(vovworld) – ອາເມລິກາ ແລະ ຍີ່ປຸ່ນ ຢັ້ງຢືນ ຈະເພີ່ມທະວີສາຍພົວພັນພັນທະມິດດ້ານປ້ອງກັນຄວາມສະຫງົບ 2 ຝ່າຍ ແລະ ສືບຕໍ່ນຳໃຊ້ນະໂຍບາຍແຂງກະດ້າງກັບ ສປປ ເກົາຫຼີ. ຖະແຫຼງການດັ່ງກ່າວຖືກຍົກອອກມາທີ່ການເຈລະຈາລະຫວ່າງປະທານາທິບໍດີ ອາເມລິກາ Barack Obama ແລະ ທ່ານນາຍົກລັດຖະມົນຕີ ຍີ່ປຸ່ນ Shinzo Abe ຢູ່ ທຳນຽບຂາວ ເມື່ອຕອນເຊົ້າວັນທີ 23/2 (ຕາມເວລາ ຫວຽດນາມ). ທີ່ການເຈລະຈາ, ປະທານາທິບໍດີ Barack Obama ແລະ ທ່ານນາຍົກລັດຖະມົນຕີ Shinzo Abe ເນັ້ນໜັກວ່າ: ອາເມລິກາ ແລະ ຍີ່ປຸ່ນ ຈະຮ່ວມມືຢ່າງແໜ້ນແຟ້ນເພ່ືອຊຸກຍູ້ຄວາມເປັນປົກກະຕິ ແລະ ການເຕີບໂຕເສດຖະກິດ ຢູ່ ອາຊີ - ປາຊີຟິກ. ທ່ານປະທານາທິບໍດີ Barack Obama ໃຫ້ຮູ້ວ່າ:
“ພວກຂ້າພະເຈົ້າເປັນເອກະພາບກັນວ່າ: ບຸລິມະສິດອັນດັບໜຶ່ງຂອງ 2 ປະເທດແມ່ນຮັບປະກັນການເຕີບໂຕ ແລະ ທຸກຄົນລ້ວນແຕ່ມີຄວາມວັດທະນາຖາວອນຖ້າຫາກມານະພະຍາຍາມເຮັດວຽກ. ພວກຂ້າພະເຈົ້າຈະປຶກສາຫາລືບັນດາບັນຫາ ກໍ່ຄືມາດຕະການຕ່າງໆເພື່ອສາມາດດຳເນີນຢູ່ແຕ່ລະປະເທດ ແນໃສ່ຊຸກຍູ້ດ້ານການຄ້າ ແລະ ການເຕີບໂຕ, ສ້າງກາລະໂອກາດຫຼາຍກ່ວາອີກໃຫ້ທັງ ອາເມລິກາ ແລະ ຍີ່ປຸ່ນ”
ປະທານາທິບໍດີ Barack Obama ຊີ້ແຈງວ່າ: ການພົວພັນພັນທະມິດ ອາເມລິກາ - ຍີ່ປຸ່ນ ແມ່ນພື້ນຖານໃຈກາງຂອງສະຖຽນລະພາບໃນພາກພື້ນ. ສ່ວນທ່ານນາຍົກລັດຖະມົນຕີ Shinzo Abe ກໍ່ຢັ້ງຢືນວ່າຄວາມໄວ້ເນື້ອເຊື່ອໃຈໃນການພົວພັນພັນທະມິດ ຍີ່ປຸ່ນ - ອາເມລິກາ ໄດ້ຮັບການຟື້ນຟູ ແລະ ໂຕກຽວ ຈະສືບຕໍ່ມີການກະທຳຢ່າງລະມັດລະວັງໃນການພິດພາດອະທິປະໄຕກັບ ຈີນ.