(vovworld)- ຕອນເຊົ້າວັນທີ 25/9, ຄະນະຜູ້ແທນເຂົ້າຮ່ວມກອງປະຊຸມໃຫຍ່ແນວໂຮມປະເທດຊາດຫວຽດນາມຄັ້ງທີ VIII ໄດ້ເຂົ້າຢ້ຽມຂ່ຳນັບສຸສານປະທານໂຮ່ຈິມີນ ແລະ ຖະຫວາຍທູບທຽນຢູ່ອະນຸສາວະລີນັກຮົບເສຍສະຫລະຊີວິດເພື່ອຊາດ. ຕອນບ່າຍວັນດຽວກັນ, ກອງປະຊຸມໃຫຍ່ດຳເນີນກອງປະຊຸມຈັດກຽມ, ປຶກສາຫາລືຫລາຍບັນຫາສຳຄັນ.
ໃນວັນດຽວກັນ, ງານວາງສະແດງກອງປະຊຸມໃຫຍ່ແນວໂຮມປະເທດຊາດຫວຽດນາມ ຄັ້ງທີ VIII ຖືກໄຂຂຶ້ນ ຢູ່ ສູນກອງປະຊຸມແຫ່ງຊາດ. ມີຮູບພາບກວ່າ 400 ແຜ່ນໄດ້ນຳມາວາງສະແດງ ໄດ້ວາດພາບໂດຍສັງເຂບກ່ຽວກັບແນວໂຮມປະເທດຊາດຫວຽດນາມ, ບ່ອນເຕົ້າໂຮມ ແລະ ເສີມຂະຫຍາຍກຳລັງແຮງກຸ່ມກ້ອນມະຫາສາມັກຄີທົ່ວປວງຊົນທັງຊາດ, ເປັນຂົວຕໍ່ທີ່ໝັ້ນແກ່ນລະຫວ່າງປະຊາຊົນທຸກຊັ້ນວັນນະໃນທຸກແຖບຖິ່ນຂອງປະເທດຊາດ ແລະ ຊາວຫວຽດນາມ ອາໄສຢູ່ຕ່າງປະເທດ.
ກອງປະຊຸມໃຫຍ່ ແນວໂຮມປະເທດຊາດຫວຽດນາມຄັ້ງທີ VIII
photo:qdnd.vn
|
ກອງປະຊຸມໃຫຍ່ ແນວໂຮມປະເທດຊາດຫວຽດນາມຄັ້ງທີ VIII ຈະຖືກໄຂຂຶ້ນຢ່າງສົມກຽດໃນຕອນເຊົ້າວັນທີ 26/9 ໂດຍມີການເຂົ້າຮ່ວມຂອງຜູ້ແທນກວ່າ 1000 ຄົນ. ດ້ວຍຫົວຂໍ້ “ຄວາມສາມັກຄີ, ປະຊາທິປະໄຕ, ປ່ຽນໃຫມ່ ແລະ ພັດທະນາ”, ກອງປະຊຸມໃຫຍ່ແມ່ນບັ້ນດຳເນີນຊີວິດການເມືອງສຳຄັນຂອງທົ່ວພັກ, ທົ່ວປວງຊົນໃນໄລຍະຍູ້ແຮງການຫັນປະເທດຊາດເປັນປະເທດອຸດສາຫະກຳ ແລະ ທັນສະໄຫມ, ເຊື່ອມໂຍງເຂົ້າກັບສາກົນ. ທ່ານ ຫງວຽນທ້ຽນເຍີນ, ປະທານຄະນະກຳມະການສູນກາງແນວໂຮມປະເທດຊາດຫວຽດນາມ ໃຫ້ຮູ້ວ່າ:
“ບຸກຄະລາກອນຂອງແນວໂຮມປະເທດຊາດຫວຽດນາມ ອາຍຸການນີ້ ຄາດວ່າ ມີກຳມະການ 385 ຄົນ ເພີ່ມຂຶ້ນ 30 ຄົນເມື່ອທຽບໃສ່ໄລຍະກ່ອນ. ລະອຽດ ແມ່ນສຸມໃສ່ເລື່ອງເພີ່ມຈຳນວນຜູ້ຕາງຫນ້າໃຫ້ແກ່ກຳມະກອນ, ຊາວກະສິກອນ. ຈຸດໃຫມ່ຫນຶ່ງອີກ ນັ້ນແມ່ນເປັນຄັ້ງທຳອິດ ມີຜູ້ຕາງຫນ້າໃຫ້ແກ່ບັນດາຜູ້ຄ້າຂາຍລາຍນ້ອຍຢູ່ 2 ພາກຂອງປະເທດຊາດ, ເພີ່ມຈຳນວນຜູ້ຕາງຫນ້າໃນຂົງເຂດເຄື່ອນໄຫວວິທະຍາສາດ, ນັບທັງຜູ້ຕາງຫນ້າເຂດທະເລໝູ່ເກາະ ແລະ ມີການເຂົ້າຮ່ວມຂອງປະທານແນວໂຮມປະເທດຊາດເມືອງເກາະ ເຈື່ອງຊາ. ຄຽງຄູ່ກັນນັ້ນ ຍັງຄົງຮັກສາອັດຕາສ່ວນບັນດາຜູ້ຕາງຫນ້າບໍ່ແມ່ນສະມາຊິກພັກ ຢູ່ໃນລະດັບກວ່າ 50%.”
ຫາງສຽງກ່ອນກອງປະຊຸມໃຫ່ຍແນວໂຮມປະເທດຊາດຫວຽດນາມຄັ້ງທີ 8
ກອງປະຊຸມໃຫ່ຍຜູ້ແທນທົ່ວປະເທດແນວໂຮມປະເທດຊາດຫວຽດນາມຄັ້ງທີ 8 ໄຂຂຶ້ນຢ່າງເປັນທາງການໃນຕອນເຊົ້າວັນທີ 26/9, ກ່ອນວາລະໄຂ, ບັນດາຜູ້ແທນສະແດງຄວາມເຊື່ອໝັ້ນວ່າ, ກອງປະຊຸມໃຫ່ຍຈະເສີມຂະຫຍາຍນ້ຳໃຈມະຫາສາມັກຄີທົ່ວປວງຊົນທັງຊາດ, ເພີ່ມທະວີບົດບາດຕິດຕາກວດກາ, ໄຈ້ແຍກຕີລາຄາສັງຄົມ, ເສີມຂະຫຍາຍລັກສະນະປະຊາທິປະໄຕ, ປະກອບສ່ວນເຂົ້າໃນການພັດທະນາຂອງປະເທດຊາດ. ທ່ານກວານຈ້ອງນິງ, ປະທານຄະນະກຳມະການແນວໂຮມປະເທດຊາດແຂວງບາກລຽວໃຫ້ຮູ້ວ່າ:
“ພວກຂ້າພະເຈົ້າຕ້ອງສຸມໃສ່ພູມປັນຍາເພື່ອປະກອບຄຳເຫັນໃຫ້ບັນດາເອກະສານຂອງກອງປະຊຸມໃຫ່ຍດ້ວຍຈຸດໝາຍແມ່ນເຮັດແນວໃດເພື່ອສ່ອງແສງສະພາບວຽກງານແນວໂຮມໄດ້ ເພື່ອແນໃສ່ຊອກເຫັນບັນດາຈຸດພົ້ນເດັ່ນໃນການສ້າງຊີວິດວັດທະນະທຳຢູ່ເຂດຊຸມຊົນ, ໃນການຫລຸດຜ່ອນຄວາມທຸກຍາກ, ໃນການປະຕິບັດຂໍ້ກຳນົດປະຊາທິປະໄຕຢູ່ຂັ້ນຮາກຖານ. ພວກຂ້າພະເຈົ້າເອົາໃຈໃສ່ເຖິງການຍົກສູງບົດບາດຂອງແນວໂຮມປະເທດຊາດໃນການຕິດຕາມກວດກາ ແລະ ໄຈ້ແຍກຕີລາຄາສັງຄົມ“.
ຜູ້ແທນຫຼາຍທ່ານຖືວ່າ, ເລື່ອງກອງປະຊຸມໃຫ່ຍຜູ້ແທນທົ່ວປະເທດແນວໂຮມປະເທດຊາດຫວຽດນາມຄັ້ງທີ 8 ມີອັດຕາສ່ວນຜູ້ບໍ່ແມ່ນສະມາຊິກພັກກວມກ່ວາ 50% ແມ່ນສະແດງໃຫ້ເຫັນລັກສະນະປະຊາທິປະໄຕ, ລັກສະນະວົງຄະນາຍາດ, ກຳລັງແຮງຂອງທົ່ວປວງຊົນໄດ້ຮັບການເສີມຂະຫຍາຍ. ທ່ານເລງອກຢຸງ, ຜູ້ແທນຕາງໜ້າໃຫ້ບັນດາອົງການສັງຄົມວິຊາຊີບຢືນຢັນວ່າ:
“ລັກສະນະຕາງໜ້າ ແລະ ສຽງເວົ້າຂອງປະຊາຊົນສະແດງອອກຢ່າງກ້ວາງຂວາງກ່ວາ, ມັນສະແດງໃຫ້ເຫັນຢູ່ໃນອັດຕາສ່ວນຜູ້ບໍ່ແມ່ນສະມາຊິກພັກ, ອັດຕາສ່ວນຜູ້ອາຍຸສູງ, ຜູ້ແທນແມ່ນຊາວເຜົ່າສ່ວນໜ້ອຍເຂົ້າຮ່ວມກອງປະຊຸມໃຫ່ຍຄັ້ງນີ້. ສິ່ງດັ່ງກ່າວສະແດງໃຫ້ເຫັນວ່າ, ແນວໂຮມປະເທດຊາດແມ່ນຜູ້ຕາງໜ້າໃຫ້ແກ່ປະຊາຊົນຫຼາຍຊັ້ນຄົນ ແລະ ຕິດພັນກັບ ປຊຊ ກ່ວາ“./.