ທີ່ກອງປະຊຸມ, ບັນດາຜູ້ແທນທີ່ເປັນການນຳບັນດາກະຊວງ, ຂະແໜງການ, ການນຳທ້ອງຖິ່ນ ແລະ ວິສາຫະກິດ ໄດ້ພ້ອມກັນປຶກສາຫາລື, ສະເໜີບັນດາມາດຕະການດຶງດູດນັກລົງທຶນໃນບໍລິເວນຮ່າໂນ້ຍ, ບັນດາໂຄງການຮ່ວມມື, ຮ່ວມສຳພັນໃນເຂດ, ເສີມຂະຫຍາຍບົດບາດເປັນເຈົ້າພາທາງ ແລະ ປະສານງານໃນການພັດທະນາຂອງຮ່າໂນ້ຍສຳລັບບັນດາທ້ອງຖິ່ນ.

        ກ່າວຄຳເຫັນທີ່ກອງປະຊຸມ, ທ່ານນາຍົກລັດຖະມົນຕີ ຫງວຽນຊວນຟຸກ ສະເໜີວ່າ ເພື່ອຫັນເປັນການປະຕິບັດວິໄສທັດພັດທະນາຕົວເມືອງຢ່າງມີຫົວຄິດປະດິດສ້າງ, ສີວິໄລ, ທັນສະໄໝ ແຕ່ຍັງຄົງຮັກສາຄຸນຄ່າດ້ານວັດທະນະທຳທີ່ເປັນເອກະລັກສະເພາະຂອງນະຄອນຫຼວງແຫ່ງອະລິຍະທຳນັບພັນປີ ໃຫ້ປະກົດຜົນເປັນຈິງນັ້ນ, ທ່ານນາຍົກລັດຖະມົນຕີ ສະເໜີວ່າ ຮ່າໂນ້ຍຕ້ອງເປັນນະຄອນນຳໜ້າໃນການປ່ຽນແປງໃໝ່ລະບອບລະບຽບການ ແລະ ສະພາບແວດລ້ອມແຫ່ງການດຳເນີນທຸລະກິດ.

        “ຂ້າພະເຈົ້າຖືວ່າ ຮ່າໂນ້ຍຕ້ອງມີບາດກ້າວບຸກທະລຸໃນການປ່ຽນແປງບັນດາຂັ້ນຕອນສຳລັບນັກລົງທຶນ ໂດຍສະເພາະແມ່ນບັນດາລະບຽບການກ່ຽວຂ້ອງເຖິງທີ່ດິນຍັງສັບສົນ, ສິ້ນເປືອງເວລາ ແລະ ເມື່ອເຮັດວຽກກັບບັນດາຂະແໜງການ ຍັງມີຄວາມຄ້າງຄາ. ສະນັ້ນ, ຄວນມີຂັ້ນຕອນລະບຽບການລະຫວ່າງຂະແໜງ, ເປັນເອກະພາບກັນຢ່າງວິທະຍາສາດ, ໂປ່ງໃສ ແລະ ມີກົນໄກປະຕິກິລິຍາ ແລະ ໃຫ້ການຊ່ວຍເຫຼືອຢ່າງທັນການ ເມື່ອນັກລົງທຶນປະສົບກັບຄວາມຫຍຸ້ງຍາກ. ນີ້ແມ່ນບັນຫາຄວນໄດ້ຮັບບຸລິມະສິດຂອງນະຄອນໃນໄລຍະຈະມາເຖິງ”.