ປະຕິກິລິຍາຂອງ ລັດເຊຍ ກ່ຽວກັບເລື່ອງ ອາເມລິກາ ດັດປັບຄຳສັ່ງລົງໂທດ

ວັນເສົາ ທີ 4 ກຸມພາ ຄ.ສ. 2017 | 15:12:57

ທ່ານ Dmitry Peskov ໂຄສົກຂອງປະທານາທິບໍດີ ລັດເຊຍ
(ພາບ: AFP/TTXVN)

(vovworld) - ວັນທີ 03/02 ທ່ານ Dmitry Peskov ໂຄສົກຂອງປະທານາທິບໍດີ ລັດເຊຍ ຖະແຫຼງວ່າ ເລື່ອງ ອາເມລິກາ ດັດປັບບັນດາມາດຕະການລົງໂທດສຳລັບສະຫະພັນ ລັດເຊຍ ບໍ່ແມ່ນວ່າຜ່ອນຄາຍຄຳສັ່ງລົງໂທດ ຫາກແມ່ນປະກົດການລັດທິສວຍໂອກາດຂອງ ອາເມລິກາ. ທ່ານ Dmitry Peskov ເນັ້ນໜັກວ່າ: ອາເມລິກາ ດັດປັບບັນດາມາດຕະການລົງໂທດ ເພາະວ່າສິ່ງດັ່ງກ່າວມີຜົນປະໂຫຍດໃຫ້ແກ່ ວໍຊິງຕັນ ຫາກບໍ່ແມ່ນຜ່ອນຄາຍຄຳສັ່ງລົງໂທດ.

ກ່ອນໜ້ານັ້ນ ວັນທີ 02/02, ກະຊວງການເງິນ ອາເມລິກາ ໄດ້ດັດປັບບາງຄຳສັ່ງລົງໂທດທີ່ເລັ່ງໃສ່ອົງການປ້ອງກັນຄວາມສະຫງົບສະຫະພັນ ລັດເຊຍ (FSB) ເພື່ອແນໃສ່ສ້າງເງື່ອນໄຂໃຫ້ບັນດາວິສາຫະກິດ ອາເມລິກາ ຢູ່ ລັດເຊຍ ນຳເຂົ້າບາງຜະລິດຕະພັນເຕັກໂນໂລຢີທີ່ຈຳເປັນ. ວົງການເຈົ້າໜ້າທີ່ຂັ້ນສູງກະຊວງການເງິນ ອາເມລິກາ ໃຫ້ຮູ້ວ່າ: ນີ້ແມ່ນ “ການດັດປັບທີ່ມີລັກສະນະເຕັກນິກ”. ໃນຂະນະນັ້ນ ທຳນຽບຂາວ ປະຕິເສດຂ່າວທີ່ຖືວ່າ: ນີ້ແມ່ນການກະທຳ “ຜ່ອນຄາຍ” ບັນດາຄຳສັ່ງລົງໂທດທີ່ເລັ່ງໃສ່ ລັດເຊຍ.