(vovworld)- ທ່າເຮືອບັກ ເອົາເລົາ ປະຈຸບັນແມ່ນຂຶ້ນກັບຕາແສງ ເອົາເລົາ ນະຄອນ ອຽນບາຍ ແມ່ນຫນຶ່ງໃນບັນດາສະຖານທີ່ປະຫວັດສາດຕິດພັນກັບໄຊຊະນະດ້ຽນບຽນຝູ. ໂດຍຕັ້ງຢູ່ທາງຫລວງ 13 A, ຊື່ງແມ່ນເສັ້ນທາງຄົມມະນາຄົມຕົ້ນຕໍ່, ນີ້ແມ່ນປະຕູເຂົ້າສະຫນາມຮົບທີ່ດຸເດືອດ ດ້ຽນບຽນຝູ ເມື່ອປີ 1954.
ແຕ່ລະມື້, ສຽງກາໂນ ຂົນສົ່ງຜູ້ໂດຍສານຂ້າມແມ່ນຳ້ ກ້ອງກັນວານໄປທົ່ວທ່າເຮືອບັກ ເອົາເລົາ. ສຳລັບຜູ້ທີ່ເຄີຍດຳລົງຊີວິດຢູ່ທີ່ນີ້ ເມ່ືອ 60 ປີ ກ່ອນ, ສຽງກາໂນ ໄດ້ພາໃຫ້ເຂົາເຈົ້າຫວນຄືນຫຼັງໄລຍະສົງຄາມຕ້ານພວກລ່າເມືອງຂຶ້ນຝລັ່ງຜູ້ຮຸກຮານ ຍາກທີ່ຈະຫລົງລືມໄດ້. ຮູບພາບບັນດາກອງທະຫານສະຫງ່າອົງອາດ, ພາຍປືນຂຶ້ນເຮືອຂ້າມແມ່ນຳ້ ອອກໄປສູ່ສະໜາມຮົບຍັງຄົງຝັງເລິກຢູ່ໃນໃຈ ພະຍານປະຫວັດສາດຫລາຍທ່ານຢູ່.
ທ່າເຮືອບັກ ເອົາເລົາ
ພາບ:yenbai.vn
|
ໂດຍແມ່ນເສັ້ນທາງຄົມມະນາຄົມຕົ້ນຕໍເພື່ອຊ່ວຍຫນູນໃຫ້ສະຫນາມຮົບ ດ້ຽນບຽນຝູ, ທ່າເຮືອບັກ ເອົາເລົາ ກ່ອນນີ້ ໄດ້ກາຍເປັນເປົ້າໝາຍ ຍິງທຳລາຍຂອງພວກລ່າເມືອງຂຶ້ນຝລັ່ງ. ຕະຫລອດເວລາສອງຮ້ອຍກວ່າວັນແລະຄືນ, ຢູ່ແຫ່ງນີ້ຍາມ ໃດກໍຍິນສຽງລະເບີດ. ມີບັນດາຖ້ຽວເຮືອບັກຂ້າມແມ່ນຳ້ຖືກເຮືອບິນຖີ້ມລະເບີດທຳລາຍ. ເຮືອບັກຖືກຈົ່ມນຳ້, ທະຫານ, ຄົນງານຖືກເສຍສະຫລະຊີວິດ ເຖິງວ່າລ່າເມືອງຂຶ້ນຝລັ່ງໄດ້ນຳໃຊ້ລະເບີດກວ່າ 2.700 ໂຕນທຳລາຍເຂດນີ້ ແຕ່ບໍ່ອາດສະກັດກັ້ນເຮືອໄປມາຂ້າມແມ່ນຳ້ລຳນີ້ໄດ້. ພົນເອກ ຫວໍງວຽນຢາບ ເຄີຍໄປມາທ່າເຮືອບັກນີ້ ໄດ້ຍ້ອງຍໍຈິດໃຈຜ່ານຜ່າຄວາມຫຍຸ້ງຍາກລຳບາກ ແລະ ຄວາມດຸເດືອດເພື່ອສຳເລັດຫນ້າທີ່ແມ່ນຮັບປະກັນການຄົມມະນາຄົມ. ທ່ານ ຟ້າມຈູງໂຕນ, ແມ່ນຫນຶ່ງໃນບັນດາຜູ້ບັນຊາບັນດາຖ້ຽວເຮືອບັກໂດຍກົງ ໃນຄາວນັ້ນໃຫ້ຮູ້ວ່າ:
“ຕອນແລງ ເວລາ 4 ໂມງ, 4 ໂມງເຄິ່ງ ບັນຍາກາດຢູ່ສອງຟາກແມ່ນຳ້ແມ່ນຟົດຟື້ນທີ່ສຸດ. ເຮືອບັກ, ເຮືອຂົນສົ່ງປືນໃຫຍ່, ອາວຸດ, ທະຫານ, ຄົນງານເກນຂ້າມແມ່ນຳ້. ປືນໃຫຍ່, ອາວຸດຫນັກສ່ວນຫລາຍແມ່ນຂົນສົ່ງດ້ວຍເຮືອບັກໃນຍາມຄຳ່ຄືນ. ຄາວນັ້ນ ເຮືອບິນຂອງສັດຕູຍິງທຳລາຍຢ່າງດຸເດືອດ ແຕ່ອ້າຍນ້ອງທະຫານພັດບໍ່ຢ້ານກົວ.”
ທ່າເຮືອບັກເອົາເລົາ ແມ່ນແຫ່ງທີ່ເຊິ່ງຂະບວນລົດຖີບຂົນສົ່ງຂອງຄົນງານເກນ ແຂວງ ຟູທໍ້ ເຄີຍຂົນສົ່ງເຂົ້າສານ ຈາກອຽນບາຍ ໄປຍັງສາງຢູ່ຕີນກິ່ວ ຟາດີນ. ນີ້ກໍແມ່ນແຫ່ງທີ່ບັນດານັກຮົບ ກອງພັນໃຫຍ່ “ເຕີດທັງ” ນຳເອົາປືນໃຫຍ່ເຂົ້າສະຫນາມຮົບ ດ້ຽນບຽນຝູ. ລຸງ ດັ້ງງອກຈີ, ອາຍຸ 87 ປີ ຢູ່ ຕາແສງ ຫງວຽນຟຸກ ນະຄອນ ອຽນບາຍ, ພະນັກງານການເມືອງ ກອງຮ້ອຍ 395, ເຄີຍເຂົ້າຮ່ວມບັ້ນຮົບ ດ້ຽນບຽນຝູ ເລ່ົາສູ່ຟັງວ່າ:
“ເສັ້ນທາງຈາກທ່າເຮືອໄປເຖິງສະຫນາມຮົບຖືກສັດຕູທຳລາຍທຸກມື້. ໃນຄາວນັ້ນ ເຮືອຂອງປະຊາຊົນນັບຮ້ອຍລຳຢູ່ ເຂດເອົາເລົາໄດ້ຂົນສົ່ງພວກຂ້າພະເຈົ້າຂ້າມແມ່ນຳ້. ໃນເວລາພຽງ 1 ຊົ່ວໂມງ, ກອງພັນໃຫຍ່ພວກຂ້າພະເຈົ້າທຸກຄົນໄດ້ຂ້າມແມ່ນຳ້ເພື່ອເຂົ້າສູ່ສະຫນາມຮົບ.”
ໃນບັ້ນຮົບ ດ້ຽນບຽນຝູ, ແຂວງ ອຽນບາຍ ລະດົມຄົນງານເກນກວ່າ 31.600 ເທື່ອຄົນເພື່ອຮັບໃຊ້ສະຫນາມຮົບ. ຕາແສງ ເອົາເລົາ ບໍ່ ຮອດ 300 ຄອບຄົວ ແຕ່ມີຄົນງານເກນເຖິງ 300 ເທື່ອຄົນຮັບໃຊ້ສະຫນາມຮົບ. ຜູ້ຍັງເຫລືອຢູ່ບ້ານ, ສ່ວນຫລາຍແມ່ນແມ່ຍິງ, ຜູ້ເຖົ້າຜູ້ແກ່ ກໍໄດ້ອອກທ່າເຮືອເພື່ອເຂົ້າຮ່ວມການຕໍ່ຕ້ານ. ນັບແຕ່ເດືອນ 4/1952 ຈົນເຖິງສິ້ນສຸດໄຊຊະນະດ້ຽນບຽນຝູ, ມີ ອາວຸດ, ສະບຽງອາຫານ ນັບ 300.000 ໂຕນຖືກຂົນສົ່ງຜ່ານແມ່ນຳ້ ພ້ອມກັບທະຫານ, ປະຊາຊົນນັບໝື່ນໆເທື່ອຄົນໄດ້ຜ່ານທ່າເຮືອບັກເອົາເລົາຢ່າງປອດໄພ. ປ້າ ຫງວຽນທິເບ, ອາຍຸ 85 ປີ ຢູ່ ນະຄອນ ອຽນບາຍ ເລົ່າສູ່ຟັງວ່າ:
“ຂະບວນເຮືອຂອງພວກຂ້າພະເຈົ້າມີເຖິງຮ້ອຍໆລຳ. ກາງເວັນນຳເອົາເຮືອໄປລີ້ຊ້ອນ, ກາງຄືນຈຶ່ງອອກມາຂົນສົ່ງ. ຮູ້ຈັກວ່າ ຈະອັນຕະລາຍແທ້ ແຕ່ຕ້ອງປະຕິບັດ.”
ການພາຍເຮືອຂົນສົ່ງກໍປະສົບກັບຄວາມຫຍຸ້ງຍາກຫລາຍ, ແຕ່ດ້ວຍຄວາມຕັດສິນໃຈ “ທຸກສິ່ງທຸກຢ່າງເພື່ອແນວຫນ້າ, ເພື່ອຍາດເອົາໄຊຊະນະ”, ສະນັ້ນ ພະນັກງານ, ປະຊາຊົນຮັບໃຊ້ຢູ່ທ່າເຮືອບັກ ຕ້ອງຊອກຫາວິທີເໝາະສົມ, ຫລຸດຜ່ອນເວລາຂ້າມແມ່ນຳ້ລົງ ເພື່ອໄປມາໄດ້ຫລາຍເທື່ອ. ທ່າເຮືອບັກ ໄດ້ຮັບຮອງວ່າ ແມ່ນເຂດປູຊະນີຍະສະຖານປະຫວັດສາດລະດັບຊາດປີ 2012.
ຄຽງຂ້າງແມ່ນຳ້ແດງ ແມ່ນອະນຸສາວະລີ “ທ່າເຮືອບັກປະຫວັດສາດ”. ອະນຸສາວະລີ ຄືດັ່ງຕັກເຕືອນໃຫ້ລຸ້ນຫນຸ່ມກ່ຽວກັບປະຫວັດສາດອັນສະຫງ່າອົງອາດຂອງທ່າເຮືອບັກ. ທ່າເຮືອບັກເອົາເລົາ ແມ່ນສັນຍາລັກແຫ່ງນຳ້ໃຈເດັດດຽວສູ້ຮົບຍາດເອົາໄຊຊະນະ, ແມ່ນຄວາມເອກອ້າງທະນົງໃຈຂອງອົງຄະນະພັກ, ປະຊາຊົນບັນດາເຜົ່າ ແລະ ກຳລັງປະກອບອາວຸດແຂວງ ອຽນບາຍ.