(vovworld) – ຕອນບ່າຍວັນທີ 14/1, ຢູ່ສຳນັກງານປະທານປະເທດ, ທ່ານປະທານປະເທດ ຫວຽດນາມ ເຈືອງເຕີນຊາງ, ທ່ານປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ ຫງວຽນທ້ຽນເຍີນ ເປັນປະທານກອງປະຊຸມສະຫລຸບການປະຕິບັດກົດລະບຽບສົມທົບວຽກງານລະຫວ່າງປະທານປະເທດ ແລະ ຄະນະປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ ປີ 2013.
ທ່ານປະທານປະເທດ ເຈືອງເຕີນຊາງ ສະເໜີໃຫ້ຫ້ອງວ່າການປະທານປະເທດ ແລະ ຄະນະປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ ສືບຕໍ່ປ່ຽນໃໝ່ວຽກງານສົມທົບກັນໃນຂອບເຂດໜ້າທີ່ລະບຸໄວ້ໃນລັດຖະທຳມະນູນເພື່ອແກ້ໄຂຄວາມມຸ້ງມາດປາດຖະໜາ, ຂໍ້ສະເໜີຂອງປະຊາຊົນຢ່າງທັນການ. ທ່ານປະທານປະເທດ ເນັ້ນໜັກວ່າ: 2 ອົງການຄວນມີການສົມທົບກັນຢ່າງແໜ້ນແຟ້ນກ່ວາອີກ, ພິເສດແມ່ນເປັນເຈົ້າການຈັດຕັ້ງກອງປະຊຸມຫົວເລື່ອງສະເພາະຕ່າງໆ ແລກປ່ຽນ ຊອກຫາມາດຕະການແກ້ໄຂບັນດາບັນຫາເຄັ່ງຮ້ອນຂອງສັງຄົມ. ທ່ານປະທານປະເທດ ເຈືອງເຕີນຊາງ ຖືວ່າ: ແນວໂຮມປະເທດຊາດ ຫວຽດນາມ ຄວນສືບຕໍ່ເສີມຂະຫຍາຍກົນໄກຕິດຕາມກວດກາໄຈ້ແຍກ, ຕີລາຄາສັງຄົມ. ນີ້ແມ່ນພື້ນຖານສຳຄັນເພື່ອໃຫ້ແນວໂຮມປະເທດຊາດ ຫວຽດນາມ ແລະ ບັນດາຫົວໜ່ວຍ, ບຸກຄົນ ພ້ອມກັນເຂົ້າຮ່ວມການຕິດຕາມກວດກາປະກອບສ່ວນສ້າງສາປະເທດຊາດໃຫ້ນັບມື້ນັບມີປະຊາທິປະໄຕ.
ບັນດາຜູ້ແທນເຂົ້າຮ່ວມກອງປະຊຸມກໍ່ຖືວ່າ 2 ຝ່າຍຄວນສືບຕໍ່ສົມທົບກັນແກ້ໄຂບັນດາບັນຫາເຊິ່ງສັງຄົມພວມວາງອອກຢ່າງມີປະສິດທິຜົນຄື: ຍຸ້ການສໍ້ລາດບັງຫຼວງ, ການຟຸມເຟືອຍ ໃຫ້ຖອຍໄປ, ຮັບປະກັນຊີວິດສັງຄົມ, ຮັບປະກັນຄວາມສະຫງົບ, ປັບປຸງຄວາມໄວ້ເນື້ອເຊື່ອໃຈຂອງປະຊາຊົນທີ່ມີຕໍ່ພັກ, ສ້າງຄວາມເຫັນດີເຫັນພ້ອມໃນສັງຄົມ.