ພົນໂທ ດວງໃຈ ພິຈິດປະດັບຫລຽນໄຊໃຫ້ແກ່ການນຳ, ອະດີດການນຳ
ກະຊວງປ້ອງກັນປະເທດ ຫວຽດນາມ
ພາບ:internet |
(vovword) - ຕອນເຊົ້າວັນທີ 21/7 ຢູ່ ຮ່າໂນ້ຍ, ເນື່ອງໃນໂອກາດລະນຶກ 35 ປີແຫ່ງວັນເຊັນສົນທິສັນຍາມິດຕະພາບ ການຮ່ວມມື ຫວຽດນາມ - ລາວ ແລະ 50 ປີແຫ່ງວັນສ້າງຕັ້ງສາຍພົວພັນທາງການທູດລະຫວ່າງສອງປະເທດ ຫວຽດນາມ ແລະ ລາວ,ຕາງຫນ້າໃຫ້ລັດຖະບານ ສປປ ລາວ, ພົນໂທ ດວງໃຈ ພິຈິດ ກຳມະການກົມການເມືອງ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ລາວ ໄດ້ປະດັບຫລຽນໄຊອິດສະຫລະຊັ້ນຫນຶ່ງ ແລະ ຊັ້ນສອງ ໃຫ້ແກ່ພະນັກງານ 12 ທ່ານ ຊຶ່ງແມ່ນການນຳ, ອະດີດການນຳກະຊວງປ້ອງກັນປະເທດ ຫວຽດນາມ ຍ້ອນມີການປະກອບສ່ວນທາງພູມປັນຍາ, ກຳລັງເຫ່ືອແຮງຊ່ວຍເຫລືອກອງທັບປະຊາຊົນປະຕິວັດລາວໃນບັນດາຂົງເຂດບຳລຸງສ້າງພະນັກງານການນຳ, ຜູ້ບັນຊາການ, ພະນັກງານວິຊາສະເພາະໄລຍະ 2005 - 2010, ປະກອບສ່ວນຢ່າງໃຫຍ່ຫລວງເຂົ້າໃນການກໍ່ສ້າງກອງທັບປະຊາຊົນປະຕິວັດລາວໃຫ້ນັບມື້ນັບພັດທະນາ ແລະ ທັນສະໄຫມເທ່ືອລະກ້າວ. ຕາງຫນ້າໃຫ້ຄະນະພັກການທະຫານສູນກາງ, ກະຊວງປ້ອງກັນປະເທດ ຫວຽດນາມ, ພົນໂຕ ໂດ໋ບາຕີ້, ຫົວຫນ້າກົມໃຫຍ່ເສນາທິການ, ລັດຖະມົນຕີຊ່ວຍວ່າການກະຊວງປ້ອງກັນປະເທດ ຫວຽດນາມ ສະແດງຄວາມຂອບອົກຂອບໃຈບັນດາອາລົມຈິດຂອງພັກ, ລັດ, ກອງທັບ ແລະ ປະຊາຊົນລາວອ້າຍນ້ອງ ທີ່ໄດ້ສະຫງວນໃຫ້ແກ່ກອງທັບປະຊາຊົນ ຫວຽດນາມ ເວົ້າລວມ ແລະ ຢືນຢັນເຖິງຄວາມສາມັກຄີ, ສະຫນິດຕິດພັນລະຫວ່າງປະຊາຊົນ, ກອງທັບສອງປະເທດ. ພົນໂທ ໂດ໋ບາຕີ້ ກ່າວວ່າ:
“ພວກຂ້າພະເຈົ້າຖືເປັນກຽດໄດ້ຮັບລາງວັນອັນສູງສົ່ງຂອງພັກ, ລັດ ລາວມອບໃຫ້ໃນມື້ນີ້, ພວກຂ້າພະເຈົ້າຍິ່ງເຫັນໄດ້ຫນ້າທີ່ຄວາມຮັບຜິດຊອບອັນຍິ່ງໃຫຍ່ຂອງຕົນ ແລະ ຕ້ອງສືບຕໍ່ຊ່ວຍເຫລືອບັນດາສະຫາຍກວ່າອີກເພື່ອກໍ່ສ້າງກອງທັບສອງປະເທດໃຫ້ນັບມື້ນັບພັດທະນາ, ຊຳນານຮົບ ແລະ ທັນສະໄຫມ.”