ເສີມຂະຫຍາຍບົດບາດຂອງຜູ້ມີອິດທິພົນຊື່ສຽງໃນປະຊາຄົມບັນດາເຜົ່າຫວຽດນາມ
ບັນດາຜູ້ແທນເຂົ້າຮ່ວມການໂອ້ລົມສົນທະນາ
(vovworld) – ພັກກອມມູນິດຫວຽດນາມ, ອຳນາດການປົກຄອງ, ແນວໂຮມປະເທດຊາດທຸກຂັ້ນກຳນົດວ່າ ການເສີມຂະຫຍາຍບົດບາດຂອງຜູ້ມີອິດທິພົນຊື່ສຽງໃນປະຊາຄົມບັນດາເຜົ່າຫວຽດນາມ ແມ່ນເນື້ອໃນສຳຄັນ, ມີຄວາມໝາຍດ້ານການເມືອງທີ່ໃຫຍ່ຫຼວງ, ປະກອບສ່ວນກໍ່ສ້າງລະບົບການເມືອງ ຮາກຖານຢ່າງໝັ້ນຄົງເຂັ້ມແຂງ, ພິເສດແມ່ນເພີ່ມທະວີກຸ່ມກ້ອນມະຫາສາມັກຄີທົ່ວປວງຊົນທັງຊາດ. ທີ່ການໂອ້ລົມສົນທະນາ “ການເສີມຂະຫຍາຍບົດບາດຂອງຜູ້ມີອິດທິພົນຊື່ສຽງໃນປະຊາຄົມບັນດາເຜົ່າຫວຽດນາມ ທີ່ມີຕໍ່ວຽກງານກໍ່ສ້າງ, ປັບປຸງກຸ່ມກ້ອນມະຫາສາມັກຄີທົ່ວປວງຊົນທັງຊາດ“ ເຊິ່ງຈັດຂຶ້ນໃນຕອນເຊົ້າວັນທີ 19/11, ຢູ່ບ້ານວັດທະນະທຳ - ທ່ອງທ່ຽວບັນດາເຜົ່າຫວຽດນາມ, ຢູ່ຮ່າໂນ້ຍ. ທ່ານນາງ ຮ່າທິລຽນ, ຮອງປະທານຄະນະກຳມະການສູນກາງແນວໂຮມປະເທດຊາດຫວຽດນາມ, ໃຫ້ຮູ້ວ່າ:
“ຜູ້ມີອິດທິພົນຊື່ສຽງ ແມ່ນບັນດາຜູ້ທີ່ມີບົດບາດສຳຄັນ, ຕັ້ງໜ້າ ເພື່ອເຊື່ອມຕໍ່ປະຊາຊົນທຸກຊັ້ນວັນນະ, ຊາວຊົນເຜົ່າ ຮ່ວມແຮງຮ່ວມໃຈກໍ່ສ້າງ ແລະ ປົກປັກຮັກສາປະເທດຊາດ. ບັນດາແບບຢ່າງທີ່ດີເດັ່ນຂອງຜູ້ມີອິດທິພົນຊື່ສຽງໃນປະຊາຄົມບັນດາເຜົ່າ ແມ່ນບັນດາແກ່ນສານທີ່ຕັ້ງໜ້າເພື່ອຂົນຂວາຍປະຊາຊົນກໍ່ສ້າງຊີວິດໃໝ່, ຕັ້ງຖີ່ນຖານຄົງທີ່, ລົບລ້າງຄວາມອຶດຫີວ, ຫຼຸດຜ່ອນຄວາມທຸກຍາກ, ເສີມຂະຫຍາຍສີສັນວັດທະນະທຳຊົນເຜົ່າ, ເຂົ້າຮ່ວມການຜະລິດ, ສ້າງບ້ານໃຫ້ໝັ້ນຄົງເຂັ້ມແຂງ ນັບທັງດ້ານການເມືອງ, ເສດຖະກິດ, ວັດທະນະທຳ, ສັງຄົມ..“
ທີ່ການໂອ້ລົມສົນທະນາ, ບັນດາຜູ້ແທນໄດ້ປະກອບຫຼາຍຄວາມເຫັນ ເພື່ອແນໃສ່ເສີມຂະຫຍາຍບົດບາດຂອງຜູ້ມີອິດທິພົນຊື່ສຽງໃນປະຊາຄົມ, ສ້າງເງື່ອນໄຂໃຫ້ຜູ້ມີອິດທິພົນຊື່ສຽງພັດທະນາການຜະລິດ, ປັບປຸງຊີວິດການເປັນຢູ່, ໜູນຊ່ວຍດ້ານການເງິນ ເພື່ອລະດົມກຳລັງໃຈ, ສົ່ງເສີມຈິດໃຈຂອງຜູ້ມີອິດທິພົນຊື່ສຽງ, ສ້າງເງື່ອນໄຂເພື່ອໃຫ້ເຂົາເຈົ້າແລກປ່ຽນບົດຮຽນ.