(vovworld) - ວັນທີ 9/10, ກອງປະຊຸມສົ່ງເສີມການລົງທຶນຂອງບັນດາລັດຖະມົນຕີການເງິນ ອາຊຽນ (AFMIS) ຄັ້ງທີ 9 ໄດ້ໄຂຂຶ້ນຢູ່ເຂດປົກຄອງພິເສດຮົ່ງກົງ ປະເທດຈີນ ໂດຍມີການເຂົ້າຮ່ວມຂອງເຈົ້າຫນ້າທີ່ຊັ້ນນຳຂອງຂະແຫນງການເງິນ - ທະນາຄານໃນພາກພື້ນ ອາຊຽນ ແລະ ໂລກຫລາຍທ່ານ. AFMIS ແມ່ນການເຄື່ອນໄຫວປະຈຳປີຂອງການຮ່ວມມືດ້ານການເງິນ ອາຊຽນ ເພື່ອມຸ່ງໄປເຖິງເລື່ອງສ້າງສະຫະສະມາຄົມກາຍເປັນຈຸດນັດພົບອັນດູດດື່ມສຳລັບບັນດານັກລົງທຶນພາຍໃນ ແລະ ນອກພາກພື້ນ ອາຊຽນ. ກ່າວຄຳເຫັນທີ່ວາລະປຶກສາຫາລື, ທ່ານ Truong Tri Trung ຮອງລັດຖະມົນຕີກະຊວງການເງິນ ຫວຽດນາມໃຫ້ຮູ້ວ່າ: ນັບແຕ່ຕົ້ນປີ 2012, ຫວຽດນາມ ໄດ້ກຳນົດໃຫ້ບຸລິມະສິດຮັກສາສະພາບແວດລ້ອມເສດຖະກິດມະຫາພາກຢ່າງໝັ້ນຄົງ ເພື່ອແນໃສ່ຜ່ານຜ່າໄລຍະທີ່ຫຍຸ້ງຍາກໃນສະເພາະຫນ້າ ແລະ ມຸ່ງໄປສູ່ເປົ້າໝາຍເຕີບໂຕຢ່າງໝັ້ນຄົງ ແລະ ຍາວນານ. ເພື່ອປະຕິບັດຄາດໝາຍດັ່ງກ່າວໃຫ້ໄດ້, ລັດຖະບານ ຫວຽດນາມ ໄດ້ເປັນເອກະພາບປະຕິບັດບັນດາມາດຕະການດ້ານນະໂຍບາຍຄວມຄຸມໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິ, ຮັກສາການເຕີບໂຕໃນລະດັບທີ່ເໝາະສົມ ຕິດພັນກັບການປ່ຽນໃຫມ່ຮູບແບບເຕີບໂຕ ແລະ ສ້າງໂຄງປະກອບພື້ນຖານເສດຖະກິດຄືນໃຫມ່, ຮັບປະກັນຊີວິດສັງຄົມ. ທ່ານຮອງລັດຖະມົນຕີ ເນັ້ນຫນັກວ່າ: ບັນດາຄວາມມານະພະຍາຍາມໃນການບໍລິຫານເສດຖະກິດຂອງລັດຖະບານ ຫວຽດນາມ ໄດ້ນຳມາເຊິ່ງປະສິດທິຜົນອັນຕັ້ງຫນ້າ. ໄລ່ຮອດເດືອນ 9/2012, GDP ຂອງຫວຽດນາມ ເພີ່ມຕາມທ່າອ່ຽງໄຕມາດນີ້ເພີ່ມຂຶ້ນຫລາຍກວ່າໄຕມາດກ່ອນຢ່າງລ່ຽນຕິດ.
ທ່ານ Truong Chi Trung ຮອງລັດຖະມົນຕີກະຊວງການເງິນ ຫວຽດນາມ
ກ່າວປາໃສທີ່ກອງປະຊຸມ
ພາບ:baotintuc.vn
|
ຕາມຮອງລັດຖະມົນຕີກະຊວງການເງິນ ຫວຽດນາມ Truong Chi Trung, ໃນ 9ເດືອນຕົ້ນປີ, ການຄ້າຕ່າງປະເທດຂອງ ຫວຽດນາມ ກໍບັນລຸມູນຄ່າເພີ່ມໃນລະດັບ 34 ລ້ານ USD ເມື່ອທຽບໃສ່ກັບລະດັບຂາດດຸນກວ່າ 8 ຕື້ USD ໃນໄລຍະດຽວກັນຂອງປີກາຍ. ໃນນັ້ນ ພົ້ນເດັ່ນແມ່ນການສົ່ງອອກໄປຍັງຕະຫລາດໃຫຍ່ ສອງແຫ່ງຂອງຫວຽດນາມຄື: ອາເມລິກາ ແລະ ສະຫະພາບເອີລົບ, ລ້ວນແຕ່ເພີ່ມຂຶ້ນເມື່ອທຽບໃສ່ໄລຍະດຽວກັນຂອງປີກາຍ. ເລື່ອງລັດຖະບານ ຫວຽດນາມ ສະແດງຄວາມຕັດສິນໃຈ ແລະ ໝັ້ນໝາຍ ປະຕິບັດບັນດານະໂຍບາຍຮັກສາເສດຖະກິດມະຫາພາກເປັນປົກກະຕິ ແລະ ຄວບຄຸມໄພເງິນເຟີ້, ຊຸກຍູ້ການສ້າງໂຄງປະກອບພື້ນຖານເສດຖະກິດຄືນໃຫມ່ບໍ່ພຽງແຕ່ຊ່ວຍໃຫ້ພື້ນຖານເສດຖະກິດ ຫວຽດນາມພັດທະນາຢ່າງໝັ້ນຄົງໃນສະພາບຄວາມຫຍຸ້ງຍາກເທົ່ານັ້ນ ຫາກຍັງຊ່ວຍຟື້ນຟູຄວາມໄວ້ເນື້ອເຊື່ອໃຈຂອງບັນດານັກລົງທຶນທັງພາຍໃນ ແລະ ຕ່າງປະເທດອີກດ້ວຍ. ທ່ານ Truong Chi Trung ຮອງລັດຖະມົນຕີກະຊວງການເງິນ ຫວຽດນາມ ເນັ້ນຫນັກວ່າ ການເຂົ້າຮ່ວມ AFMIS ຄັ້ງນີ້, ຫວຽດນາມ ກໍຄືທຸກປະເທດສະມາຊິກຂອງອາຊຽນ ລ້ວນແຕ່ມີຈຸດໝາຍລວມນັ້ນແມ່ນຢາກແນະນຳຕໍ່ບັນດານັກລົງທຶນກ່ຽວກັບຜົນສຳເລັດໃນການຮັກສາເສດຖະກິດມະຫາພາກເປັນປົກກະຕິໃນສະພາບການທີ່ເສດຖະກິດພາກພື້ນ ແລະ ໂລກພວມປະສົບກັບຄວາມຫຍຸ້ງຍາກ. ພ້ອມກັນນັ້ນ, ຜ່ານກອງປະຊຸມ, ບັນດາຜູ້ແທນກໍຢາກຊີ້ແຈງສິ່ງທ້າທາຍໃນໄລຍະສັ້ນ ແລະ ໄລຍະກາງ ຊຶ່ງແຕ່ລະປະເທດ ອາຊຽນ ເວົ້າສະເພາະ ແລະ ທັງກຸ່ມປະເທດ ອາຊຽນ ເວົ້າລວມ ຕ້ອງປະເຊີນຫນ້າ, ເຮັດແຈ້ງກວ່າອີກໃນວຽກງານປະສານສົມທົບໃນກຸ່ມອາຊຽນເພື່ອສ້າງຄວາມດຶງດູດບັນດານັກລົງທຶນທັງພາຍໃນ ແລະ ຕ່າງປະເທດກວ່າອີກ.