(vovworld) – ວັນທີ 02/03, ສະພາຄວາມໝັ້ນຄົງສະຫະປະຊາຊາດ ໄດ້ເຫັນດີຮັບຮອງເອົາມະຕິໂດຍອາເມລິກາ ສະເໜີແມ່ນເປີດກວ້າງການລົງໂທດສປປ.ເກົາຫຼີ ທີ່ກ່ຽວຂ້ອງເຖິງເຫດທົດລອງນິວເຄຼີຍຄັ້ງທີ 4 ເມື່ອວັນທີ 06/01 ແລະ ການຍິງລູກສອນໄຟນຳດາວທຽມເມື່ອວັນທີ 07/02. ຕາມມະຕິແລ້ວ, ເປັນຄັ້ງທຳອິດໃນປະຫວັດສາດ, ການຂົນສົ່ງເຄື່ອງຂອງທາງທະເລທຸກໆຖ້ຽວທັງເຂົ້າ ແລະ ອອກແດນສປປ.ເກົາຫຼີ ລ້ວນແຕ່ຈະຖືກວດກາ. ມະຕິກໍ່ຫ້າມບັນດາກ່ຳປັ່ນຂອງສປປ.ເກົາຫຼີ ຖືກສົງໄສວ່າຂົນສົ່ງບັນດາສິນຄ້າລະເມີດກົດໝາຍເດີນທາງອອກຈາກບັນດາທ່າກ່ຳປັ່ນໃນທົ່ວໂລກ, ພ້ອມທັງຮັດແໜ້ນຄຳສັ່ງຄວ້ຳບາດດ້ານອາວຸດ ເພື່ອກີດຂວາງບັນດາບໍລິສັດສະໜອງອາວຸດປະເພດນ້ອຍເຖິງກັບພຽງຢາງ. ເອກະສານນີ້ກໍຈັດວາງຄຳສັ່ງຫ້າມສປປ.ເກົາຫຼີ ສົ່ງອອກ ຖ່ານຫີນ, ແຮ່ໂລຫະ, ຄຳ… ພ້ອມທັງຫ້າມບັນດາປະເທດສະໜອງເຊື້ອໄຟທີ່ນຳໃຊ້ໃນຂະແໜງການບິນໃຫ້ປະເທດນີ້. ໃນຂົງເຂດການເງິນ ແລະ ທະນາຄານ, ມະຕິສະບັບໃໝ່ກໍບັງຄັບໃຫ້ບັນດາປະເທດຕ້ອງປິດລ້ອມຊັບສົມບັດຂອງບັນດາສ່ວນບຸກຄົນທີ່ກ່ຽວຂ້ອງເຖິງໂຄງການນິວເຄຼຍ ແລະ ລູກສອນໄຟຂອງພຽງຢາງ…
ພາຍຫຼັງມະຕິໄດ້ຮັບການຮັບຮອງເອົາ, ຫຼາຍປະເທດຄື: ອາເມລິກາ, ອັງກິດ ແລະ ສ.ເກົາຫຼີ ໄດ້ອອກສຽງຊົມເຊີຍບ້າດກ້າວໃໝ່ສຸດຂອງສະຫະປະຊາຊາດນີ້. ຈາກ ວໍຊິງຕັນ, ທ່ານປະທານາທິບໍດີອາເມລິກາ Barack Obama ຖືວ່າ, ເອກະສານນີ້ໄດ້ສົ່ງສານທີ່ວ່າ ສປປ.ເກົາຫຼີ ຕ້ອງປະລະໂຄງການນິວເຄຼຍ ແລະ ເລືອກເຟັ້ນທິດທາງໃໝ່ເພື່ອນຳມາເຊິ່ງຊີວິດອັນດີງາມກວ່າໃຫ້ປະຊາຊົນພຽງຢາງ. ແລະກໍໃນວັນດຽວກັນ, ທ່ານລັດຖະມົນຕີວ່າການກະຊວງການຕ່າງປະເທດອັງກິດ Philip Hamond ໄດ້ຊົມເຊີຍເລື່ອງສະພາຄວາມໝັ້ນຄົງສະຫະປະຊາຊາດ ຮັບຮອງເອົາບັນດາມາດຕະການຢ່າງແຮງ ເພື່ອຮັບມືກັບໂຄງການນິວເຄຼຍຂອງສປປ.ເກົາຫຼີ. ໃນຂະນະນັ້ນ, ລັດຖະບານສ.ເກົາຫຼີ ໃຫ້ຂໍ້ສັງເກດວ່າ ນີ້ແມ່ນມະຕິແຂງແຮງທີ່ສຸດນັບແຕ່ກ່ອນມາ ເລັ່ງໃສ່ສປປ.ເກົາຫຼີ, ພ້ອມທັງຢືນຢັນຈະສະໜັບສະໜູນເອກະສານສະບັບໃໝ່ນີ້.
ໃນເຫດການທີ່ກ່ຽວຂ້ອງ, ສຳນັກຂ່າວສານ Yonhap ຂອງສ.ເກົາຫຼີ ໃຫ້ຮູ້ວ່າ, ໃນເວລາ 10 ໂມງ ວັນທີ 03/03, ສປປ.ເກົາຫຼີ ໄດ້ຍິງລູກສອນໄຟໄລຍະສັ້ນບາງລູກອອກສູ່ເຂດທະເລ ທິດຕາເວັນຕົກຂອງປະເທດນີ້.