ລົງມືກໍ່ສ້າງເສັ້ນທາງດ່ວນເຊື່ອມຕໍ່ກວາງນິງກັບຫາຍຝ່ອງ
ພາບປະກອບ
(vovworld) - ຕອນເຊົ້າວັນທີ 13/9, ຢູ່ກວາງນິງ, ທ່ານນາຍົກລັດຖະມົນຕີ ຫງວຽນເຕິ໋ນຢຸງ ໄດ້ອອກຄຳສັ່ງເລີ່ມລົງມືກໍ່ສ້າງໂຄງການເສັ້ນທາງດ່ວນທີ່ ເຊື່ອມຕໍ່ນະຄອນຮ້າລອງ (ກວາງນິງ) ກັບຂົວແບກດັ່ງ (ຫາຍຝ່ອງ). ກ່າວຄວາມເຫັນທີ່ພິທີ, ທ່ານນາຍົກລັດຖະມົນຕີ ຫງວຽນເຕິ໋ນຢຸງ ຊີ້ແຈ້ງວ່າ, ການລະດົມບັນດາແຫຼ່ງກຳລັງຂອງພາກສ່ວນເສດຖະກິດຕ່າງໆ ແລະ ຂອງທົ່ວສັງຄົມ ແລະ ສະຫງວນແຫຼ່ງທຶນຈາກງົບປະມານແຫ່ງລັດເພື່ອກໍ່ສ້າງໂຄງລ່າງເສດຖະກິດ - ສັງຄົມ - ເຊິ່ງແມ່ນໜຶ່ງໃນບັນດາຂອດບຸກທະລຸຍຸດທະສາດ ເພື່ອພັດທະນາປະເທດຊາດຢ່າງໄວ ແລະ ໝັ້ນຄົງ. ທ່ານນາຍົກລັດຖະມົນຕີ ຫງວຽນເຕິ໋ນຢຸງ ກໍ່ຊີ້ນຳໃຫ້ກະຊວງຄົມມະນາຄົມຂົນສົ່ງ, ກະຊວງແຜນການ ແລະ ລົງທຶນ ສົມທົບກັບທ້ອງຖີ່ນຮີບເຮັ່ງເຮັດວຽກກັບຝ່າຍຍີ່ປຸ່ນເພື່ອຈັດວາງແຫຼ່ງທຶນ ແລະ ບັນດາເງື່ອນໄຂຈຳເປັນແນໃສ່ລົງມືກໍ່ສ້າງໂຄງການຂົວແບກດັ່ງ ແລະ ສູ້ຊົນນຳຂົວແບກດັ່ງເຂົ້າໃຊ້ການ, ພ້ອມກັບ ເສັ້ນທາງດ່ວນທີ່ເຊື່ອມຕໍ່ນະຄອນຮ້າລອງ (ກວາງນິງ) ກັບຂົວແບກດັ່ງ (ຫາຍຝ່ອງ). ຮ່າໂນ້ຍ ແລະ ຮ້າລອງ ຈະໄດ້ຮັບການເຊື່ອມຕໍ່ກັນດ້ວຍທາງດ່ວນ, ປະກອບສ່ວນປັບປຸງການປ້ອງກັນຊາດ - ປ້ອງກັນຄວາມສະຫງົບ, ຊຸກຍູ້ການພັດທະນາເສດຖະກິດສັງຄົມຂອງເຂດສາມຫຼ່ຽມເສດຖະກິດຈຸດສຸມທາງພາກເໜືອເວົ້າສະເພາະ ແລະ ເຂດເສດຖະກິດຈຸດສຸມທາງພາກເໜືອກັບທົ່ວປະເທດເວົ້າລວມ.
ໂຄງການ ເສັ້ນທາງດ່ວນທີ່ ເຊື່ອມຕໍ່ນະຄອນຮ້າລອງ -ຫາຍຝ່ອງມີຄວາມຍາວ 25 ກມ, ປະກອບດ້ວຍ 4 ແລວ, ຄວາມໄວອອກແບບແມ່ນ 100 ກມ/ຊົ່ວໂມງ, ດ້ວຍມູນຄ່າທັງໝົດແມ່ນ 6.400 ຕຶ້ດົ່ງ. ເຊິ່ງຈະກໍ່ສ້າງສຳເລັດໃນປີ 2016. ເລື່ອງກໍ່ສ້າງສຳເລັດເສັ້ນທາງດ່ວນທີ່ ເຊື່ອມຕໍ່ນະຄອນຮ້າລອງ -ຫາຍຝ່ອງ ຈະຫລຸດໄລຍະທາງລະຫວ່າງຮ້າລອງ - ຫາຍຝ່ອງລົງເຫຼືອພຽງ 25 ກມ, ປະຈຸບັນແມ່ນປະມານ 70 ກມ.