ທ່ານປະທານາທິບໍດີ ອາເມເນຍ Serzh Asrgsyan ຢ້ຽມຢາມຫວຽດນາມ ຢ່າງເປັນທາງການ

ວັນສຸກ ທີ 8 ມິຖຸນາ ຄ.ສ. 2012 | 20:39:54

ທ່ານປະທານປະເທດຫວຽດນາມ Truong Tan Sang
ຕ້ອນຮັບທ່ານປະທານາທິບໍດີ ອາເມເນຍ
( ພາບ: chinhphu.vn )

( vovworld ) - ໂດຍຕອບສະໜອງຕາມຄຳເຊື້ອເຊີນຂອງທ່ານປະທານປະເທດຫວຽດນາມ Truong Tan Sang, ວັນທີ 8/6, ທ່ານປະທານາທິບໍດີ ອາເມເນຍ Serzh Sargsyan ຢ້ຽມຢາມຫວຽດນາມ ຢ່າງເປັນທາງການ. ພິທີຕ້ອນຮັບທ່ານປະທານາທິບໍດີ ອາເມເນຍ Serzh Sargsyan ໄດ້ຈັດຂຶ້ນຢ່າງສົມກຽດໃນຕອນເຊົ້າວັນທີ 8/6, ຢູ່ທີ່ຮ່າໂນ້ຍ. ທີ່ການເຈລະຈາພາຍຫຼັງພິທີຕ້ອນຮັບ, ທ່ານປະທານປະເທດຫວຽດນາມ Truong Tan Sang ແລະ ທ່ານປະທານາທິບໍດີ Serzh Sargsyan ໄດ້ເຫັນດີຍູ້ແຮງການຮ່ວມມືລະຫວ່າງບັນດາກະຊວງ, ຂະແໜງການ, ທ້ອງຖິ່ນຕ່າງໆຂອງສອງປະເທດ ແລະ ເປັນເອກະສັນນຳກັນບັນດາທິດທາງ, ມາດຕະການ ເພື່ອແນໃສ່ຊຸກຍູ້ການຮ່ວມມືລະຫວ່າງສອງປະເທດ, ໂດຍສະເພາະແມ່ນໃນຂົງເຂດເສດຖະກິດ, ການຄ້າ, ການລົງທຶນຄື ຄວນ ລົງນາມໃນບັນດາສັນຍາ, ສ້າງພື້ນຖານນິຕິກຳໃຫ້ແກ່ການຮ່ວມມືສອງຝ່າຍ, ສ້າງຕັ້ງກົນໄກຄະນະກຳມາທິການລະຫວ່າງລັດຖະບານກ່ຽວກັບການຮ່ວມມືດ້ານເສດຖະກິດ, ການຄ້າ ແລະ ວິທະຍາສາດ, ເຕັກໂນໂລຊີ... ໂດຍໄວ. ທ່ານປະທານປະເທດ Truong Tan Sang ແລະ ທ່ານປະທານາທິບໍດີ Serzh Sargsyan ໄດ້ອະນຸມັດຜ່ານຖະແຫຼງການຮ່ວມກ່ຽວກັບໝາກຜົນແຫ່ງການຢ້ຽມຢາມຫວຽດນາມ ຢ່າງເປັນທາງການ. ການນຳສອງທ່ານ ໄດ້ເປັນສັກຂີພິຍານພິທີລົງນາມເອກະສານຮ່ວມມືຕ່າງໆໃນຂົງເຂດເສດຖະກິດ ການຄ້າ ແລະ ວິທະຍາສາດ ເຕັກໂນໂລຊີ, ຍົກເລີກວີຊາໃຫ້ໜັງສືຜ່ານແດນທາງການທູດ ແລະ ທາງລັດຖະບານ, ການຮ່ວມມືລະຫວ່າງສອງກະຊວງການຕ່າງປະເທດ.

ກ່າວຄຳເຫັນໃນການພົບປະກັບວົງການນັກຂ່າວພາຍຫຼັງການເຈລະຈາ, ທ່ານປະທານາທິບໍດີອາເມເນຍ Serzh Sargsyan ໄດ້ເວົ້າວ່າ.

“ ໃນປີ 2012 ນີ້, ສອງປະເທດໄດ້ສະເຫຼີມສະຫຼອງ 20 ປີແຫ່ງວັນສ້າງຕັ້ງສາຍພົວພັນດ້ານການທູດ. ຂ້າພະເຈົ້າ ແລະ ທ່ານປະທານປະເທດຫວຽດນາມ ລ້ວນແຕ່ຖືວ່າ ນີ້ແມ່ນພື້ນຖານໝັ້ນແກ່ນເພື່ອຊຸກຍູ້ການພົວພັນລະຫວ່າງສອງປະເທດ ທັງຂົງເຂດການເມືອງ, ເສດຖະກິດ, ວັດທະນະທຳ. ເພາະສະນັ້ນ ພວກຂ້າພະເຈົ້າໄດ້ເຫັນດີຕ້ອງສ້າງກົນໄກຄະນະກຳມາທີການລະຫວ່າງລັດຖະບານໂດຍໄວ. ໃນຊຸມເດືອນທີ່ຈະມາເຖິງ, ພວກຂ້າພະເຈົ້າຈະລົງນາມໃນບັນດາເອກະສານຮ່ວມມືໃນຂົງເຂດວັດທະນະທຳມະນຸດ, ວິທະຍາສາດ, ເຕັກໂນໂລຊີ. ອາເມເນຍ ຈະພິຈາລະນາສ້າງອົງການຕາງໜ້າທາງການທູດຂອງຕົນຢູ່ຮ່າໂນ້ຍ ແລະ ພວກຂ້າພະເຈົ້າປາດຖະໜາວ່າ ຫວຽດນາມຈະສ້າງອົງການຕາງໜ້າທາງການທູດຢູ່ອາເມເນຍ ”.

ທ່ານປະທານາທິບໍດີ ອາເມເນຍ Serzh Asrgsyan ຢ້ຽມຢາມຫວຽດນາມ ຢ່າງເປັນທາງການ - ảnh 2

ທ່ານນາຍົກລັດຖະມົນຕີ ຫວຽດນາມ Nguyen Tan Dung
ພົບປະເຈລະຈາກັບທ່ານປະທານາທິບໍດີ Serzh Sargsyan
( ພາບ: .chinhphu.vn )

ແລະກໍໃນຕອນບ່າຍວັນດຽວກັນ, ຢູ່ສຳນັກງານລັດຖະບານ, ທ່ານນາຍົກລັດຖະມົນຕີ ຫວຽດນາມ Nguyen Tan Dung ໄດ້ພົບປະເຈລະຈາກັບທ່ານປະທານາທິບໍດີ Serzh Sargsyan. ທ່ານນາຍົກລັດຖະມົນຕີ Nguyen Tan Dung ຊີ້ແຈ້ງວ່າ ລັດຖະບານຫວຽດນາມ ຈະຜັນຂະຫຍາຍບັນດາຂໍ້ຕົກລົງທີ່ບັນລຸໄດ້ໃນການຢ້ຽມຢາມຄັ້ງນີ້ຢ່າງຕັ້ງໜ້າ ເພື່ອນຳການພົວພັນທັດທະນາໃນໄລຍະທີ່ຈະມາເຖິງຢ່າງແຮງກວ່າອີກ. ສອງຝ່າຍຈະສ້າງຕັ້ງບັນດາກົນໄກຮ່ວມມືສອງຝ່າຍຢ່າງເໝາະສົມ ເພື່ອແນໃສ່ຜັນຂະຫຍາຍຢ່າງມີປະສິດທິຜົນໃນຂົງເຂດເສດຖະກິດ, ການຄ້າ, ວິທະຍາສາດເຕັກນິກ… ທ່ານນາຍົກລັດຖະມົນຕີ Nguyen Tan Dung ປາດຖະໜາວ່າ ສອງປະເທດມີການຮ່ວມມືຢ່າງແໜ້ນແຟ້ນ, ສະໜັບສະໜູນເຊິ່ງກັນ ແລະ ກັນໃນບັນດາເວທີປາໄສສາກົນ ພິເສດແມ່ນສະຫະປະຊາຊາດ.

ທ່ານປະທານາທິບໍດີອາເມເນຍ Serzh Sargsyan ກໍຢືນຢັນວ່າ ຍາມໃດ ອາເມເນຍ ກໍຖືການພົວພັນຮ່ວມມືກັບຫວຽດນາມເປັນສຳຄັນ, ພິເສດປາດຖະໜາຢາກຊຸກຍູ້ບັນດາການເຄື່ອນໄຫວຮ່ວມມືເສດຖະກິດ, ການຄ້າ ແລະ ການລົງທຶນລະຫວ່າງສອງປະເທດກວ່າອີກ; ສະເໜີສອງຝ່າຍສ້າງຕັ້ງຄະນະກຳມາທິການລະຫວ່າງລັດຖະບານ, ຍູ້ແຮງການເຄື່ອນໄຫວແລກປ່ຽນຂໍ້ມູນຂ່າວ, ສ້າງເງື່ອນໄຂສະດວກໃຫ້ແກ່ບັນດາວິສາຫະກິດສອງປະເທດເພີ່ມທະວີການຮ່ວມມືລົງທຶນ.

ໃນຕອນບ່າຍຂອງວັນດຽວກັນ, ທ່ານປະທານສະພາແຫ່ງຊາດຫວຽດນາມ Nguyen Sinh Hung ກໍໄດ້ໃຫ້ການຕ້ອນຮັບທ່ານປະທານາທິບໍດີ ອາເມເນຍ Serzh Sargsyan . ທ່ານປະທານສະພາແຫ່ງຊາດຫວຽດນາມ Nguyen Sinh Hung ຖືວ່າການຢ້ຽມຢາມຂອງທ່ານປະທານາທິບໍດີ ອາເມເນຍ Serzh Sargsyan ຄັ້ງນີ້ແມ່ນເຫດການທີ່ມີຄວາມໝາຍສຳຄັນຍິ່ງ ຂະນະທີ່ໃນປີນີ້ 2 ປະເທດຈັດຕັ້ງສະເຫຼີມສະຫຼອງ 20 ປີ ແຫ່ງວັນສ້າງຕັ້ງການພົວພັນທາງການທູດ, ອັນຈະສ້າງກຳລັງຊຸກຍູ້ໃໝ່ແກ່ການພົວພັນ 2 ຝ່າຍໃນໄລຍະທີ່ຈະເຖິງ. ທ່ານປະທານສະພາແຫ່ງຊາດຫວຽດນາມ Nguyen Sinh Hung ຖືວ່າ ສະພາແຫ່ງຊາດຂອງ 2 ປະເທດຄວນເພີ່ມທະວີການແລກປ່ຽນຄະນະຜູ້ແທນຂັ້ນສູງ, ແລກປ່ຽນຂໍ້ມູນຂ່າວສານ, ບົດຮຽນທາງດ້ານນິຕິບັນຍັດ ພ້ອມທັງສົມທົບກັນຢູ່ເວທີປາໄສລັດຖະສະພາຫຼາຍຝ່າຍ, ອົງການຈັດຕັ້ງສາກົນ. ສະພາແຫ່ງຊາດຂອງ 2 ປະເທດ ຄວນສົມທົບກັນໃນການກະຕຸກຊຸກຍູ້ລັດຖະບານ, ບັນດາກະຊວງ, ຂະແໜງການ ແລະ ທ້ອງຖິ່ນຕ່າງໆຂອງ 2 ປະເທດປະຕິບັດສັນຍາທີ່ໄດ້ລົງນາມ.

ສ່ວນທ່ານປະທານາທິບໍດີ ອາເມເນຍ Serzh Sargsyanຢືນຢັນວ່າ ການພົວພັນຮ່ວມມືລະຫວ່າງ 2 ສະພາແຫ່ງຊາດແມ່ນມີຄວາມສຳຄັນພິເສດເພື່ອເພີ່ມທະວີການພົວພັນດ້ານການທູດລະຫວ່າງ 2 ປະເທດ. ທ່ານສະເໜີໃຫ້ສ້າງຕັ້ງກຸ່ມມິດຕະພາບ ສ.ສ.ຊ ລະຫວ່າງ 2 ປະເທດ ເພື່ອເປັນແກ່ນສານແກ່ການຊຸກຍູ້ການພົວພັນລະຫວ່າງ 2 ຝ່າຍ.

ແລະກໍໃນຕອນບ່າຍວັນດຽວກັນຢູ່ສຳນັກງານສູນກາງພັກ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ Nguyen Phu Trong ໄດ້ໃຫ້ການຕ້ອນຮັບທ່ານປະທານາທິບໍດີ Serzh Sargsyan ຢ່າງສະໜິດສະໜົມ.