂາວໄດ້ຊີ້ແຈ້ງວ່າ: “ການນໍາສອງປະເທດ ໄດ້ເຫັນດີເປັນເອກະພາບກ່ຽວກັບຄວາມສໍາຄັນຂອງເລື່ອງສືບຕໍ່ຮັກສາການພົວພັນຄູ່ຮ່ວມມືຄວາມໝັ້ນຄົງ ແລະ ເສດຖະກິດ ລະຫວ່າງ ອາເມລິກາ - ອີຣັກ, ໃນນັ້ນ ມີບັ້ນຮົບຕ້ານຄືນອົງການກໍ່ການຮ້າຍ IS... ທ່ານປະທານາທິບໍດີ ອາເມລິກາ Donald Trump ກໍໄດ້ຢັ້ງຢືນຄືນໃໝ່ຄໍາໝັ້ນສັນຍາອັນໝັ້ນແກ່ນຂອງ ອາເມລິກາ ສໍາລັບອະທິປະໄຕ, ສະຖຽນລະພາບ ແລະ ຄວາມວັດທະນາຖາວອນຂອງ ອີຣານ”.