ຫວຽດນາມຖືໄທແມ່ນຄູ່ຮ່ວມມືສຳຄັນໃນອາຊຽນ
ທ່ານລັດຖະມົນຕີ ໂຕເລີມ ເຂົ້າຢ້ຽມຂ່ຳນັບທ່ານນາຍົກລັດຖະມົນຕີໄທ
ປຣາຢຸດ ຈັນໂອຊາ
ພາບ:vntb
|
(vovworld)- ໂດຍໄດ້ຮັບຄຳເຊີນຂອງ ພົນເອກ ຈະທີບ ໄຈຢີນດາ, ຜູ້ບັນຊາການ ຕຳຫລວດສູງສຸດລາຊະອານາຈັກໄທ, ວັນທີ 19/12, ຄະນະຜູ້ແທນຂັ້ນສູງກະຊວງຕຳຫລວດ ຫວຽດນາມ ໂດຍພົນໂທ ໂຕເລີມ, ລັດຖະມົນຕີກະຊວງຕຳຫລວດຫວຽດນາມ ນຳຫນ້າ ໄປຢ້ຽມຢາມ ລາຊະອານາຈັກ ໄທ ແລະ ເຂົ້າຮ່ວມການເຈລະຈາຂັ້ນສູງຄັ້ງທີ 1 ລະຫວ່າງກະຊວງຕຳຫລວດຫວຽດນາມ ກັບຕຳຫລວດ ລາຊະອານາຈັກໄທ. ທ່ານ ພົນໂທ ໂຕເລີມ ໄດ້ໄປໄວ້ອາໄລພະເຈົ້າມະຫາຊີວິດ ພູມີພົນ ອະດຸນຍະເດດ ແລະ ສະແດງຄວາມເສົ້າສະຫລົດໃຈຕໍ່ພະລາຊານີ, ລາຊະວົງ,ລັດຖະບານ, ສະພານິຕິບັນຍັດແລະທົ່ວປວງຊົນໄທ. ທີ່ການຕ້ອນຮັບ ທ່ານລັດຖະມົນຕີ ໂຕເລີມ, ທ່ານນາຍົກລັດຖະມົນຕີ ປຣາຢຸດ ຈັນໂອຊາ ໄດ້ຢືນຢັນ ການຢ້ຽມຢາມ ແລະ ເຮັດວຽກຂອງທ່ານລັດຖະມົນຕີ ໂຕເລີມ ຈະປະກອບສ່ວນເພີ່ມທະວີ, ເຮັດໃຫ້ການພົວພັນລະຫວ່າງສອງປະເທດເວົ້າລວມ, ລະຫວ່າງບັນດາອົງການກ່ຽວຂ້ອງຂອງໄທ ແລະ ກະຊວງຕຳຫລວດຫວຽດນາມ ເວົ້າສະເພາະ ເລິກເຊິ່ງກວ່າ. ທ່ານລັດຖະມົນຕີ ໂຕເລີມ ໄດ້ຢືນຢັນ: ຫວຽດນາມ ຖືໄທແມ່ນຄູ່ຮ່ວມມືສຳຄັນໃນອາຊຽນ. ທ່ານລັດຖະມົນຕີ ໂຕເລີມ ສະເຫນີ ທ່ານນາຍົກລັດຖະມົນຕີ ປຣາຢຸດ ຈັນໂອຊາ ຊີ້ນຳບັນດາກະຊວງ, ຂະແຫນງການກ່ຽວຂ້ອງພິຈາລະນາຊຸກຍູ້ການລົງນາມໃນສັນຍາສົ່ງຜູ້ຮ້າຍໂດຍໄວ ເພື່ອເປັນພື້ນຖານດ້ານນິຕິກຳໃຫ້ແກ່ກຳລັງປະຕິບັດກົດໝາຍຂອງສອງປະເທດ. ທ່ານລັດຖະມົນຕີ ໂຕເລີມ ກໍສະເຫນີທ່ານນາຍົກລັດຖະມົນຕີໄທ ສືບຕໍ່ເອົາໃຈໃສ່, ສ້າງເງື່ອນໄຂເພື່ອໃຫ້ໃນໄລຍະຈະມາເຖິງ, ກະຊວງຕຳຫລວດ ຫວຽດນາມ ເພີ່ມທະວີການຮ່ວມມືກັບບັນດາອົງການກ່ຽວຂ້ອງຂອງໄທໃນບັນດາຂົງເຂດຢ່າງມີປະສິດທິຜົນ, ປະກອບສ່ວນຮັບປະກັນຄວາມໝັ້ນຄົງ, ຄວາມເປັນລະບຽບຮຽບຮ້ອຍຂອງແຕ່ລະປະເທດ.