ທ່ານນາຍົກລັດຖະມົນຕີ ຫວຽດນາມ ຫງວຽນຊວັນຟຸກ (ພາບ: VGP)

          75 ປີຜ່ານມາ, ຂະແໜງການທູດບັນລຸໄດ້ບັນດາຜົນງານສຳຄັນທີ່ເປັນໜ້າເອກອ້າງທະນົງໃຈ, ປະກອບສ່ວນຢ່າງແທດຈິງເຂົ້າໃນພາລະກິດປົດປ່ອຍປະເທດຊາດ, ທ້ອນໂຮມປະເທດເປັນເອກະພາບກ່ອນນີ້ ກໍ່ຄືສ້າງສາ ແລະ ປົກປັກຮັກສາປະເທດສັງຄົມນິຍົມໃນວັນນີ້. ບັນດາຄວາມມານະພະຍາຍາມຂອງຂະແໜງການທູດໄດ້ຊ່ວຍໃຫ້ ຫວຽດນາມ ສ້າງຕັ້ງການພົວພັນການຕ່າງປະເທດເປີດກ້ວາງກັບ 189 ປະເທດສະມາຊິກຂອງສະຫະປະຊາຊາດ, ສ້າງ 30 ຄູ່ຮ່ວມມືຍຸດທະສາດ ແລະ ຄູ່ຮ່ວມມືຮອບດ້ານ.

          ຂະແໜງການທູດໄດ້ປະກອບສ່ວນສຳຄັນເຂົ້າໃນການຍູ້ແຮງການເຊື່ອມໂຍງເຂົ້າກັບເສດຖະກິດສາກົນ, ຮັບຜິດຊອບບັນດາໜ້າທີ່ສຳຄັນສາກົນໃຫຍ່ເປັນຢ່າງດີຄື ປະທານ ອາຊຽນ, ກຳມະການບໍ່ປະຈຳການສະພາຄວາມໝັ້ນຄົງສະຫະປະຊາຊາດ, ປະທານສະພາລັດຖະສະພາລະຫວ່າງບັນດາປະເທດ ອາຊຽນ…ພິເສດ ໄລຍະມໍ່ໆມານີ້ ຂະແໜງການທູດໄດ້ຜັນຂະຫຍາຍການເຄື່ອນໄຫວທາງການທູດຕາມຮູບການອອນລາຍເປັນຢ່າງດີ ເມື່ອເກີດໂລກລະບາດ

          ສະພາບການໃນໂລກມີບັນດາການຜັນແປຢ່າງສັບສົນ, ເກີດໄພທຳມະຊາດ, ເກີດການປ່ຽນແປງຂອງດິນຟ້າອາກາດຢ່າງຮ້າຍແຮງ, ໂລກລະບາດຍັງແຜ່ລາມ, ທ່ານນາຍົກລັດຖະມົນຕີ ຫງວຽນຊວັນຟຸກ ຖືວ່າ: ສິ່ງທ້າທາຍທີ່ມີຕໍ່ປະເທດ ກໍ່ຄືຂະແໜງການທູດແມ່ນໃຫຍ່ຫລວງ. ທ່ານ ຫງວຽນຊວັນຟຸກ ຮຽກຮ້ອງວ່າ:

          “ວຽກງານການຕ່າງປະເທດຕ້ອງສືບຕໍ່ເສີມຂະຫຍາຍບົດບາດນຳໜ້າ ໃນການຮັກສາສະພາບແວດລ້ອມແຫ່ງການສັນຕິພາບ, ສະຖຽນລະພາບ, ດຶງດູດແຫຼ່ງກຳລັງຈາກພາຍນອກໃຫ້ໄດ້ຢ່າງສຸດຂີດ ເພື່ອສ້າງຄວາມຜູກພັນຢ່າງກົມກຽວກັບການເສີມຂະຫຍາຍກຳລັງແຮງພາຍໃນ, ເພື່ອພັດທະນາໄວ, ຍືນຍົງ, ຍົກສູງບົດບາດ, ທີ່ຕັ້ງ ແລະ ອິດທິພົນຊື່ສຽງສາກົນຂອງ ຫວຽດນາມ.”

          ທ່ານນາຍົກລັດຖະມົນຕີ ຫງວຽນຊວັນຟຸກ ກໍ່ຮຽກຮ້ອງໃຫ້ຂະແໜງການທູດ ຕ້ອງປະຕິບັດເລື່ອງຊຸກຍູ້ການພົວພັນລະຫວ່າງ ຫວຽດນາມ ກັບບັນດາຄູ່ຮ່ວມມືໃຫ້ເຂົ້າສູ່ລວງເລິກ, ມີປະສິດທິຜົນ, ເປັນປົກກະຕິ, ໝັ້ນຄົງເປັນຢ່າງດີ; ເພີ່ມທະວີການພົວພັນການທູດດ້ານເສດຖະກິດ, ເປັນເຈົ້າການເຊື່ອມໂຍງເຂົ້າກັບສາກົນ, ຍົກລະດັບ ຍູ້ແຮງການພົວພັນຕ່າງປະເທດຫລາຍຝ່າຍລະຫວ່າງ ຫວຽດນາມ ກັບບັນດາປະເທດໃນໂລກ.