(vovworld) - ຕອນຄໍ່າວັນທີ 06/06, ທ່ານນາຍົກລັດຖະມົນຕີ ຫງວຽນເຕີນຢຸງ ພ້ອມກັບຄະນະຜູ້ແທນຫວຽດນາມ ໄດ້ກັບເມືອຮອດຮ່າໂນ້ຍ, ສິ້ນສຸດການເຂົ້າຮ່ວມເວທີປາໄສເສດຖະກິດໂລກອາຊີຕາເວັນອອກປີ 2013 (WEF ອາຊີຕາເວັນອອກ 2013). ທີ່ກອງປະຊຸມ WEF ອາຊີຕາເວັນອອກ 2013 ພາຍໃຕ້ຫົວຂໍ້ວ່າ “ການປ່ຽນແປງໃໝ່ຢ່າງແຮງ ເພື່ອມຸ່ງໄປເຖິງການເຊື່ອມໂຍງ ແລະ ພັດທະນາຢ່າງຮອບດ້ານ”, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ມີບົດກ່າວປາໄສທີ່ພິທີໄຂ, ໂດຍເນັ້ນໜັກວ່າ ວິວັດການເຊື່ອມໂຍງເຂົ້າກັບສາກົນພວມໄດ້ຮັບການຍູ້ແຮງຢູ່ອາຊີຕາເວັນອອກເວົ້າລວມ ແລະ ອາຊຽນ ເວົ້າສະເພາະ ແມ່ນມີຄວາມໝາຍສຳຄັນພິເສດ. ທ່ານນາຍົກລັດຖະມົນຕີ ຫງວຽນເຕີນຢຸງ ຮຽກຮ້ອງໃຫ້ບັນດາວິສາຫະກິດລົງທຶນເຂົ້າບົນດາໂຄງການພັດທະນາເສດຖະກິດ, ສັງຄົມ ຢູ່ຫວຽດນາມ, ຢືນຢັນວ່າ ລັດຖະບານຫວຽດນາມ ແລ້ວທີ່ຈະເຈລະຈາກັບວິສາຫະກິດເພື່ອສືບຕໍ່ປັບປຸງ ແລະ ສ້າງສະພາບແວດລ້ອມແຫ່ງການດຳເນີນທຸລະກິດໃຫ້ສະດວກສະບາຍ ແລະ ຮັບປະກັນຜົນປະໂຫຍດຂອງທຸກໆຝ່າຍ.
ໃນໄລຍະຢູ່ຢ້ຽມຢາມ ມຽນມາ, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ພົບປະເຈລະຈາກັບທ່ານປະທານາທິບໍດີມຽນມາ Thein Sein ແລະ ຕ້ອນຮັບການນຳຂອງບາງກຸ່ມເສດຖະກິດໃຫຍ່ຂອງໂລກ. ທີ່ການພົບປະເຈລະຈາກັບທ່ານປະທານາທິບໍດີມຽນມາ Thein Sein, ການນຳ 2 ທ່ານຢືນຢັນວ່າ ຈະສືບຕໍ່ເສີມຂະຫຍາຍບັນດາກົນໄກຮ່ວມມືທີ່ມີຢູ່ແລ້ວລະຫວ່າງ 2 ປະເທດ ແລະ ໃຫ້ຄຳໝັ້ນສັນຍາຊຸກຍູ້ການຮ່ວມມືດ້ານເສດຖະກິດ, ການຄ້າ, ການລົງທຶນລະຫວ່າງຫວຽດນາມ - ມຽນມາກວ່າອີກ. ການເຂົ້າຮ່ວມ WEF ອາຊີຕາເວັນອອກ 2013 ຂອງທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ຮັບຜົນສຳເລັດຢ່າງດີງາມ, ອັນໄດ້ຢືນຢັນຄວາມຕັ້ງໜ້າເຊື່ອມໂຍງເຂົ້າກັບສາກົນຂອງຫວຽດນາມ, ພ້ອມທັງຍູ້ແຮງການຮ່ວມມືລະຫວ່າງຫວຽດນາມ - ມຽນມາ.