ທ່ານຮອງລັດຖະມົນຕີການຕ່າງປະເທດ ຫງວຽນກວ໊ກຢຸງ, ຫົວໜ້າເຈົ້າໜ້າທີ່ຂັ້ນສູງ (SOM) (ພາບ: mofa.gov.vn)

ວັນທີ 06 ພຶດສະພາ, ທ່ານຮອງລັດຖະມົນຕີການຕ່າງປະເທດ ຫງວຽນກວ໊ກຢຸງ, ຫົວໜ້າເຈົ້າໜ້າທີ່ຂັ້ນສູງ (SOM) ຫວຽດນາມ ພ້ອມກັບບັນດາຫົວໜ້າ SOM ອາຊຽນ ແລະ ຜູ້ຮັກສາການຊ່ວຍວຽກລັດຖະມົນຕີການຕ່າງປະເທດອາເມລິກາ Atul Keshap ໄດ້ເຂົ້າຮ່ວມການເຈລະຈາ ອາຊຽນ-ອາເມລິກາ ປະຈຳປີຄັ້ງທີ 34 ທາງອອນລາຍ.

        ໂດຍຕາງໜ້າໃຫ້ບັນດາປະເທດອາຊຽນ ກ່າວຄຳເຫັນກ່ຽວກັບບັນດາບັນຫາພາກພື້ນ ແລະ ສາກົນ, ທ່ານຮອງລັດຖະມົນຕີ ຫງວຽນກວ໊ກຢຸງ ເນັ້ນໜັກວ່າ, ໃນສະພາບທີ່ນັບມື້ນັບມີສິ່ງທ້າທາຍຫຼາຍຢ່າງຄື: ໂລກລະບາດ, ໄພທຳມະຊາດ, ການປ່ຽນແປງຂອງດິນຟ້າອາກາດ, ການແກ່ງແຍ້ງບັນດາແຫຼ່ງຊັບພະຍາກອນທຳມະຊາດ ແລະ ບັນດາຄຳຮຽກສິດອະທິປະໄຕນັ້ນ, ບັນດາປະເທດຄວນເພີ່ມທະວີການຮ່ວມມື, ເຈລະຈາ, ສ້າງຄວາມໄວ້ເນື້ອເຊື່ອໃຈ, ເຄົາລົບກົດໝາຍ, ເຄົາລົບເຊິ່ງກັນແລະກັນ ເພື່ອແນໃສ່ຮັບປະກັນສະພາບແວດລ້ອມແຫ່ງສັນຕິພາບ, ສະຖຽນລະພາບ, ສ້າງຄວາມສະດວກໃຫ້ແກ່ການພັດທະນາ.

        ເມື່ອແບ່ງປັນກ່ຽວກັບບັນດາຄວາມມານະພະຍາຍາມຂອງອາຊຽນ ແລະ ຂອງອາເມລິກາ ໃນການຮັບມືກັບບັນດາໄພນາບຂູ່ຕໍ່ຄວາມສະຖຽນລະພາບ ແລະ ການພັດທະນາຢູ່ພາກພື້ນ, ທ່ານຮອງລັດຖະມົນຕີ ຫງວຽນກວ໊ກຢຸງ ສະເໜີໃຫ້ອາຊຽນ ແລະ ອາເມລິກາ ຄວນເພີ່ມທະວີການສົມທົບກັນເພື່ອຮັບປະກັນສັນຕິພາບ, ສະຖຽນລະພາບ ແລະ ການພັດທະນາຢ່າງວັດທະນາຖາວອນຢູ່ພາກພື້ນ ຜ່ານບັນດາກົນໄກໂດຍອາຊຽນ ເປັນເຈົ້າພາບ, ຊຸກຍູ້ຄວາມເປັນລະບຽບຮຽບຮ້ອຍຢູ່ພາກພື້ນ ໂດຍອີງໃສ່ກົດໝາຍ, ເຄົາລົບກົດໝາຍສາກົນ, ແກ້ໄຂບັນດາການຂັດແຍ້ງກັນໂດຍສັນຕິວິທີ. ທ່ານຮອງລັດຖະມົນຕີກໍ່ຢືນຢັນຫຼັກໝັ້ນຫຼັກການຂອງອາຊຽນ ກ່ຽວກັບບັນຫາທະເລຕາເວັນອອກ, ທ່ານປາດຖະໜາວ່າ ອາເມລິກາ ຈະສືບຕໍ່ສວມບົດບາດກໍ່ສ້າງ, ສະໜັບສະໜູນບັນດາຄວາມມານະພະຍາຍາມຂອງອາຊຽນ ເພື່ອແນໃສ່ສ້າງທະເລຕາເວັນອອກ ໃຫ້ກາຍເປັນເຂດທະເລແຫ່ງສັນຕິພາບ, ມິດສະພາບ ແລະ ຮ່ວມມື ກໍຄືບົດບາດຂອງອາຊຽນ ໃນການໜູນຊ່ວຍມຽນມາ.