ສື່ມວນຊົນຝຣັ່ງ:ຫວຽດນາມອາດຈະມີການເຄື່ອນໄຫວນິຕິກຳເພື່ອຄັດຄ້ານຈີນ
ຮ້ານເຈາະນ້ຳມັນຂອງ ຈີນ ຕັ້ງໃນເຂດເສດຖະກິດຈຳເພາະ ແລະ ເຂດໄຫຼ່ທະວີບຂອງຫວຽດນາມ
(ພາບປະກອບ)
(vovworld) – “ຫວຽດນາມ ອາດຈະມີບັນດາການເຄື່ອນໄຫວນິຕິກຳ ເພື່ອຄັດຄ້ານ ເລື່ອງ ຈີນ ຕັ້ງຮ້ານເຈາະນ້ຳມັນເຂົ້າເຂດເສດຖະກິດຈຳເພາະຂອງ ຫວຽດນາມ”. ສື່ມວນຊົນ ຝຣັ່ງ ໃນວັນທີ 23/5 ໄດ້ມີຫົວຂໍ້ຄືດັ່ງກ່າວໃນຂ່າວ ແລະ ບົດວິຈານ ກ່ຽວກັບບົດຕອບສຳພາດຂອງທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູ້ງ ຕໍ່ສຳນັກຂ່າວສານ Reuters. ນັກຂ່າວຂອງໜັງສືພິມ ໂລກ ປະຈຳ ອາຊີຕາເວັນອອກສ່ຽງໃຕ້ Bruno Philip ຄັດສະເໜີຄຳເວົ້າຂອງທ່ານນາຍົກລັດຖະມົນຕີ ຫງວຽນເຕີນຢູ້ງ ທີ່ວ່າ: “ຫວຽດນາມ ພວມຄິດໄລ່ຊັ່ງຊາບັນດາວິທີການເພື່ອປົກປັກຮັກສາຕົນ, ນັບທັງວິທີຕໍ່ສູ້ດ້ານນິຕິກຳ, ຕາມກົດໝາຍສາກົນ”. ກ່ຽວກັບທັດສະນະຂອງ ຫວຽດນາມ, ນັກຂ່າວ Bruno Philip ຄັດສະເໜີຄຳເວົ້າຂອງທ່ານນາຍົກລັດຖະມົນຕີ ຫວຽດນາມ ໂດຍເນັ້ນໜັກວ່າ “ຫວຽດນາມ ເດັດດ່ຽວປົກປັກຮັກສາອິທິປະໄຕ ແລະ ຜົນປະໂຫຍດອັບຊອບທຳຂອງຕົນຍ້ອນວ່າອະທິປະໄຕຜືນແຜ່ນດິນ, ອະທິປະໄຕໝູ່ເກາະ, ທະເລແມ່ນສັກກະລະບູຊາ”.
ສຳນັກຂ່າວສານ Reuters ກໍ່ໄດ້ໃຫ້ສານຂອງທ່ານນາຍົກລັດຖະມົນຕີ ຫງວຽນເຕີນຢູ້ງ ທີ່ວ່າ: ຫວຽດນາມ ປາດຖະໜາຢາກມີມາດຕະການແກ້ໄຂສັນຕິພາບໃຫ້ການຂັດແຍ້ງອະທິປະໄຕຜືນແຜ່ນດິນກັບ ຈີນ. ບົດຂຽນກໍ່ໄຈ້ແນກເລື່ອງ ຟິລິບປິນແມ່ນປະເທດທຳອິດຮ້ອງຟ້ອງ ຈີນ ຢູ່ສານກຳມະການສາກົນ, ຮຽກຮ້ອງໃຫ້ ຈີນ ຕ້ອງເຄົາລົບສົນທິສັນຍາ ສປຊ ກ່ຽວກັບກົດໝາຍທະເລປີ 1982, ແຕ່ ຈີນ ປະຕິເສດເຂົ້າຮ່ວມ. ບົດຂຽນຮັບຮູ້ວ່າ: ເຖິງວ່າສານກຳມະການສາກົນບໍ່ສາມາດບັງຄັບໃຫ້ຝ່າຍຕ່າງໆຕ້ອງເຄົາລົບ ແລະ ປະຕິບັດບັນດາຄຳຕັດສິນຂອງສານກໍ່ຕາມ, ແຕ່ຄຳຕັດສິນສຸດທ້າຍທີ່ບໍ່ມີຜົນປະໂຫຍດໃຫ້ ຈີນ ໃນການຮ້ອງຟ້ອງຂຶ້ນຈະຊຸກຍູ້ບັນດາປະເທດອື່ນມີການກະທຳທີ່ຄ້າຍຄືກັນ ແລະ ພ້ອມກັນສ້າງຄວາມດັນສຳລັບບັງກິງ.