ທ່ານ ຫງວຽນຊວັນຟຸກ ສາບານຕົວເຂົ້າຮັບຕຳແໜ່ງເປັນປະທານປະເທດ ຫວຽດນາມ (ພາບ: VGP)

ພາຍຫຼັງພິທີສາບານຕົວເຂົ້າຮັບດຳລົງຕຳແໜ່ງ, ທ່ານປະທານປະເທດ ຫງວຽນຊວັນຟຸກ ຢັ້ງຢືນວ່າ ບົດຮຽນ, ປະສົບການຂອງບັນດາການນຳຊຸດກ່ອນ ແມ່ນພື້ນຖານອັນລ້ຳຄ່າເພື່ອໃຫ້ທ່ານສືບທອດ ແລະ ສູ້ຊົນປະຕິບັດໜ້າທີ່ສຳຄັນຂອງຕົນໃນຖານະເປັນປະທານປະເທດໃຫ້ເປັນຢ່າງດີ. ທ່ານກ່າວວ່າ:

        “ຂ້າພະເຈົ້າຂໍໝັ້ນໝາຍຕໍ່ສະພາແຫ່ງຊາດ ແລະ ປະຊາຊົນທົ່ວປະເທດວ່າ ຈະສຸດຈິດສຸດໃຈ, ສຸມກຳລັງເຫື່ອແຮງຂອງຕົນ, ມີຄວາມຮັບຜິດຊອບ, ດຸໝັ່ນຂະຫຍັນພຽນ, ປະຢັດມັດທະຍັດ, ສັດຊື່ບໍລິສຸດ, ເຫັນແກ່ສ່ວນລວມ ບໍ່ເຫັນແກ່ສ່ວນຕົວ, ປະຕິບັດໜ້າທີ່ ແລະ ສິດອຳນາດຂອງປະທານປະເທດຢ່າງຄົບຖ້ວນ; ສົມທົບກັບສະພາແຫ່ງຊາດ, ຄະນະປະຈຳສະພາແຫ່ງຊາດ, ລັດຖະບານ, ສານປະຊາຊົນສູງສຸດ, ອົງການໄອຍະການສູງສຸດ, ແນວໂຮມປະເທດຊາດ ຫວຽດນາມ ຢ່າງແໜ້ນແຟ້ນ; ຮ່ຳຮຽນ, ປະຕິບັດຕາມແນວຄິດ, ຄຸນສົມບັດ, ແບບແຜນການດຳລົງຊີວິດຂອງປະທານໂຮ່ຈີມິນ ຢ່າງບໍ່ຢຸດຢັ້ງ; ໃກ້ຊິດສະໜິດສະໜົມ, ຮັບຟັງ ແລະ ຮັບເອົາຄຳຄິດເຫັນ, ຄວາມມຸ່ງມາດປາດຖະໜາຂອງປະຊາຊົນ; ພ້ອມທັງປາດຖະໜາວ່າ ຈະໄດ້ຮັບການສະໜັບສະໜູນ, ຊ່ວຍເຫຼືອຂອງທັງລະບົບການເມືອງ, ພໍ່ແມ່ປະຊາຊົນ, ນັກຮົບໃນທົ່ວປະເທດ ແລະ ພໍ່ແມ່ປະຊາຊົນທີ່ຢູ່ຕ່າງປະເທດ ເພື່ອປະຕິບັດສຳເລັດໜ້າທີ່ສຳຄັນທີ່ໄດ້ຮັບການມອບໝາຍໃຫ້ເປັນຢ່າງດີທີ່ສຸດ”.

ທ່ານປະທານສະພາແຫ່ງຊາດ ເວືອງດິ່ງເຫວ້ ມອບດອກໄມ້ອວຍພອນທ່ານປະທານປະເທດຫວຽດນາມ ຫງວຽນຊວັນຟຸກ (ພາບ: VGP)

        ທ່ານປະທານປະເທດ ຫງວຽນຊວັນຟຸກ ເຊື່ອໝັ້ນວ່າ, ພາຍໃຕ້ການນຳພາຂອງພັກ, ດ້ວຍຄຸນນະທາດ ແລະ ພູມປັນຍາຂອງຊາວ ຫວຽດນາມ, ກຳລັງແຮງຂອງນ້ຳໃຈມະຫາສາມັກຄີທົ່ວປວງຊົນທັງຊາດ, ການສະໜັບສະໜູນຂອງເພື່ອນມິດສາກົນ, ແນ່ນອນວ່າ ປະເທດ ຫວຽດນາມ ຈະຜ່ານຜ່າທຸກສິ່ງທ້າທາຍ ແລະ ຄວາມຫຍຸ້ງຍາກ ແລະ ຈະມີແຕ່ຄວາມສະຫງົບສຸກ, ປະຕິບັດບັນດາເປົ້າໝາຍ ເຊິ່ງກອງປະຊຸມໃຫຍ່ຄັ້ງທີ XIII ຂອງ ພັກໄດ້ວາງອອກຢ່າງມີໄຊ.

        “ຫວຽດນາມ ແມ່ນປະເທດທີ່ມີຫຼາຍຊົນເຜົ່າອ້າຍນ້ອງດຳລົງຊີວິດຢູ່ຮ່ວມກັນ, ແຕ່ພວກເຮົາມີຫົວໃຈ, ມີຊາຍຄາລວມອັນດຽວກັນ, ມີປະຫວັດສາດ ແລະ ພາລະກຳທີ່ສະຫງ່າລາສີ. ຄວາມຄາດຫວັງກ່ຽວກັບປະເທດ ຫວຽດນາມ ທີ່ໝັ້ນຄົງເຂັ້ມແຂງ ໃນປີ 2045 ສາມາດທັດທຽມກັບບັນດາປະເທດມະຫາອຳນາດໃນທົ່ວທຸກທະວີບ ຄືດັ່ງຄວາມຫວັງຂອງປະທານໂຮ່ຈີມິນ ແລະ ກໍແມ່ນເນື້ອໃຈຈິດໃຈຂອງກອງປະຊຸມໃຫຍ່ຄັ້ງທີ 13 ຂອງ ພັກກອມມູນິດ ຫວຽດນາມ ໄດ້ວາງອອກ, ນັ້ນບໍ່ແມ່ນຂອງຂວັນທີ່ໄດ້ມີກຽມໄວ້ໃຫ້ແກ່ປີ 2045, ແຕ່ມັນແມ່ນເປົ້າໝາຍອັນສູງສົ່ງຂອງ ຫວຽດນາມ ໃນວັນນີ້ ແລະ ຄົນລຸ້ນຕໍ່ໆໄປ ຕ້ອງມານະພະຍາຍາມສູ້ຊົນເພື່ອບັນລຸໄດ້. ພວກເຮົາມີຄວາມເຊື່ອໝັ້ນຢ່າງແນວແນວ່າ: ສືບທອດບັນດາມູນເຊື້ອອັນສະຫງ່າອົງອາດ ຈະເສີມຂະຫຍາຍເພື່ອບັນລຸໄດ້ບັນດາຜົນງານໃໝ່ ມຸ່ງໄປເຖິງການສ້າງປະເທດ ຫວຽດນາມ ຮັ່ງມີ, ໝັ້ນຄົງ, ເຂັ້ມແຂງ.”