(vovworld) - ໃນບັນດາປື້ມຄູ່ມືແນະນຳລາຍການທ່ອງທ່ຽວຢ້ຽມຢາມຫວຽດນາມ, ຄຸ້ມເມືອງເກົ່າຮ່າໂນ້ຍ ຍາມໃດກໍແມ່ນການເລືອກເຟັ້ນຕົ້ນຕໍຂອງນັກທ່ອງທ່ຽວຫລາຍຄົນ. ຄຸ້ມເມືອງເກົ່າ ຮ່າໂນ້ຍ ແມ່ນບ່ອນເຕົ້າໂຮມຖະຫນົນ 36 ສາຍ ຊື່ງມີປະຫວັດຄວາມເປັນມາ ແລະ ວັດທະນະທຳມາເປັນເວລາຫລາຍປີ, ໃນນັ້ນມີຮ້ານຂາຍສິນຄ້າເປັນຈຳນວນຫລວງຫລາຍ. ເມື່ອໄປຢ້ຽມຢາມຄຸ້ມເມືອງເກົ່າຮ່າໂນ້ຍ, ນັກທ່ອງທ່ຽວໄດ້ຍ່າງເລາະຫຼິ້ນລຽບຕາມຖະຫນົນສາຍຕ່າງໆເພື່ອຊື້ເຄື່ອງຂອງ, ຊອກຮູ້ອາຊີບຫັດຖະກຳ, ຢ້ຽມຊົມບັນດາປູຊະນີຍະສະຖານປະຫວັດສາດ. ເຖິງວ່າໄດ້ຜ່ານຜ່າໃນຫລາຍສັດຕະວັດແລ້ວກໍຕາມ, ແຕ່ແບບແຜນການດຳລົງຊີວິດຂອງປະຊາຊົນຢູູ່ຄຸ້ມເມືອງເກົ່າຮ່າໂນ້ຍໄດ້ເຮັດໃຫ້ນັກທ່ອງທ່ຽວມີຄວາມຮູ້ສຶກເຖິງຈຸດວັດທະນະທຳທີ່ເປັນມູນເຊື້ອ, ກໍ່ຄືອາຊີບຫັດຖະກຳຂອງຊາວຮ່າໂນ້ຍໃນເມື່ອກ່ອນ. ບົດຂຽນຂອງນັກຂ່າວໂຕຕວນ. ຄຸ້ມເມືອງເກົ່າແລະຊີວິດປະຈຳວັນຂອງຊາວ ຮ່າໂນ້ຍ
ນັກທ່ອງທ່ຽວຕ່າງປະເທດມັກນັ່ງດື່ມເບຍຢູ່ສອງຟາກທາງ
photo: internet
|
ຄຸ້ມເມືອງເກົ່າຮ່າໂນ້ຍ ໄດ້ຮັບການກໍ່ສ້າງຂຶ້ນກ່ອນນີ້ນັບຮ້ອຍໆປີ ຢູ່ ທາງທິດຕາເວັນອອກຂອງພະລາຊະວັງ ທັງລອງໃນເມື່ອກ່ອນ. ຄຸ້ມເມືອງເກົ່າຮ່າໂນ້ຍລວມທັງລະບົບຮ່ອມທາງ, ຖະຫນົນນ້ອຍ ດ້ວຍບັນດາຫລັງຄາເຮືອນມຸ້ງດິນຂໍຕິດກັນຈາກຖະຫນົນສາຍນີ້ເຖິງຖະຫນົນສາຍອື່ນ. ໄລຍະຕົ້ນ, ຢູ່ທີ່ນີ້ແມ່ນບັນດາຖະຫນົນອາຊີບຫັດຖະກຳຄື: ຫລອມທອງແດງ, ຕີຄຳເງິນ, ຕີເຫລັກ, ຄ້າຂາຍແພໄຫມ…. ຜ່ານໄລຍະປະຫວັດສາດ, ຄຸ້ມເມືອງເກົ່າຮ່າໂນ້ຍຄ່ອຍໆໄດ້ຮັບການກໍ່ສ້າງດ້ວຍສະຖາປັດຕະຍະກຳທີ່ຕິດພັນກັບບັນດາຮີດຄອງປະເພນີແລະຊີວິດດ້ານວັດທະນະທຳທີ່ເປັນເອກະລັກສະເພາະ. ມາຮອດປະຈຸບັນ, ຊື່ຂອງຖະຫນົນແຕ່ລະສາຍລ້ວນແຕ່ເລີ່ມຕົ້ນດ້ວຍສັບ "ຮ່າງ", ມີຄວາມໝາຍພິເສດສຳລັບອາຊີບຫັດຖະກຳຄື: ຮ່າງເດືອງ (ຂາຍນ້ຳຕານ), ຮ່າງບາກ (ຂາຍເງິນ), ຮ່າງກາຍ (ຂາຍແພໄຫມ), ຮ່າງກວາດ (ຂາຍວີ)… ຢູ່ຄຸ້ມເມືອງເກົ່າ, ບັນດາຫລັງຄາເຮືອນທີ່ຕິດກັບຖະຫນົນລ້ວນແຕ່ເປີດຮ້ານຂາຍເຄື່ອງສິລະປະຫັດຖະກຳຫລືຮ້ານກິນດື່ມ. ປະຊາຊົນຢູ່ຄຸ້ມເມືອງເກົ່າຮ່າໂນ້ຍບາງຄົນກໍແມ່ນນາຍຊ່າງຜະລິດເຄື່ອງຫັດຖະກຳ ຫລື ຄ້າຂາຍບັນດາປະເພດສິນຄ້າທີ່ເປັນເອກະລັກສະເພາະດັ່ງກ່າວ. ເພາະສະນັ້ນ ເມື່ອຢ້ຽມຊົມຄຸ້ມເມືອງເກົ່າ, ບັນດາຄຸນຄ່າວັດທະນະທຳບໍ່ມີຮູບຮ່າງຍາມໃດກໍດຶງດູດນັກທ່ອງທ່ຽວ. ຄຸ້ມເມືອງເກົ່າກໍແມ່ນສະຖານທີ່ມີປູຊະນີຍະສະຖານຫລາຍແຫ່ງຄື: ວັດວາອາຮາມ, ສາລາບ້ານ, ວິຫານ, ຫໍບູຊາວົງຕະກຸນ… ພ້ອມດ້ວຍບັນດາງານບຸນປະເພນີທີ່ອຸດົມສົມບູນ. ສາດສະດາຈານ ໂງດືກທິ້ງ, ນັກຄົ້ນຄ້ວາວັດທະນະທຳພື້ນເມືອງໄດ້ໃຫ້ຂໍ້ສັງເກດວ່າ:
“ປະຈຸບັນ ເຖິງວ່າຢູ່ບາງຖະຫນົນອາຊີບຫັດຖະກຳ ເຂົາເຈົ້າບໍ່ຜະລິດອີກ, ແຕ່ຍັງຄົງຮັກສາຮ່ອງຮອຍຂອງຖະໜົນທີ່ເຮັດອາຊີບຫັດຖະກຳດ້ວຍສະຖາປັດຕະຍະກຳ ແລະ ວິຖີ ດຳລົງຊີວິດ.”
ສິ່ງທີ່ສ້າງຄວາມດຶງດູດນັກທ່ອງທ່ຽວເມື່ອໄປຢ້ຽມຢາມຄຸ້ມເມືອງເກົ່າ ນັ້ນແມ່ນໄປຮອດບ່ອນໃດກໍເຫັນຮູບພາບຂອງໝູ່ບ້ານອາຊີບ, ຖະຫນົນອາຊີບໃນເມື່ອກ່ອນ. ບັນດາເສັ້ນທາງນ້ອຍຊ້ອນກັນ, ຮ້ານຂາຍເຄື່ອງຖືກຕັ້ງຕິດຈອດກັນຢູ່ສອງພາກທາງ. ອ້າຍ ຫງວຽນຈູງກຽນ, ຊາວຖະຫນົນ ໂຕລິກ, ເປັນຊ່າງຄວັດແກະສະຫລັກໄມ້ຫັດຖະກຳໃຫ້ຮູ້ວ່າ:
“ປະຊາຊົນເຮັດອາຊີບຫັດຖະກຳຢູ່ທີ່ນີ້ຍັງຄົງມີການພົວພັນແບບວົງຕະກຸນ, ສະນັ້ນ, ໃນດຳລົງຊີວິດເຂົາເຈົ້າມີຄວາມສາມັກຄີ, ສະຫນິດສະຫນົມ. ເມື່ອຄອບຄົວໃດມີບັນຫາເກີດຂຶ້ນ, ຜູ້ຢູ່ໃນຖະຫນົນກໍ່ລ້ວນແຕ່ຮູ້ໝົດ.”
ຖະຫນົນຮ່າງກວາດ
ພາບ:internet
|
ນັກທ່ອງທ່ຽວຕ່າງປະເທດ ເມື່ອມາຢ້ຽມຢາມຄຸ້ມເມືອງເກົ່າ ລ້ວນແຕ່ຢາກຊອກຮູ້ກ່ຽວກັບປະຫວັດສາດ, ວັດທະນະທຳ ແລະ ໄດ້ເຫັນປະຈັກຕາຊີວິດປະຈຳວັນຂອງປະຊາຊົນຄຸ້ມເມືອງເກົ່າຮ່າໂນ້ຍ, ເຂົາເຈົ້າເຄີຍພັກຢູ່ບັນດາໂຮງແຮມນ້ອຍຢູ່ຖະຫນົນໃຈກາງ ຄື: ດີງລຽດ, ຮ່າງບາກ, ໝາໄມ ຫລື ຮ່າງຈົງ ເພື່ອມີຄວາມສະດວກໃນການຢ້ຽມຢາມຄຸ້ມເມືອງເກົ່າກໍຄືເຊື່ອມຕົວເຂົ້າກັບຊີວິດປະຈຳວັນຂອງປະຊາຊົນຢູ່ທີ່ນີ້. ໃນຍາມເຊົ້າ, ທ່ານສາມາດຮັບປະທານອາຫານເຊົ້າ, ດື່ມກາເຟຢູ່ລຽບຕາມຖະຫນົນແລ້ວ ຍ່າງເລາະຫຼິ້ນບັນດາຖະຫນົນຢູ່ຄຸ້ມເມືອງເກົ່າ. ເມື່ອຫິວແລ້ວ ທ່ານສາມາດເຂົ້າຮ້ານອາຫານຕ່າງໆຢູູ່ຄຸ້ມເມືອງເກົ່າເພື່ອຮັບປະທານອາຫານຫຼາຍເຍື່ອງຂອງອາຊີ, ເອີລົບ ຫລືອາຫານຫວຽດນາມກໍ່ໄດ້. ສ່ວນໃນຍາມແລງ, ນັກທ່ອງທ່ຽວຕ່າງປະເທດເຄີຍນັ່ງດື່ມເບຍສົດຫລືນ້ຳດື່ມປະເພດຕ່າງໆຢູ່ຮ້ານຄ້າແຄມຖະຫນົນເພື່ອຊົມເບິ່ງບັນຍາກາດຕາມທ້ອງຖະຫນົນ.
ເຖິງຢ່າງໃດກໍຕາມ, ຮູບການທ່ອງທ່ຽວຄຸ້ມເມືອງເກົ່າຮ່າໂນ້ຍຊື່ງນັກທ່ອງທ່ຽວ ນິຍົມກວ່າໝູ່ນັ້ນແມ່ນ ຢ້ຽມຊົມຄຸ້ມເມືອງເກົ່າດ້ວຍລົດສາມຫລໍ້(ຊີກໂລ) ຫລື ລົດໄຟຟ້າ. ອ້າຍ David Lowe ອາຍຸ 36 ປີ, ມາຈາກ ອັງກິດ ແບ່ງປັນວ່າ: ຂ້າພະເຈົ້າມັກຍ່າງເລາະຫຼິ້ນລຽບຕາມຖະຫນົນ. ພິເສດ ແມ່ນຄຸ້ມເມືອງເກົ່າຮ່າໂນ້ຍ, ຢູ່ທີ່ນີ້ມີຫລາຍສິ່ງຫລາຍຢ່າງພຽງແຕ່ໃຊ້ເວລາ 5 ນາທີ່ກໍສາມາດເຫັນໄດ້ໝົດ. ບັນຍາກາດຢູ່ຄຸ້ມເມືອງເກົ່າ ຮ່າໂນ້ຍໄດ້ສ້າງຄວາມປະທັບໃຈຫລາຍຢ່າງໃຫ້ແກ່ນັກທ່ອງທ່ຽວ.”
ສຳລັບຊາວຕ່າງປະເທດແລ້ວ ໄປຢ້ຽມຢາມຄຸ້ມເມືອງເກົ່າຮ່າໂນ້ຍແມ່ນຈຸດທີ່ເປັນເອກະລັກສະເພາະຢ່າງແທ້ຈິງ ແລະ ເຮັດໃຫ້ເຂົາເຈົ້າຮູ້ສຶກສະຫວາດສະເຫວີຍກວ່າ.