ທ່ານຮອງນາຍົກລັດຖະມົນຕີ ຟ້າມບິນມິນ ຕ້ອນຮັບທ່ານ Stephen Groff ຮອງປະທານທະນາຄານພັດທະນາອາຊີ (ພາບ:TTXVN)

        ຕອນບ່າຍວັນທີ 8 ພະຈິກ, ຢູ່ສໍານັກງານລັດຖະບານ, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຟ້າມບິນມິນ ໄດ້ໃຫ້ການຕ້ອນຮັບທ່ານ Stephen Groff ຮອງປະທານທະນາຄານພັດທະນາອາຊີ (ADB) ເຊິ່ງພວມມີການຢ້ຽມຢາມຫວຽດນາມ ແລະ ເຂົ້າຮ່ວມເວທີປາໄສຮັບມືກັບການປ່ຽນແປງຂອງດິນຟ້າອາກາດ, ຮັບປະກັນການພັດທະນາແບບຍືນຍົງ. ທີ່ການຕ້ອນຮັບ, ທ່ານຟ້າມບິນມິນ ຢັ້ງຢືນວ່າ ຫວຽດນາມ ຍາມໃດກໍຖືເປັນສໍາຄັນການພົວພັນກັບທະນາຄານ ADB, ເຊິ່ງເປັນໜຶ່ງໃນບັນດາຜູ້ອຸປະຖໍາແຖວໜ້າ ໃນການສະໜອງແຫຼ່ງທຶນ, ໜູນຊ່ວຍເຕັກນິກ ແລະ ໃຫ້ຄໍາປຶກສາແກ່ຫວຽດນາມ. ໄລ່ມາຮອດປັດຈຸບັນ, ທະນາຄານ ADB ໄດ້ອຸປະຖໍາໃຫ້ຫວຽດນາມຫຼາຍກວ່າ  165 ລາຍການ ແລະ ໂຄງການ ລວມມູນຄ່າກວ່າ  16 ຕື້ USD. ທ່ານຟ້າມບິນມິນ ເນັ້ນໜັກວ່າແຫຼ່ງທຶນຂອງ ທະນາຄານ ADB ໄດ້ນໍາໃຊ້ຢ່າງມີປະສິດທິຜົນ, ໂດຍໄດ້ສຸມໃສ່ບັນດາຂົງເຂດບຸລິມະສິດຂອງລັດຖະບານຫວຽດນາມ ຄື ພັດທະນາພື້ນຖານໂຄງລ່າງ, ຮັບມືກັບການປ່ຽນແປງຂອງດິນຟ້າອາກາດ, ພະລັງງານຜະລິດຄືນໃໝ່...; ພ້ອມທັງປາດຖະໜາວ່າ ທະນາຄານ ADB ຈະສືບຕໍ່ໜູນຊ່ວຍຫວຽດນາມໄດ້ສໍາຜັດກັບບັນດາແຫຼ່ງທຶນບຸລິມະສິດໃນໄລຍະຈະມາເຖິງ.

        ສ່ວນທ່ານ Stephen Groff ຢັ້ງຢືນວ່າ ທະນາຄານ ADB ຖືເປັນສໍາຄັນ ແລະ ຕີລາຄາສູງການພົວພັນຮ່ວມມືຢ່າງມີປະສິດທິຜົນ ແລະຍາວນານກັບຫວຽດນາມ; ໃຫ້ຄໍາໝັ້ນສັນຍາຈະໜູນຊ່ວຍຫວຽດນາມ ໃນການຊອກຫາບັນດາແຫຼ່ງທຶນບຸລິມະສິດ ເພື່ອແນໃສ່ຊ່ວຍ ຫວຽດນາມ ພັດທະນາແບບຍືນຍົງ.