ທ່ານເລຂາທິການໃຫຍ່ ຫງວຽນຝູຈ້ອງ ພົບປະ, ຢ້ຽມຢາມຖາມຂ່າວພໍ່ແມ່ປະຊາຊົນ ແຂວງ ຮຶງອຽນ (ພາບ: TTXVN)

ຕອນເຊົ້າວັນທີ 19 ທັນວາ, ຄະນະພັກແຂວງ, ສະພາປະຊາຊົນ, ຄະນະກຳມະການປະຊາຊົນ, ຄະນະກຳມະການແນວໂຮມປະເທດຊາດ ຫວຽດນາມ ແຂວງ ຮຶງອຽນ ໄດ້ຈັດຕັ້ງພິທີສະເຫຼີມສະຫຼອງ 190 ປີ ແຫ່ງວັນສ້າງຕັ້ງແຂວງ (1831 – 2021), 80 ປີແຫ່ງວັນສ້າງຕັ້ງອົງຄະນະພັກແຂວງ (1941 – 2021), 25 ປີແຫ່ງວັນສ້າງຕັ້ງແຂວງ ຮຶງອຽນ ຄືນໃໝ່ (ວັນທີ 1/1/1997 – 1/1/2022) ແລະ ຮັບຫຼຽນໄຊແຮງງານຊັ້ນໜຶ່ງ ຕາມຮູບການທາງໄກ ໂດຍໄດ້ເຊື່ອມຕໍ່ກັບ 10 ເມືອງ, ເທດສະບານ ແລະ ນະຄອນ.

        ເຂົ້າຮ່ວມ ແລະ ກ່າວຄຳເຫັນທີ່ພິທີ, ທ່ານເລຂາທິການໃຫຍ່ ພັກກອມມູນິດ ຫວຽດນາມ ທ່ານ ຫງວຽນຝູຈ້ອງ ເນັ້ນໜັກວ່າ ຮຶງອຽນ ແມ່ນແຂວງທີ່ມີກຳລັງບົ່ມຊ້ອນ ແລະ ທ່າໄດ້ປຽບຫຼາຍຢ່າງເພື່ອພັດທະນາຢ່າງວ່ອງໄວ ແລະ ຍືນຍົງ. ທ່ານເລຂາທິການໃຫຍ່ ຫງວຽນຝູຈ້ອງ ສະເໜີໃຫ້ແຂວງ ຕ້ອງເອົາໃຈໃສ່ເປັນພິເສດເຖິງໜ້າທີ່ປົກປັກຮັກສາ ແລະ ພັດທະນາພື້ນຖານວັດທະນະທຳທີ່ກ້າວໜ້າ, ເຂັ້ມຂຸ້ນໄປດ້ວຍສີສັນຊາດ, ເສີມຂະຫຍາຍຄຸນຄ່າປະຫວັດສາດວັດທະນະທຳທີ່ເປັນເອກະລັກສະເພາະຂອງຕົນ, ເລີ່ມຕົ້ນແມ່ນປຸກລະດົມຂະບວນການກໍ່ສ້າງຄອບຄົວວັດທະນະທຳ ຫວຽດນາມ. ທາງແຂວງຕ້ອງສືບຕໍ່ປະຕິບັດບັນດານະໂຍບາຍຊ່ວຍໜູນສັງຄົມ, ບັນດາມາດຕະການຫຼຸດຜ່ອນຄວາມທຸກຍາກແບບຍືນຍົງ ແລະ ຮັບປະກັນຄວາມຍຸຕິທຳໃນສັງຄົມໃຫ້ເປັນຢ່າງດີ; ເບິ່ງແຍງດູແລຊີວິດທາງດ້ານວັດຖຸ ແລະ ຈິດໃຈໃຫ້ແກ່ປະຊາຊົນ; ເອົາໃຈໃສ່ເຖິງການພັດທະນາຢ່າງຮອບດ້ານ, ຍົກສູງຄຸນນະພາບການສຶກສາ - ບຳລຸງສ້າງ, ວິທະຍາສາດ - ເຕັກໂນໂລຢີ.