(vovworld) – ທີ່ກອງປະຊຸມຄັ້ງທີ 29, ຕອນເຊົ້າວັນທີ 15/7, ຄະນະປະຈຳສະພາແຫ່ງຊາດ ໄດ້ປຶກສາຫາລືບາງບັນຫາຂອງຮ່າງກົດໝາຍວ່າດ້ວຍການຄຸ້ມຄອງ, ນຳໃຊ້ທຶນຂອງລັດເຂົ້າໃນການຜະລິດ, ດຳເນີນທຸລະກິດ ແລະ ກົດໝາຍວ່າດ້ວຍການດຳເນີນທຸລະກິດອະສັງຫະລິມະຊັບ (ສະບັບປັບປຸງ). ປຶກສາຫາລືຮ່າງກົດໝາຍວ່າດ້ວຍການຄຸ້ມຄອງ, ນຳໃຊ້ທຶນຂອງລັດເຂົ້າໃນການຜະລິດ, ດຳເນີນທຸລະກິດ, ມີບາງຄຳເຫັນຖືວ່າ: ຂອບເຂດການປັບປຸງຂອງກົດໝາຍແມ່ນກ້ວາງຂວາງທີ່ສຸດ, ສະເໜີກວດກາຄືນເພື່ອຫຼີກລ້ຽງການຊ້ອນກັນກັບບັນດາກົດໝາຍກ່ຽວຂ້ອງຄື: ກົດໝາຍວ່າດ້ວຍການລົງທຶນແຫ່ງລັດ, ກົດໝາຍວ່າດ້ວຍວິສາຫະກິດ (ສະບັບປັບປຸງ). ຜູ້ຕາງໜ້າອົງການກວດສອບ, ກຳມາທິການເສດຖະກິດສະພາແຫ່ງຊາດ, ສະເໜີຊື່ເອີ້ນຂອງຮ່າງກົດໝາຍແມ່ນ “ກົດໝາຍວ່າດ້ວຍການຄຸ້ມຄອງ, ນຳໃຊ້ທຶນຂອງລັດເຂົ້າໃນການຜະລິດ, ດຳເນີນທຸລະກິດຢູ່ວິສາຫະກິດ” ເພື່ອຮັດແຄບຂອບເຂດການປັບປຸງກົດໝາຍສະບັບນີ້. ຕາມນັ້ນແລ້ວ, ກົດໝາຍສະບັບນີ້ພຽງ ກຳນົດບັນດາເນື້ອໃນກ່ຽວກັບການຄຸ້ມຄອງ, ນຳໃຊ້ທຶນຂອງລັດເຂົ້າໃນການຜະລິດ, ດຳເນີນທຸລະກິດຢູ່ວິສາຫະກິດ. ສ່ວນເລື່ອງລົງທຶນເຂົ້າໃນບັນດາໂຄງການ, ແຜນຮ່າງ ກໍ່ສ້າງພື້ນຖານໂຄງລ່າງເສດຖະກິດ ສັງຄົມໄດ້ຮັບການກຳນົດໃນກົດໝາຍວ່າດ້ວຍການ ລົງທຶນແຫ່ງລັດ, ຄຸ້ມຄອງບໍລິຫານວິສາຫະກິດໄດ້ຮັບການກຳນົດໃນຮ່າງກົດໝາຍ ວ່າດ້ວຍວິສາຫະກິດ (ສະບັບປັບປຸງ).
ເມື່ອປຶກສາຫາລືກ່ຽວກັບຮ່າງກົດໝາຍວ່າດ້ວຍການດຳເນີນທຸລະກິດອາສັງຫະລິມະຊັບ (ສະບັບປັບປຸງ), ຄຳເຫັນສ່ວນຫຼາຍໄດ້ເຫັນດີເຫັນພ້ອມກັບຂໍ້ກຳນົດຕ້ອງມີການຄ້ຳປະກັນກ່ອນທີ່ຂາຍເຮືອນຢູ່ທີ່ຈະໄດ້ຮັບການກໍ່ສ້າງໃນອະນາຄົດເພື່ອປະກອບສ່ວນປົກປ້ອງສິດຜົນປະໂຫຍດຂອງລູກຄ້າ, ຮັບປະກັນເລື່ອງ ເຈົ້າຂອງລົງທຶນນຳໃຊ້ເງິນທຶນຂອງລູກຄ້າຖືກຕາມ ຈຸດປະສົງ.