|
(vovworld)- ແຈ້ງການຂອງເຈົ້າຫນ້າທີ່ ອິນໂດເນເຊຍ ໃນຕອນທ່ຽງ ວັນທີ 14/1 ໃຫ້ຮູ້ວ່າ: ມີເຫດບຸກໂຈມຕີ 7 ຄັ້ງຢ່າງລຽນຕິດ ຢູ່ ສູນການຄ້າ Sarinah ແລະ ການຍິງປືນໃສ່ກັນຢູ່ນອກຮ້ານ ກາເຟ Starbucks ຕໍ່ຫນ້າສູນການຄ້ານີ້ ໄດ້ເຮັດໃຫ້ມີຜູ້ເສຍຊີວິດ 7 ຄົນ, ໃນນັ້ນ ຜູ້ກໍ່ການຮ້າຍ 5 ຄົນ ແລະ ອີກ 20 ຄົນຖືກບາດເຈັບ. ຝ່າຍ ອິນໂດເນເຊຍ ໃຫ້ຮູ້ວ່າ: ໃນຈຳນວນຜູ້ຖືກເສຍຊີວິດນັ້ນ ມີຊາວການາດາ ຄົນຫນຶ່ງ. ອົງການ “ລັດອິດສະລາມ IS” ໄດ້ຍອມຮັບວ່າໄດ້ດຳເນີນເຫດບຸກໂຈມຕີດັ່ງກ່າວ.ປະຕິກິລີຍາຕໍ່ເຫດບຸກໂຈມຕີກໍ່ການຮ້າຍຢູ່ ຈາກາຕາ, ວັນທີ 14/1, ລັດຖະມົນຕີການຕ່າງປະເທດ ອາເມລິກາ John Kerry ໄດ້ຖະແຫລງວ່າ: ວໍຊີງຕັນ ກ່າວປະນາມເຫດບຸກໂຈມຕີ ຢູ່ ອິນໂດເນເຊຍ ຊື່ງລັດ ອິດສະລາມ ປະກາດໄດ້ປະຕິບັດເຫດບຸກໂຈມຕີ. ທ່ານ Kerry ຢືນຢັນ: ບັນດາການກະທຳກໍ່ການຮ້າຍ ພຽງແຕ່ກໍ່ຄວາມເສຍຫາຍຕາຍຈາກ ແລະ ວິນາດສະກຳເທົ່ານັ້ນ. ພວກເຮົາທັງໝົດຈະພ້ອມກັນສາມັກຄີເພື່ອດັບສູນພວກກໍ່ການຮ້າຍ. ໃນວັນດຽວກັນ, ລັດຖະມົນຕີການຕ່າງປະເທດ ໂຮນລັງ Bert Koenders ກ່າວປະນາມຢ່າງແຮງບັນດາເຫດບຸກໂຈມຕີ ຢູ່ ຈາກາຕາ ແລະ ແບ່ງເບົາຄວາມເສົ້າສະຫລົດໃຈມາຍັງຄູ່ຕຳແຫນ່ງ ອິນໂດເນເຊຍ Retno Marsudi ແລະ ສະເຫນີ ຈະຫນູນຊ່ວຍ ອິນໂດເນເຊຍ ໃນກໍລະນີປະເທດນີ້ມີຄວາມຕ້ອງການ.
ເມື່ອໄດ້ຮັບຂ່າວກ່ຽວກັບ: ເຫດການວາງລະເບີດສະຫຼະຊີບເກີດຂຶ້ນຢູ່ນະຄອນຫຼວງ ຈາກາຕາ, ປະເທດ ອິນໂດເນເຊຍ ໃນວັນທີ 14/1/2016, ເຮັດໃຫ້ຊາວ ອິນໂດເນເຊຍ ບາງຄົນເສຍຊີວິດ ແລະ ຮັບບາດເຈັບ, ວັນທີ 15/1, ທ່ານປະທານປະເທດ ເຈືອງເຕີນຊາງ ແລະ ນາຍົກລັດຖະມົນຕີ ຫງວຽນເຕີນຢູ້ງ ໄດ້ສົ່ງໂທລະເລກແບ່ງເບົາຄວາມເສົ້າສະຫຼົດໃຈໄປຍັງທ່ານປະທານາທິບໍດີ Joko Widodo.
ແລະກໍໃນວັນດຽວກັນ, ທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ຫວຽດນາມ ຟ້າມບີ່ງມີງ ກໍໄດ້ສົ່ງໂທລະເລກແບ່ງເບົາຄວາມເສົ້າສະຫຼົດໃຈໄປຍັງທ່ານລັດຖະມົນຕີວ່າການກະຊວງການຕ່າງປະເທດ Retno Marsudi ເຊັນດຽວກັນ.