(vovworld) - ວັນທີ 20/8, ທ່ານລັດຖະມົນຕີປ້ອງກັນປະເທດອີຣານ Amat Vahidi ໄດ້ຖະແຫຼງປະຕິເສດບັນດາການນາບຂູ່ຂອງ ອິດສະຣາແອນ ກ່ຽວກັບສົງຄາມຕ້ານປະເທດ ສ.ມຸດສະລິມ ພ້ອມກັນນັ້ນກໍໄດ້ຖືວ່າ ບັນດາການນາບຂູ່ແມ່ນບໍ່ມີຄຸນຄ່າ. ທ່ານ Amat Vahidi ໃຫ້ຮູ້ວ່າ, ພາຍໃນອຳນາດການປົກຄອງຂອງ ອິດສະຣາແອນ ພວມເກີດບັນດາຄວາມບໍ່ລົງລອຍກັນດ້ານການເມືອງຢ່າງຮ້າຍແຮງ ແລະ ບັນດາຄຳຖະແຫຼງກະຫາຍສົງຄາມໄດ້ຍົກອອກມາໃນໄລຍະມໍ່ໆມານີ້ແມ່ນສົງຄາມຈິດຕະສາດທີ່ມີຕໍ່ອີຣານ. ແຕ່ທ່ານ Amat Vahidi ກໍຢືນຢັນວ່າ ປະເທດສ.ມຸດສະລິມ ພວມກະກຽມການປ້ອງກັນຕົວຢູ່ລະດັບສູງສຸດ ແລະ ຈະໂຕ້ຕອບທຸກໆປະເທດທີ່ຈະບຸກໂຈມຕີປະເທດນີ້.
ຄວາມເຄັ່ງຕຶງລະຫວ່າງ ອິດສະຣາແອນ ແມ່ນປະເທດດຽວທີ່ມີອາວຸດນິວເຄຼຍຢູ່ຕາເວັນອອກກາງ ແລະ ອີຣານ ເຊິ່ງແມ່ນປະເທດທີ່ພວມຖືກບັນດາປະເທດຝ່າຍຕາເວັນຕົກລະແວງສົງໄສວ່າພວມຜະລິດອາວຸດນິວເຄຼຍ, ໄດ້ປິນຂັ້ນໄດນັບແຕ່ຫຼາຍເດືອນກ່ອນ. ແຕ່ໃນໄລຍະຜ່ານມາ, ທາງສື່ມວນຊົນ ແລະ ບັນດາເຈົ້າໜ້າທີ່ຂັ້ນສູງຂອງ ອິດສະຣາແອນ ໄດ້ເຮັດໃຫ້ລະດັບຄວາມເຄັ່ງຕຶງດັ່ງກ່າວຂຶ້ນລະດັບສູງສຸດ ເມື່ອໄດ້ເຕື້ອງເຖິງການບຸກໂຈມຕີເຂົ້າໃນບັນດາຮາກຖານນິວເຄຼຍຂອງອີຣານ ເຊິ່ງອາດຈະດຳເນີນກ່ອນວັນເລືອກຕັ້ງປະທານາທິບໍດີອາເມລິກາ (6/11).