(vovworld) - ວັນທີ 24/10, ຢູ່ສຳນັກງານລັດຖະບານ, ທ່ານຮອງນາຍົກລັດຖະມົນຕີ Nguyen Xuan Phuc ໄດ້ໃຫ້ການຕ້ອນຮັບຄະນະຜູ້ແທນກຳປູເຈຍ ລວມ 10 ທ່ານທີ່ເຄີຍຊ່ວຍເຫຼືອທະຫານອາສາສະໝັກຫວຽດນາມ ໃນໄລຍະປະຕິບັດໜ້າທີ່ຢູ່ກຳປູເຈຍ, ໂດຍທ່ານ Lim Chhay, ຮອງລັດຖະມົນຕີ, ກະຊວງສັງຄົມ, ນັກຮົບເກົ່າ ແລະ ຟື້ນຟູຊາວໜຸ່ມກຳປູເຈຍ, ນຳໜ້າ ທີ່ພວມຢ້ຽມຢາມ ແລະ ເຮັດວຽກຢູ່ຫວຽດນາມ ໃນລະຫວ່າງວັນທີ 22 – 28/10. ທ່ານຮອງນາຍົກລັດຖະມົນຕີ Nguyen Xuan Phuc ໄດ້ຢືນຢັນວ່າ; ສອງປະເທດ ຫວຽດນາມ - ກຳປູເຈຍ ໄດ້ພ້ອມກັນແບ່ງປັນຄວາມລຳບາກກາກກຳ, ພ້ອມກັນສາມັກຄີເພື່ອຕ້ານສັດຕູໂຕດຽວກັນຂອງສອງຊາດ. ຄວາມສາມັກຄີຊ່ວຍເຫຼືອເຊິ່ງກັນ ແລະ ກັນນັ້ນ ໄດ້ຊ່ວຍໃຫ້ປະຊາຊົນສອງປະເທດຍາດໄດ້ໄຊຊະນະອັນໃຫຍ່ຫຼວງໃນບັນດາການຕໍ່ສູ້ປົດປ່ອຍຊາດໃນເມື່ອກ່ອນ ກໍຄືໃນພາລະກິດສ້າງສາ ແລະ ປົກປັກຮັກສາປະເທດຊາດໃນປະຈຸບັນຢ່າງມີໄຊ. ຍາມໃດພັກ, ລັດ ແລະ ປະຊາຊົນຫວຽດນາມ ກໍນັບຖື ແລະ ຂອບອົກຂອບໃຈຕໍ່ການສະໜັບສະໜູນ ແລະ ຊ່ວຍເຫຼືອອັນໃຫຍ່ຫຼວງເຊິ່ງລັດຖະບານ ແລະ ປະຊາຊົນກຳປູເຈຍ ໄດ້ສະຫງວນໃຫ້ແກ່ຫວຽດນາມ ຜ່ານບັນດາໄລຍະປະຫວັດສາດ. ທ່ານຮອງນາຍົກລັດຖະມົນຕີ Nguyen Xuan Phuc ເຊື່ອໝັ້ນວ່າ ສາຍພົວພັນມິດຕະພາບທີ່ເປັນມູນເຊື້ອລະຫວ່າງຫວຽດນາມ - ກຳປູເຈຍ ແມ່ນຊັບສົມບັດອັນລ້ຳຄ່າຂອງສອງຊາດ, ແມ່ນປັດໃຈຕັດສິນໄຊຊະນະຂອງພາລະກິດປະຕິວັດຂອງແຕ່ລະປະເທດ.