ລັດເຊຍ ຢືນຢັນຕັດສິນໃຈສ້າງໂຄງການທໍ່ສົ່ງອາຍແກັດໄປຍັງ ເອີຣົບ ໃຫ້ສຳເລັດ
(VOVWORLD) - ວັນທີ 21 ທັນວາ, ທ່ານ Konstantin Kosachev ປະທານກຳມາທິການການພົວພັນຕ່າງປະເທດ, ສະພາສູງ ລັດເຊຍ ໄດ້ຢັ້ງຢືນຕໍ່ສຳນັກຂ່າວສານ RIA ວ່າ: ລັດເຊຍ ຕ້ອງສືບຕໍ່ປະຕິບັດແຜນການສ້າງໂຄງການທໍ່ສົ່ງອາຍແກັດ “ກະແສໄຫຼທາງທິດເໜືອ 2” ໄປຍັງ ເອີຣົບ ໃຫ້ສຳເລັດ, ພາຍຫລັງການກໍ່ສ້າງທໍ່ສົ່ງຖືກໂຈະໄວ້ ຍ້ອນບັນດາຄຳສັ່ງລົງໂທດຂອງ ອາເມລິກາ.
 ລັດເຊຍ ຢືນຢັນຕັດສິນໃຈສ້າງໂຄງການທໍ່ສົ່ງອາຍແກັດໄປຍັງ ເອີຣົບ ໃຫ້ສຳເລັດ (ພາບ: AFP/TTXVN) |
ທ່ານ Konstantin ໄດ້ຍົກອອກຄຳຖະແຫຼງດັ່ງກ່າວ ພາຍຫລັງ ບໍລິສັດ ຮ່ວມທຸລະກິດ Allseas ລະຫວ່າງ ສະວິດ ແລະ ໂຮນລັງ ໃຫ້ຮູ້ວ່າ: ບໍລິສັດນີ້ ໄດ້ຢຸດຕິການກໍ່ສ້າງທໍ່ສົ່ງອາຍແກັດ ເພື່ອຫຼີກລ້ຽງບັນດາມາດຕະການລົງໂທດຂອງ ອາເມລິກາ, ໄດ້ລະບຸໃນກົດໝາຍ ເຊິ່ງທ່ານປະທານາທິບໍດີ Donald Trump ເຊັນໃນວັນທີ 20 ທັນວາ.
ວັນທີ 21 ທັນວາ, ກະຊວງການຕ່າງປະເທດ ລັດເຊຍ ກໍ່ອອກຖະແຫຼງການຢັ້ງຢືນວ່າ ມົດສະກູ ຈະສືບຕໍ່ຊຸກຍູ້ໂຄງການດັ່ງກ່າວ ແລະກໍ່ໃນວັນດຽວກັນ, ເຢຍລະມັນ ແລະ ສະຫະພາບ ເອີຣົບ ກໍ່ອອກສຽງຄັດຄ້ານບັນດາມາດຕະການລົງໂທດຕາມແບບ “ຢູ່ນອກຜືນແຜ່ນດິນ” ເຊິ່ງ ອາເມລິກາ ຫາກໍ່ໃຫ້ສັດຕະຍາບັນ.