ລັດຖະບານ ອີຕາລີ ອຸປະຖຳວັກຊິນ Astra Zeneca ກ່ວາ 800.000 ໂດສໃຫ້ແກ່ ຫວຽດນາມ
(VOVWORLD) -ວັນທີ 25 ສິງຫາ 2021, ລັດຖະບານ ອີຕາລີ ໄດ້ຕັດສິນອຸປະຖຳວັກຊິນກັນໂຄວິດ - 19 AstraZeneca 801.600 ໂດສ ໃຫ້ແກ່ ຫວຽດນາມ ຜ່ານກົນໄກ COVAX ເພື່ອແນໃສ່ໜູນຊ່ວຍຫວຽດນາມ ຮັບມືກັບໂລກລະບາດໂຄວິດ - 19.
 ວັກຊິນກັນໂຄວິດ - 19 AstraZeneca (ພາບ: AP) |
ຄາດວ່າຈຳນວນວັກຊິນນີ້ ຈະຖືກຂົນສົ່ງ ແລະ ມອບໃຫ້ ຫວຽດນາມ ໃນຕົ້ນເດືອນກັນຍາຈະມາເຖິງ. ນີ້ແມ່ນໝາກຜົນຂອງການຂົນຂວາຍຂັ້ນສູງ, ໃນນັ້ນມີເລື່ອງທ່ານນາຍົກລັດຖະມົນຕີ ຟ້າມມິງຈິ້ງ ສົ່ງຈົດໝາຍໃຫ້ແກ່ທ່ານນາຍົກລັດຖະມົນຕີ ອີຕາລີ Mario Draghi ແລະ ບັນດາຄວາມມານະພະຍາຍາມຂົນຂວາຍ ເຊິ່ງໜ່ວຍປະຕິບັດງານຂອງລັດຖະບານກ່ຽວກັບການທູດວັກຊິນ ຜັນຂະຫຍາຍໃນໄລຍະຜ່ານມາ. ຂໍ້ຕົກລົງນີ້ ແມ່ນສິ່ງພິສູດໃຫ້ການພົວພັນຄູ່ຮ່ວມມືຍຸດທະສາດລະຫວ່າງ ຫວຽດນາມ - ອີຕາລີ, ໂດຍສະແດງໃຫ້ເຫັນນ້ຳໃຈສາມັກຄີກັນ ຂອງລັດຖະບານ ແລະ ປະຊາຊົນ ອີຕາລີ ທີ່ມີຕໍ່ ຫວຽດນາມ ໃນໄລຍະປະສົບກັບຄວາມຫຍຸ້ງຍາກນີ້.