ນາມຢູແມ່ນໝູ່ເກາະທີ່ຫ່າງໄກກວ່າໝູ່ທີ່ຂຶ້ນກັບເມືອງກຽນຫາຍ, ແຂວງກຽນຢາງຫ່າງຈາກນະຄອນແຣກຢ້າ 65 ໄມທະເລ. ເກາະນ້ອຍໃຫຍ່ 21 ແຫ່ງໂດຍທຳມະຊາດຈັດວາງຢ່າງເປັນງາມຕາ, ອັນໄດ້ສ້າງທັດສະນີຍະພາບທີ່ງົດງາມໃຫ້ແກ່ບັນດາຫາດຊາຍທະເລທີ່ສວຍງາມດັ່ງໃນຝັນ. ນາມຢູ ທີ່ມີຄວາມງາມແບບຮົກເຮື້ອໃນປະຈຸບັນ ແມ່ນສະຖານທີທ່ອງທ່ຽວທີ່ດູດດື່ມແຖວໜ້າສຳລັບແຂກທ່ອງທ່ຽວ.
ຄວາມງາມຢູ່ເກາະຮ່ອນເລີ້ນ |
ຈາກນະຄອນແຣກຢ້າ, ກຽນຢາງ, ຍານພາຫະນະພຽງຢ່າງດຽວເພື່ອສົ່ງແຂກທ່ອງທ່ຽວໄປຍັງໝູ່ເກາະນາມຢູ່ ນັ້ນແມ່ນເຮືອໄວ. ພາຍຫຼັງ 2 ຊົ່ວໂມງ, ເຮືອໄວສົ່ງແຂກທ່ອງທ່ຽວຈະເຂົ້າທຽບທ່າໃນເກາະ ຮ່ອນເລີ້ນຊຶ່ງແມ່ນເກາະໃຫຍ່ກວ່າໝູ່ໃນໝູ່ເກາະນາມຢູ່ . ບັນຍາກາດຊື້ຂາຍອາຫານທະເລທີ່ຄຶກຄື້ນໄດ້ມີຂຶ້ນໃນບໍລິເວນຂົວໃຫ້ເຮືອເຂົ້າທຽບທ່າ.
ເມື່ອໄປຮອດເກາະຮ່ອນເລີ້ນ, ແຂກທ່ອງທ່ຽວຈະໄດ້ຂີ່ລົດຈັກເພື່ອຄົ້ນຫາທັດສະນີຍະພາບ ກໍຄືການດຳລົງຊີວິດຂອງປະຊາຊົນຢູ່ເກາະແຫ່ງນີ້. ເສັ້ນທາງໃຫຍ່ອ້ອມຮອບເກາະຍາວເກືອບ 12 ກິໂລແມັດ. ຈາກຄວາມສູງເກືອບ 300 ແມັດເມື່ອທຽບໃສ່ໜ້ານ້ຳທະເລ, ແຂກທ່ອງທ່ຽວສາມາດເຫັນຄວາມງາມຂອງເກາະນ້ອຍໃຫຍ່ຕັ້ງສະຫຼັບສັບຊ້ອນບົນພື້ນສີຂຽວຂອງນ້ຳທະເລ ແລະ ທ້ອງຟ້າ. ລຽບຕາມຝັ່ງທະເລແມ່ນບັນດາໝູ່ບ້ານຊາວປະມົງ, ບັນດາຫຼັງຄ່າເຮືອນນ້ອຍໆທີ່ສວຍງາມຊ້ອນຕົວໃຕ້ຮົ່ມເຢັນຂອງແຖວຕົ້ນໝາກພ້າວຂຽວອຸ່ມທຸ່ມ, ເມື່ອມຸ່ງສາຍຕາໄປໄກແມ່ນຝູງເຮືອຫາປານັບຮ້ອຍລຳພວມເລື່ອນລອຍບົນໜ້ານ້້ຳທະເລ. ນາງ ຫງວຽນເຫ້ວລີງ ແຂກທ່ອງທ່ຽວມາຈາກຮ່າໂນ້ຍ ເປີດເຜີຍວ່າ :
“ ນ້ອງໄດ້ຍິນຊື່ສຽງຂອງໝູ່ເກາະນາມຢູ່ແຕ່ດົນນານມາແລ້ວ, ນ້ອງມີຄວາມຫວັງຢາກໄປຄົ້ນຫາທີ່ສຸດ. ເມື່ອໄປຮອດເກາະນາມຢູ່, ຄວາມປະທັບໃຈທຳອິດແມ່ນທິວທັດທຳມະຊາດທີ່ສວຍສົດງົດງາມທີ່ສຸດ, ນ້ຳທະເລຂຽວ, ໃສເຢັນ ແລະ ຢູ່ຫາດຊາຍທະເລມີ ແຖວຕົ້ນໝາກພ້າວຂຽວອຸ່ມທຸ່ມຍາວຢຽດສຸດສາຍຕາ. ນັ້ນັແມ່ນຈຸດທີ່ແຕກຕ່າງກັນເມື່ອທຽບໃສ່ເກາະແຫ່ງອື່ນໆ ”
ໃນວິວັດການຄົ້ນຫາເກາະຮ່ອນເລີ້ນ, ແນ່ນອນວ່າ ແຂກທ່ອງທ່ຽວຈະບໍ່ພາດໂອກາດແວ່ຢາມຫາດຊາຍເມັ້ນ ຊຶ່ງແມ່ນຫາດຊາຍທະເລທີ່ສວຍງາມກວ່າໝູ່ຢູ່ເກາະ. ນາງບີ້ງຕີ ແຂກທ່ອງທ່ຽວມາຈາກນະຄອນໂຮ່ຈິມິນຖືກວ່າ ຈະບໍ່ມີຫຍັງຈັບໃຈກວ່າເມື່ອໄດ້ອາບນ້ຳທະເລຢູ່ແຫ່ງນີ້. ນາງບີ້ງຕີ ເວົ້າວ່າ :
“ ເມື່ອໄປຮອດໝູ່ເກາະນາມຢູ່, ຄວາມປະທັບໃຈທຳອິດແມ່ນນ້ຳທະເລຂຽວທີ່ສຸດ, ອາກາດປອດໂປ່ງດີ. ພິເສດຢູ່ບັນດາຫາດຊາຍຂາວ, ໄດ້ອາບນ້ຳທະເລທີ່ຂຽວ ແລະ ໃສເຢັນກໍພາໃຫ້ແຂກຄົນທັງຫຼາຍເພີ່ມຄວາມສົດຊື່ນຫຼາຍຂຶ້ນ. ”
ເຂົ້າມາທ່ອງທ່ຽວຢູ່ ໝູ່ເກາະນາມຢູ່, ແຂກທ່ອງທ່ຽວຈະມີໂອກາດເກາະຕ່າງໆທີ່ງົດງາມຢູ່ເຂດທະເລທາງທິດຕາເວັນຕົກສ່ຽງໃຕ້ຂອງປະເທດຊາດເຊັ່ນ: ເກາະຮ່ອນນົ່ມງ່ວາຍ, ຮ່ອນນົ່ມຈອງ, ຮ່ອນເຢີມ, ຮ່ອນຮ່າງ, ຮ່ອນມົກ, ຮ່ອນແຈ, ຮ່ອນຍ່ານ… ຮ່ອນງາງ ແມ່ນສະຖານທີ່ທ່ອງທ່ຽວທີ່ດູດດື່ມໃນໝູ່ເກາະນາມຢູ່. ຢູ່ນີ້, ແຂກທ່ອງທ່ຽວມີໂອກາດໄດ້ຄົ້ນຫາໝູ່ບ້ານຊາວປະມົງ, ໄດ້ເຫັນການລ້ຽງປາໃນກະຊັງ, ໄດ້ຕືກປາ ແລະ ດຳນ້ຳຊົມປະກາລັງ. ນອກຈາກນັ້ນ, ແຂກທ່ອງທ່ຽວຈະໄດ້ເຊື່ອມຕົວເຂົ້າກັບການດຳລົງຊີວິດຂອງປະຊາຊົນຢູ່ແຫ່ງນີ້. ນາງ ເຢືອງທິເຝື້ອງ ແຂກທ່ອງທ່ຽວມາຈາກນະຄອນໂຮ່ຈິມິນ ໃຫ້ຮູ້ວ່າ :
“ ເປັນຄັ້ງທຳອິດທີ່ນ້ອງໄປທ່ອງທ່ຽວຢູ່ ໝູ່ເກາະນາມຢູ່. ນ້ອງຮູ້ສຶກວ່າ ນີ້ບໍ່ແມ່ນສະຖານທີ່ທ່ອງທ່ຽວຄື ຍາຈາງ. ມາທ່ອງທ່ຽວຢູ່ນາມຢູ, ບັນດາເພື່ອນອາດຈະໄດ້ດຳເນີນຊີວິດພ້ອມກັບຊາວທ້ອງຖິ່ນ. ນີ້ກໍແມ່ນຮູບແບບທ່ອງທ່ຽວຊຸມຊົນເພື່ອໃຫ້ແຂກຄົນທັງຫຼາຍ ເຂົ້າມາຢ້ຽມຊົມທັດສະນະສຶກສາ”
ມີເກາະອີກແຫ່ງໜຶ່ງທີ່ແຂກທ່ອງທ່ຽວມັກເຂົ້າມາທ່ອງທ່ຽວ, ນັ້ນແມ່ນຮ່ອນເມົ້າ. ຢູ່ນີ້ມີທິວທັດທຳມະຊາດທີ່ສວຍສົດງົດງາມກວ່າໝູ່ໃນ ໝູ່ເກາະນາມຢູ່. ຫຼີເທື່ອເລີ້ຍ, ຜູ້ນຳທ່ຽວສັງກັດບໍລິສັດຢູ່ນະຄອນໂຮ່ຈິມິນ ໃຫ້ຮູ້ວ່າ :
“ ໃນໝູ່ເກາະນາມຢູ່, ເກາະຮ່ອນເມົ້າ ແມ່ນສະຖານທີ່ໂດຍທຳມະຊາດເອື້ອອຳນວຍຄວາມສະດວກຫຼາຍກວ່າຫມູ່. ພຽງແຕ່ຫ່າງຈາກກັນ 10 ກິໂລແມັດເທົ່ານັ້ນ, ເບື້ອງໜຶ່ງແມ່ນຫາດດອນຫີນດຳ, ແລະ ອີກເບື້ອງໜຶ່ງແມ່ນຫາດຊາຍຂາວ. ນີ້ໄດ້ຮັບຖືວ່າ ແມ່ນບັນດາຫາດຊາຍງາມກວ່າໝູ່ຢູ່ເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ ”
ຄວາມງາມແບບຮົກເຮື້ອພ້ອມກັບຫາດຊາຍທະເລ, ດ້ວຍນ້ຳຂຽວ ແລະ ໃສເຢັນ ພ້ອມກັບອາຫານທະເລທີ່ແຊບນົວ, ຊາວທ້ອງຖິ່ນມີຈິດໃຈຮັກແພງແຂກຄົນນັ້ນ, ໝູ່ເກາະນາມຢູໃນປະຈຸບັນ, ແມ່ນສະຖານທີ່ທ່ອງທ່ຽວທີ່ດູດດື່ມສຳລັບໄວໜຸ່ມ. ໃນໂອກາດລະດູຮ້ອນປີນີ້, ບັນດາເພື່ອນຢາພາດໂອກາດແວ່ຢາມ ໝູ່ເກາະນາມຢູ່, ໄດ້ອາບນ້ຳທະເລຂຽວ ແລະ ໃສເຢັນ, ເຊື່ອແນ່ວ່າ ພວກເພື່ອນອາດຈະບໍ່ຫຼົງລືມໄດ້.