ທ່ານ ຫງວຽນແມ້ງຮຸ່ງ, ລັດຖະມົນຕີກະຊວງຖະແຫຼງຂ່າວ ແລະ ການສື່ສານ ຫວຽດນາມ (ພາບ: PV/Vietnam+)

ເຫດການດັ່ງກ່າວໂດຍກະຊວງຖະແຫຼງຂ່າວ ແລະ ການສື່ສານ ຫວຽດນາມ ສົມທົບກັບ ຄະນະກຳມະການປະຊາຊົນແຂວງ ກວ໋າງນິງ ຈັດຂຶ້ນ, ສືບຕໍ່ຢັ້ງຢືນຄຳໝັ້ນສັນຍາຢ່າງແຮງຂອງ ຫວຽດນາມ ໃນການຊຸກຍູ້ການຮ່ວມມືດີຈີຕອນໃນພາກພື້ນ ອາຊຽນ ແລະ ເປີດກວ້າງການພົວພັນກັບບັນດາຄູ່ຮ່ວມມືສາກົນ. ເຫດການໄດ້ດຳເນີນຮອດວັນທີ 22 ພະຈິກຈຶ່ງອັດລົງ, ຄາດວ່າໄດ້ດຶງດູດຜູ້ແທນຫຼາຍກວ່າ 600 ທ່ານ ເຊິ່ງເປັນການນຳບັນດາອົງການຄຸ້ມຄອງລັດ ທີ່ມາຈາກເກືອບ 30 ປະເທດ, ຜູ້ແທນບັນດາອົງການຈັດຕັ້ງສາກົນ ແລະ ວິສາຫະກິດເຕັກໂນໂລຢີແຖວໜ້າເຂົ້າຮ່ວມ.

        ໃນວາລະປະຊຸມຄົບຄະນະ, ກອງປະຊຸມໂຕະມົນ, ວາລະປຶກສາຫາລືຂັ້ນລັດຖະມົນຕີໄດ້ສຸມໃສ່ບັນດາໂປຼແກມຂອງຜູ້ຊ່ວຍເໝືອນຈິງ, ຊຸກຍູ້ການຮ່ວມມື ເພື່ອແນໃສ່ຂຸດຄົ້ນກຳລັງບົ່ມຊ້ອນຂອງເຄື່ອງມືດັ່ງກ່າວໃຫ້ມີປະສິດທິຜົນ. ທ່ານ ຫງວຽນແມ້ງຮຸ່ງ, ລັດຖະມົນຕີກະຊວງຖະແຫຼງຂ່າວ ແລະ ການສື່ສານ ຫວຽດນາມ, ຮອງປະທານຄະນະກຳມະການແຫ່ງຊາດກ່ຽວກັບການຫັນເປັນດີຈີຕອນ, ໃຫ້ຂໍ້ສັງເກດວ່າ:

        “AI ແມ່ນສິ່ງທີ່ໃໝ່ອ່ຽມສຳລັບພວກເຮົາ, ດັ່ງນັ້ນ ການຮ່ວມມືແມ່ນເສັ້ນທາງດີທີ່ສຸດເພື່ອໃຫ້ພວກເຮົາພັດທະນາ. ຫວຽດນາມ ຖື Opensource AI ເປັນວິທີເພື່ອພັດທະນາແບບຍືນຍົງ. ຫວຽດນາມ ໄດ້ ແລະ ຈະສືບຕໍ່ໃຫ້ບຸລິມະສິດຊຸກຍູ້ບັນດາຂໍ້ລິເລີ່ມຮ່ວມມືໃນພາກພື້ນ ແລະ ສາກົນໃນຂົງເຂດເຕັກໂນໂລຢີດີຈີຕອນ, ເສດຖະກິດດີຈີຕອນ, ໃນນັ້ນ ຈະໃຫ້ບຸລິມະສິດໃນໂຄງການຮ່ວມມືກ່ຽວກັບ AI, ການພັດທະນາ ແລະ ນຳໃຊ້ຜູ້ຊ່ວຍເໝືອນຈິງ”.