ອາເມລິກາ ຢັ້ງຢືນ ຈະຮັກສາບັນດາຄຳໝັ້ນສັນຍາກັບ NATO ຢ່າງໝັ້ນແກ່ນ
(VOVWORLD) - ວັນທີ 23 ມີນາ, ທ່ານລັດຖະມົນຕີການຕ່າງປະເທດ ອາເມລິກາ Antony Blinken ໄດ້ ໃຫ້ຄຳໝັ້ນສັນຍາສ້າງສາ ແລະ ຟື້ນຟູ ສຳພັນທະມິດການທະຫານ ອົງການສົນທິສັນຍາອັດລັງຕິກເໜືອ (NATO), ພ້ອມທັງແບ່ງປັນແຜນການຂອງ ອາເມລິກາ ກ່ຽວກັບການຖອນກຳລັງທະຫານອອກຈາກ ອາບການິດສະຖານ.
 ທ່ານລັດຖະທະມົນຕີການຕ່າງປະເທດ ອາເມລິກາ Antony Blinken ແລະ ທ່ານJens Stoltenberg ເລຂາທິການໃຫຍ່ NATO (ພາບ: Reuters) |
ກ່າວຄຳເຫັນໃນການຢ້ຽມຢາມສຳນັກງານ NATO ຢູ່ ບຣຸກແຊນ, ປະເທດແບນຊິກ ຄັ້ງທຳອິດ, ທ່ານລັດຖະທະມົນຕີການຕ່າງປະເທດ ອາເມລິກາ Antony Blinken ຢັ້ງຢືນວ່າ ສຳພັນທະມິດພວມຢູ່ໃນໄລຍະສຳຄັນຂອງການຮັບມືກັບໄພນາບຂູ່ຕ່າງໆໃນທົ່ວໂລກ ກໍຄື ບັນຫາການປ່ຽນແປງຂອງດິນຟ້າ ອາກາດ. ໃນການພົບປະກັບທ່ານ Jens Stoltenberg ເລຂາທິການໃຫຍ່ NATO, ທ່ານລັດຖະມົນຕີການຕ່າງປະເທດ ອາເມລິກາ Antony Blinken ໄດ້ຊີ້ໃຫ້ເຫັນຢ່າງຈະແຈ້ງຈຸດປະສົງຂອງການຢ້ຽມຢາມຄັ້ງນີ້ ແມ່ນເພື່ອສະແດງຄຳໝັ້ນສັນຍາຢ່າງໝັ້ນແກ່ນຂອງ ອາເມລິກາ ທີ່ມີຕໍ່ NATO. ກ່ຽວກັບກໍລະນີຖອນກຳລັງທະຫານອອກຈາກ ອາບການິດສະຖານ, ທ່ານ Antony Blinken ໃຫ້ຮູ້ວ່າ ອາເມລິກາ ຍັງສືບຕໍ່ຕີລາຄາບັນດາແບບວິທີ, ຈະສືບຕໍ່ຮັບຟັງ ແລະ ປຶກສາກັບບັນດາພັນທະມິດ. ຄາດວ່າ, ບັນດາລັດຖະມົນຕີການຕ່າງປະເທດໃນກຸ່ມ NATO ຈະປຶກສາຫາລືກ່ຽວກັບບັນຫາ ອາບການິດສະຖານ ໃນ 2 ວັນ ຈະມາເຖິງຢູ່ ບຣຸກແຊນ.