(ງານໂຮມຊຸມນຸມສະເຫຼີມສະຫຼອງ 70 ປີ
ແຫ່ງວັນມູນເຊື້ອຕຳຫຼວດປະຊາຊົນຫວຽດນາມ)
(vovworld) - ສຸມຄວາມມານະພະຍາຍາມສູ້ຊົນ, ຕັດສິນໃຈກວ່າອີກໃນພາລະກິດປ່ຽນໃໝ່, ສ້າງສາ ແລະ ປົກປັກຮັກສາປະເທດຊາດ. ທ່ານປະທານປະເທດ ເຈືອງເຕິ໋ນຊາງ ໄດ້ເນັ້ນໜັກຄືດັ່ງກ່າວ ທີ່ງານໂຮມຊຸມນຸມສະເຫຼີມສະຫຼອງ 70 ປີ ແຫ່ງວັນມູນເຊື້ອຕຳຫຼວດປະຊາຊົນຫວຽດນາມ (19/8/1945-19/8/2015) ແລະ 10 ປີແຫ່ງວັນບຸນທົ່ວປວງຊົນປົກປັກຮັກສາຄວາມສະຫງົບປອດໄພແຫ່ງຊາດ, ທີ່ດຳເນີນໃນຕອນເຊົ້າວັນທີ 18/8, ຢູ່ຮ່າໂນ້ຍ.
ກ່າວຄວາມເຫັນຢູ່ທີ່ນີ້, ທ່ານປະທານປະເທດ ເຈືອງເຕິ໋ນຊາງ ເນັ້ນໜັກວ່າ, ໃນໄລຍະພັດທະນາໃໝ່, ການຮ່ວມມື ແລະ ພັດທະນາຍັງຄົງແມ່ນທ່າອ່ຽງໃຫຍ່, ແຕ່ສະພາບໂລກຍັງຄົງຜັນແປໄປຢ່າງສັບສົນ, ຊ້ອນແຝງຫຼາຍປັດໃຈກໍ່ຄວາມຂາດສະຖຽນລະພາບ. ບັນດາອິດທິກຳລັງທີ່ເປັນປໍລະປັກເພີ່ມທະວີການເຄື່ອນໄຫວຕ້ານທຳລາຍດ້ານການເມືອງ, ເສດຖະກິດ, ແນວຄິດ, ວັດທະນະທຳ, ຍູ້ແຮງການປະຕິບັດຍຸດທະສາດ “ຫັນປ່ຽນໂດຍສັນຕິ“…ທ່ານປະທານປະເທດ ເຈືອງເຕິ໋ນຊາງ ຊີ້ແຈ້ງວ່າ: ທົ່ວປະເທດສຸມຄວາມມານະພະຍາຍາມສູ້ຊົນ, ຍູ້ແຮງ, ຕັດສິນໃຈກວ່າອີກໃນພາລະກິດປ່ຽນໃໝ່, ສ້າງສາ ແລະ ປົກປັກຮັກສາປະເທດຫວຽດນາມ ສັງຄົມນິຍົມ.
“ພວກເຮົາຕ້ອງກຳແໜ້ນສະພາບການນັ້ນ ເພື່ອມີຄວາມຕັດສິນໃຈ, ມີມາດຕະການຢ່າງແຮງ, ເປັນເຈົ້າການຮັບມື, ຕໍ່ສູ້ກັບການກະທົບທີ່ຫຍໍ້ທໍ້ ແລະ ຕ້ານທຳລາຍຈາກພາຍນອກ. ໃນບໍ່ວ່າສະພາບການໃດກໍ່ຕ້ອງຍາດເອົາໄຊຊະນະ ແລະ ບັນລຸໄດ້ຄາດໝາຍ:“ປົກປັກຮັກສາເອກະລາດ, ອະທິປະໄຕ, ເອກະພາບ, ຜືນແຜ່ນດິນອັນຄົບຖ້ວນຂອງປະເທດຊາດໄວ້ຢ່າງໝັ້ນຄົງ; ປົກປັດຮັກສາພັກ, ລັດ, ປະຊາຊົນ ແລະ ລະບອບສັງຄົມນິຍົມ; ຮັກສາພາລະກິດປ່ຽນໃໝ່, ຫັນເປັນປະເທດອຸດສາຫະກຳ ແລະ ທັນສະໄໝ; ປົກປ້ອງຜົນປະໂຫຍດແຫ່ງຊາດ, ຊົນຊາດ; ປົກປັກຮັກສາຄວາມໝັ້ນຄົງ, ການເມືອງ, ຄວາມເປັນລະບຽບຮຽບຮ້ອຍ, ຄວາມປອດໄພສັງຄົມ ແລະ ພື້ນຖານວັດທະນະທຳ; ຮັກສາສະຖຽນລະພາບດ້ານການເມືອງ ແລະ ສະພາບແວດລ້ອມສັນຕິພາບ ເພື່ອກໍ່ສ້າງ ແລະ ພັດທະນາປະເທດຊາດຕາມກຳນົດທິດສັງຄົມນິຍົມ“ ຄືມະຕິຂອງຄະນະບໍລິຫານງານສູນກາງພັກຊຸດທີ 11 ກ່ຽວກັບ “ຍຸດທະສາດປົກປັກຮັກສາປະເທດຊາດໃນສະພາບການໃໝ່“
ທ່ານປະທານປະເທດ ເຈືອງເຕິ໋ນຊາງ ຮຽກຮ້ອງກໍ່ສ້າງກຳລັງຕຳຫຼວດປະຊາຊົນປະຕິວັດ, ເປັນກຳລັງຫຼວງ, ຊຳນານງານ, ທັນສະໄໝເທື່ອລະກ້າວ, ບຸລິມາສິດໃນການຫັນບາງກຳລັງສຳຄັນເປັນທັນສະໄໝ; ສືບຕໍ່ປັບປຸງກົງຈັກຕາມທິດກະທັດລັດ, ມີປະສິດທິຜົນ.
ທີ່ພິທີສະເຫຼີມສະຫຼອງ, ທ່ານປະທານປະເທດ ເຈືອງເຕິ໋ນຊາງ ໄດ້ມອບຫຼຽນໄຊດາວເຫຼືອງຄັ້ງທີ 4 ໃຫ້ກຳລັງຕຳຫຼວດປະຊາຊົນຫວຽດນາມ.