(vovworld) – ຕອນເຊົ້າວັນທີ 03/06, ຜູ້ຕາງໜ້າໜັງສືພິມເອເລກໂຕນິກວິທະຍຸກະຈາຍສຽງຫວຽດນາມ (VOV) ແລະ ຄະນະກຳມະການປະຊາຊົນເມືອງແທງເຄ, ນະຄອນດ່ານັ້ງ ໄດ້ໄປຢື້ຢາມຖາມຂ່າວ ແລະ ມອບຈຳນວນເງິນເກືອບ 16 ລ້ານດົງໃຫ້ຄອບຄົວປ້າ ຮີນທິຍືຮວາ, ເຈົ້າຂອງມີກຳປັ່ນ Đna 90152 ຖືກກຳປັ່ນຂອງຈີນ ຕຳຈົມນ້ຳ ໃນຂະນະທີ່ພວມຫາປາຢູ່ເຂດຫາປາ ຮ່ວາງຊາ ທີ່ມີມາແຕ່ດົນນານຂອງຫວຽດນາມ. ນີ້ແມ່ນຈຳນວນເງິນໂດຍຜູ້ອ່ານໜັງສືພິມເອເລກໂຕນິກ VOV, ເຊິ່ງແມ່ນຊາວຫວຽດນາມ ພວມດຳລົງຊີວິດ ແລະ ເຮັດວຽກຢູ່ນະຄອນ Magnhitogorsk, ແຂວງ Cheliabinsk, ສະຫະພັນລັດເຊຍ ມອບໃຫ້ເຈົ້າຂອງກຳປັ່ນ Đna 90152 ເພື່ອຜ່ານຜ່າຄວາມຫຍຸ້ງຍາກໂດຍໄວ, ສືບຕໍ່ເດີນທະເລຫາປາ. ນອກຈາກຈຳນວນເງິນຂອງພໍ່ແມ່ປະຊາຊົນຫວຽດນາມ, ມີເພື່ອນມິດຊາວລັດເຊຍ ແລະ ພິເສດມີຊາວຈີນ ຜູ້ໜຶ່ງກໍ່ໄດ້ມອບເງິນສະໜັບສະໜູນໃນຄັ້ງນີ້. ປ້າ ຮີນທິຍືຮວາ, ເຈົ້າຂອງກຳປັ່ນ Đna 90152 ສະແດງຄວາມຂອບອົກຂອບໃຈຕໍ່ບັນດາອົງການຈັດຕັ້ງ, ສ່ວນບຸກຄົນທີ່ໄດ້ເອົາໃຈໃສ່, ຊ່ວຍເຫຼືອຄອບຄົວຊາວປະມົງທາງພາກກາງ. ປ້າ ຮີນທິຍືຮວາ ເວົ້າວ່າ.
“ໃນຊຸມປີຜ່ານມາ, ພໍ່ແມ່ປະຊາຊົນທັງຢູ່ພາຍໃນ ແລະ ຕ່າງປະເທດໄດ້ໜູນຊ່ວຍ, ຂ້າພະເຈົ້າໄດ້ຈົດຈຳ ແລະ ຂໍຂອບໃຈ. ແຫຼ່ງລະດົມກຳລັງໃຈເພື່ອໃຫ້ເຈົ້າຂອງກຳປັ່ນ Đna 90152 ແລະ ຊາວປະມົງ 10 ຄົນພວກຂ້າພະເຈົ້າສືບຕໍ່ເດີນທະເລເພື່ອຫາປາ ແລະ ເພື່ອປົກປັກຮັກສາເຂດທະເລ, ໝູ່ເກາະຮ່ວາງຊາ ຂອງຫວຽດນາມ”.