(vovworld) – ຕອນເຊົ້າວັນທີ 26/6, ທ່ານຮອງນາຍົກລັດຖະມົນຕີຫວຽດນາມ Hoang Trung Hai ໄດ້ໃຫ້ການຕ້ອນຮັບທ່ານ Denis Flory, ຮອງປະທານອົງການພະລັງງານປະລະມານູສາກົນ (ຫຼື IAEA) ພ້ອມດ້ວຍຄະນະພວມຢູ່ຢ້ຽມຢາມຫວຽດນາມ. ທ່ານຮອງນາຍົກລັດຖະມົນຕີ Hoang Trung Hai ຢືນຢັນວ່າ: ແຜນນະໂຍບາຍພັດທະນາພະລັງງານປະລະມານູ ເພື່ອຈຸດປະສົງສັນຕິພາບຂອງຫວຽດນາມ, ພັດທະນາພື້ນຖານເສດຖະກິດຂຽວ, ຍືນຍົງ, ເລື່ອງຜັນຂະຫຍາຍບັນດາໂຄງງານໄຟຟ້ານິວເຄຼຍ ແລະ ໃຫ້ຄຳໝັ້ນສັນຍາປະຕິບັດບັນດາສົນທິສັນຍາສາກົນ ກ່ຽວກັບບັນຫາຄວາມປອດໄພໃນການພັດທະນານິວເຄຼຍ ເຊິ່ງຫວຽດນາມ ເຂົ້າຮ່ວມ. ບົນພື້ນຖານນັ້ນ, ຫວຽດນາມ ຫວັງວ່າ: ອົງການພະລັງງານປະລະມານູສາກົນສືບຕໍ່ໜູນຊ່ວຍ, ຊ່ວຍເຫຼືອຫວຽດນາມ ປະຕິບັດຈຸດໝາຍຍຸດທະສາດນີ້.
ທ່ານ Denis Flory ໃຫ້ຮູ້ວ່າ: ຈຸດປະສົງຂອງການຢ້ຽມຢາມ ແລະ ເຮັດວຽກຢູ່ຫວຽດນາມຄັ້ງນີ້ ແມ່ນເພື່ອຈັດຕັ້ງກອງປະຊຸມສຳມະນາ ແລະ ປຶກສາຫາລືບັນດາມາດຕະການໜູນຊ່ວຍເພີ່ມທະວີຄວາມສາມາດ ແລະ ສິດອຳນາດຂອງອົງການນິຕິກຳ ດ້ານນິວເຄຼຍຢູ່ຫວຽດນາມ, ຮັບໃຊ້ໃຫ້ແກ່ການຄຸ້ມຄອງ, ພັດທະນາບັນດາໂຮງງານນິວເຄຼຍຢູ່ຫວຽດນາມ.
ທ່ານ Denis Flory ແລະ ບັນດາສະມາຊິກໃນຄະນະ ກໍໄດ້ສະເໜີ ແລະ ແລກປ່ຽນກັບທ່ານຮອງນາຍົກລັດຖະມົນຕີ Hoang Trung Hai ກ່ຽວກັບບັນດາບັນຫາທີ່ກ່ຽວຂ້ອງເຖິງພື້ນຖານໂຄງລ່າງທີ່ປອດໄພ, ຮັບໃຊ້ໂຄງການໄຟຟ້ານິວເຄຼຍ, ໃນນັ້ນມີການກໍ່ສ້າງອົງການນິຕິກຳດ້ານນິວເຄຼຍເອກະລາດຂອງຫວຽດນາມໃຫ້ສຳເລັດບໍລິບູນ.