ທ່ານນາຍົກລັດຖະມົນຕີ ຫງວຽນຊວັນຟຸກ ກ່າວຄຳເຫັນເຮັດແຈ້ງບາງບັນຫາທີ່ກ່ຽວຂ້ອງເຖິງຄວາມຮັບຜິດຊອບຂອງລັດຖະບານ (ພາບ: VGP)

ຕອນເຊົ້າວັນທີ 10 ພະຈິກ, ສະພາແຫ່ງຊາດຫວຽດນາມ ໄດ້ສິ້ນສຸດວາລະຊັກຖາມບັນດາສະມາຊິກລັດຖະບານ. ບັນດາສະມາຊິກລັດຖະບານສືບຕໍ່ຕອບຄຳຊັກຖາມຂອງບັນດາສະມາຊິກສະພາແຫ່ງຊາດທີ່ກ່ຽວຂ້ອງເຖິງຂົງເຂດການເມືອງ, ເສດຖະກິດ - ສັງຄົມຂອງປະເທດຊາດ. ໃນທ້າຍວາລະຊັກຖາມ, ທ່ານນາຍົກລັດຖະມົນຕີ ຫງວຽນຊວັນຟຸກ ໄດ້ກ່າວຄຳເຫັນເຮັດແຈ້ງບາງບັນຫາທີ່ກ່ຽວຂ້ອງເຖິງຄວາມຮັບຜິດຊອບຂອງລັດຖະບານ ແລະ ຕອບຄຳຊັກຖາມຂອງສະມາຊິກສະພາແຫ່ງຊາດ. ຕາມທ່ານນາຍົກລັດຖະມົນຕີ, ໃນສະພາບການທີ່ປະສົບກັບຄວາມຫຍຸ້ງຍາກຍ້ອນໄພນຳຖ້ວມ, ໂລກລະບາດໂຄວິດ - 19 ແຕ່ອາຍຸການຜ່ານມາ, ຫວຽດນາມ ໄດ້ຮັບຖືວ່າແມ່ນໜຶ່ງໃນ 12 ພື້ນຖານເສດຖະກິດຫາກໍພົ້ນເດັ່ນທີ່ປະສົບຜົນສຳເລັດທີ່ສຸດ. 6 ປີທີ່ຜ່ານມາ, ຫວຽດນາມ ໄດ້ສ້າງວຽກເຮັດງານທຳໃຫ້ແກ່ 28 ລ້ານຄົນ. ພື້ນຖານເສດຖະກິດໄດ້ຮັບການປົວແປງຢ່າງເຫັນໄດ້ຊັດ, ລາຍຮັບສະເລ່ຍຕໍ່ຫົວຄົນເພີ່ມຂຶ້ນເກືອບ 145%, ເທົ່າກັບ 9.000 USD ໄລ່ຕາມກຳລັງແຮງຊື້. ອັດຕາຄອບຄົວທຸກຍາກຫຼຸດແຕ່ 9,8% ເຫຼືອພຽງຕ່ຳກວ່າ 3%. ປີ 2020, ຫວຽດນາມ ກໍແມ່ນໜຶ່ງໃນບັນດາພື້ນຖານເສດຖະກິດທີ່ມີລະດັບການເຕີບໂຕສູງ. ໃນອາຍຸການຜ່ານມາ, ຫວຽດນາມ ກໍປະຕິບັດບົດບາດເປັນປະທານ ອາຊຽນ 2020, ກຳມະການບໍ່ປະຈຳການສະພາຄວາມໝັ້ນຄົງ ສປຊ ຢ່າງສຳເລັດຜົນ.

        ເມື່ອຕອບຄຳຊັກຖາມກ່ຽວກັບມາດຕະການປະຕິບັດເປົ້າໝາຍຄວບຄູ ທັງປ້ອງກັນ, ສະກັດກັ້ນໂລກລະບາດ ໂຄວິດ - 19 ໃຫ້ມີປະສິດທິຜົນ, ທັງຮັບປະກັນພັດທະນາເສດຖະກິດ, ຮັບປະກັນການຊ່ວຍໜູນສັງຄົມ, ທ່ານນາຍົກລັດຖະມົນຕີ ຫງວຽນຊວັນຟຸກ ຊີ້ແຈ້ງວ່າ:

“ໂລກລະບາດໂຄວິດ - 19 ສືບຕໍ່ມີການຜັນແປຢ່າງສັບສົນໃນທົ່ວໂລກ. ດັ່ງນັ້ນ, ຫວຽດນາມ ຕັ້ງເປົ້າໝາຍສະກັດກັ້ນໂລກລະບາດ ບໍ່ປະໃຫ້ແຜ່ລາມອອກສູ່ຊຸມຊົນ ແລະ ເພື່ອຮັກສາໃຫ້ປະເທດບໍ່ຖືກຜົນສະທ້ອນຢ່າງໜັກກ່ຽວກັບດ້ານເສດຖະກິດ, ຮັກສາສັງຄົມໃຫ້ເປັນປົກກະຕິ, ແກ້ໄຂວຽກເຮັດງານທຳ ແລະ ມີລະດັບການເຕີບໂຕໃນລະດັບຈຳເປັນ; ຍົກສູງນ້ຳໃຈສ້າງກຳລັງດ້ວຍຕົນເອງ, ສ້າງຄວາມເຂັ້ມແຂງດ້ວຍຕົນເອງ, ສ້າງພື້ນຖານເສດຖະກິດທີ່ມີລັກສະນະເປັນເຈົ້າຕົນເອງ, ຮັບປະກັນຄວາມປອດໄພໃນການສະໜອງ, ເອົາໃຈໃສ່ເຖິງຕະຫຼາດພາຍໃນປະເທດ ໄປຄຽງຄູ່ກັບການຂຸດຄົ້ນຕະຫຼາດສາກົນໃຫ້ມີປະສິດທິຜົນ”.

        ທ່ານນາງປະທານສະພາແຫ່ງຊາດ ຫວຽດນາມ ຫງວຽນທິກິມເງິນ ສະຫຼຸບວ່າ ວາລະຊັກຖາມ ແລະ ຕອບຄຳຊັກຖາມໄດ້ປະຕິບັດຢ່າງເຂັ້ມງວດ, ມີຄວາມຮັບຜິດຊອບ ແລະ ມີຄຸນນະພາບດີ.