(VOVWORLD) - ຕອນຄ່ຳວັນທີ 16 ກັນຍາ, ກະຊວງຄົມມະນາຄົມຂົນສົ່ງ ຫວຽດນາມ ໄດ້ສົ່ງເອກະສານດ່ວນເຖິງບັນດາກົມການບິນ ຫວຽດນາມ, ກົມສາທາລະນະສຸກຄົມມະນາຄົມຂົນສົ່ງ ກ່ຽວກັບເລື່ອງເປີດສາຍການບິນສາກົນຄືນໃໝ່.
 ຜູ້ໂດຍສານແຈ້ງຂໍ້ມູນສາທາລະນະສຸກຢູ່ສະໜາມບິນ. (ພາບ: ູbaodansinh.vn) |
ກະຊວງຄົມມະນາຄົມຂົນສົ່ງຮຽກຮ້ອງໃຫ້ກົມການບິນ ຫວຽດນາມ ເປັນເຈົ້າການຈັດຕັ້ງ, ສົມທົບກັບບັນດາອົງການ, ຫົວໜ່ວຍຂຶ້ນກັບກະຊວງການຕ່າງປະເທດ ເພື່ອແລກປ່ຽນ, ເຫັນດີເປັນເອກະພາບກັບບັນດາຄູ່ຮ່ວມມື ຈີນ, ຍີ່ປຸ່ນ, ສ.ເກົາຫຼີ, ໄຕ້ຫວັນ (ຈີນ), ກຳປູເຈຍ, ລາວ (ລວມທັງບັນດາບໍລິສັດການບິນ) ກ່ຽວກັບກໍລະນີເຂົ້າເມືອງ, ຂັ້ນຕອນເຂົ້າເມືອງ ແລະ ບັນດາເງື່ອນໄຂຂອງ ຫວຽດນາມ ສຳລັບຜູ້ຢາກເຂົ້າເມືອງກ່ອນທີ່ຈະຂຶ້ນຍົນ.
ກົມການບິນ ຫວຽດນາມ ມີຄວາມຮັບຜິດຊອບປະກາດກ່ຽວກັບຄວາມຮຽກຮ້ອງຂອງ ຫວຽດນາມ ສຳລັບບໍລິສັດການບິນ ແລະ ຜູ້ໂດຍສານຂອງບັນດາຖ້ຽວບິນດັ່ງກ່າວ. ຕາມນັ້ນແລ້ວ, ບໍລິສັດການບິນ ຈະຂາຍປີ້ໃຫ້ພຽງແຕ່ຜູ້ທີ່ຖືວີຊາເຂົ້າເມືອງ ແລະ ສະຖານທີ່ພັກພາອາໄສລະອຽດຢູ່ ຫວຽດນາມ ເທົ່ານັ້ນ.