ທ່ານປະທານປະເທດ ຫງວຽນຊວັນຟຸກ ພົບປະກັບທ່ານນາງປະທານສະພາສູງ ສະຫະພັນ ລັດເຊຍ Valentina Matvienko (ພາບ: TTXVN)

ໃນຂອບເຂດການຢ້ຽມຢາມ ສະຫະພັນ ລັດເຊຍ ຢ່າງເປັນທາງການ, ທ່ານປະທານປະເທດ ຫວຽດນາມ ຫງວຽນຊວັນຟຸກ ໄດ້ມີການພົບປະກັບທ່ານນາຍົກລັດຖະມົນຕີ ສະຫະພັນ ລັດເຊຍ Mikhail Mishustin ຢູ່ Moscow ໃນວັນທີ 1 ທັນວາ ປີ 2021, ຕາມເວລາ ລັດເຊຍ. ໃນການພົບປະ, ທ່ານປະທານປະເທດ ຫງວຽນຊວັນຟຸກ ແລະ ທ່ານນາຍົກລັດຖະມົນຕີ Mikhail Mishustin ໄດ້ແລກປ່ຽນກ່ຽວກັບສະພາບການຮ່ວມມື ຫວຽດນາມ - ສະຫະພັນ ລັດເຊຍ ໃນບັນດາຂົງເຂດ, ໂດຍສະເພາະແມ່ນດ້ານເສດຖະກິດ. 2 ຝ່າຍເຫັນດີສ້າງເງື່ອນໄຂສະດວກໃຫ້ການຄ້າ 2 ຝ່າຍກວ່ານີ້ອີກລວມທັງຍາກແຍງບຸລິມະສິດຈາກສັນຍາການຄ້າເສລີລະຫວ່າງ ຫວຽດນາມ ແລະ ສະຫະພັນເສດຖະກິດ ອາຊີ - ເອີຣົບ ໃຫ້ໄດ້ຢ່າງສຸດຂິີດ; ສົ່ງເສີມການຜັນຂະຫຍາຍບັນດາໂຄງການລົງທຶນທີ່ມີຂອບຂະໜາດຢູ່ທັງ ຫວຽດນາມ ແລະ ສະຫະພັນ ລັດເຊຍ ໃນບັນດາຂົງເຂດທີ່ຕ່າງຝ່າຍຕ່າງມິີທ່າແຮງ; ຢັ້ງຢືນຄວາມຕັດສິນໃຈຮັກສາ ແລະ ເປີດກວ້າງການຮ່ວມມືດ້ານພະລັງງານ, ນ້ຳມັນອາຍແກັສ ຢູ່ ຫວຽດນາມ ແລະ ສະຫະພັນ ລັດເຊຍ, ແມ່ນໜຶ່ງໃນບັນດາເສົາຄ້ຳສຳຄັນຂອງການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ສະຫະພັນ ລັດເຊຍ.

2 ຝ່າຍກໍ່ເຫັນດີເປັນເອກະພາບຕໍ່ຫຼາຍທິດທາງ ແລະ ມາດຕະການເພື່ອເພີ່ມທະວີການຮ່ວມມືໃນຂົງເຂດ: ການສຶກສາ - ບຳລຸງສ້າງ, ວິທະຍາສາດ - ເຕັກໂນໂລຊີ, ວັດທະນະທຳ, ມະນຸດສະທຳ, ການທ່ອງທ່ຽວ, ການພົວພັນແລກປ່ຽນລະຫວ່າງປະຊາຊົນ 2 ປະເທດ ຫຼາຍກວ່ານີ້ອີກ; ເພີ່ມທະວີການຮ່ວມມືໃນການຜະລິດວັກຊິນ ກໍ່ຄືຢາປິ່ນປົວພະຍາດໂຄວິດ - 19.

        ເນື່ອງໃນໂອກາດນີ້, ທ່ານປະທານປະເທດ ຫງວຽນຊວັນຟຸກ ກໍ່ມີການພົບປະກັບທ່ານນາງປະທານສະພາສູງ ສະຫະພັນ ລັດເຊຍ Valentina Matvienko. ທີ່ການພົບປະນີ້, ການນຳ 2 ທ່ານໄດ້ເຫັນດີສືບຕໍ່ໍຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງ ຫວຽດນາມ ແລະ ສະຫະພັນ ລັດເຊຍ ໃຫ້ນັບມື້ນັບເຂົ້າສູ່ລວງເລິກ ແລະ ມີປະສິດທິຜົນ, ໃນນັ້ນມີການຮ່ວມມືລະຫວ່າງສະພາແຫ່ງຊາດ ຫວຽດນາມ ແລະ ສະພາສູງ ສະຫະພັນ ລັດເຊຍ.