ເດືອນມີນາທຸກໆປີແມ່ນຍາມລະດູດອກບານເລີ່ມບານສະພັ່ງເອ້ຄວາມງາມໃນທົ່ວພູຜາປ່າໄມ້ເຂດພູສູງທາງທິດຕາເວັນຕົກສ່ຽງເໜືອຂອງປະເທດຫວຽດນາມ. ນີ້ກໍແມ່ນຊ່ວງເວລາທີ່ແຂວງດ້ຽນບຽນຈັດຕັ້ງງານບຸນດອກບານດ້ວຍຈຸດປະສົງເພື່ອເຊີດຊູ, ອະນຸລັກ, ເສີມຂະຫຍາຍບັນດາມໍລະດົກວັດທະນະທຳບັນດາເຜົ່າ, ຕິດພັນກັບການອະນຸລັກຮັກສາວັດທະນະທຳ, ເສີມຂະຫຍາຍທ່າແຮງບົ່ມຊ້ອນດ້ານການທ່ອງທ່ຽວຢູ່ເຂດທາງທິດຕາເວັນຕົກສ່ຽງເໜືອຫວຽດນາມ.
ງານບຸນດອກບານແມ່ນການເຄື່ອນໄຫວປະຈຳປີຂອງແຂວງດ້ຽນບຽນ |
ດອກບານແມ່ນດອກໄມ້ຊະນິດໜຶ່ງທີ່ງົດງາມທີ່ສຸດ ຊຶ່ງເຄີຍບານສະພັ່ງໃນຍາມລະດູບານໃໝ່. ໃນທຸກໆຕອນເຊົ້າ, ຂະນະທີ່ນ້ຳໝອກກົ້ວຍັງຄ້າງໄວ້ເທິ່ງ ຕົ້ນໄມ້, ໃບຫຍ້າ. ດອກບານໄດ້ບານສະພັ່ງໂດຍບໍ່ຫົວຊາຕໍ່ອາກາດໜາວຈັດທີ່ເຂດພູສູງ, ນີ້ຈຶ່ງເຫັນໄດ້ເຖິງພະລັງຊີວິດອັນແຮງກ້າຂອງດອກໄມ້ຊະນິດນີ້. ດອກບານໄດ້ຮັບຖືວ່າ ແມ່ນສັນຍາລັກທາງດ້ານວັດທະນະທຳ, ຈິດວິນຍານຂອງດິນແດນ ແລະ ມະນຸດເຂດພູສູງຊຶ່ງປະດ້ວຍແຂວງເຊີນລາ, ລາຍເຈົາ, ລາວກາຍ, ອຽນບ້າຍ, ຮ່ວາບີງ ແລະ ກາຍເປັນຄວາມເອກອ້າງທະນົງໃຈຂອງປະຊາຊົນບັນດາເຜົ່າໃນເຂດ. ດອກບານໄດ້ຮັບຖືວ່າ ແມ່ນດອກໄມ້ຊະນິດໜຶ່ງທີ່ງົດງາມທີ່ສຸດໃນເຂດທາງທິດຕາເວັນຕົກສ່ຽງເໜືອ, ໃນນັ້ນ ດ້ຽນບຽນແມ່ນໜຶ່ງໃນບັນດາທ້ອງຖິ່ນທີ່ມີດອກໄມ້ຊະນິດນີ້ຫຼາຍກວ່າໝູ່.
ຊຸມປີມໍ່ໆມານີ້, ພໍແດ່ມາຮອດຕົ້ນເດືອນມີນາ, ແຂວງດ້ຽນບຽນ ກໍໄດ້ຈັດຕັ້ງ ງານບຸນດອກບານຊຶ່ງຕິດພັນກັບການໂຄສະນາດ້ານການທ່ອງທ່ຽວທຳມະຊາດ, ຊາວທ້ອງຖິ່ນໃຫ້ແກ່ແຂກທ່ອງທ່ຽວທັງຢູ່ພາຍໃນ ແລະ ຕ່າງປະເທດ. ບັນດາການເຄື່ອນໄຫວຈຸດສຸມຂອງ ງານບຸນດອກບານດ້ຽນບຽນ 2017 ຖືກຈັດຂຶ້ນແຕ່ວັນທີ 11 ຫາວັນທີ 14/3 ຊຶ່ງຕິດພັນກັບວັນບຸນວັດທະນະທຳ-ກິລາ-ທ່ອງທ່ຽວແຂວງດ້ຽນບຽນຄັ້ງທີ 5 ດ້ວຍບັນດາການເຄື່ອນໄຫວອຸດົມສົມບູນ, ເປັນເອກະລັກ, ໃນນັ້ນ ພິທີໄຂງານບຸນ ແລະ ລາຍການສະແດງສິລະປະຈະຖືກຈັດຂຶ້ນໃນຕອນຄ່ຳວັນທີ 12/3 ຢູ່ສະໜາມຫຼວງ 7/5. ທ່ານ ເລວັນກຸຍ ຮອງປະທານຄະນະກຳມະການປະຊາຊົນແຂວງ ດ້ຽນບຽນ ໃຫ້ຮູ້ວ່າ :
“ ລາຍການໄຂງານບຸນ ໄດ້ສະແດງໃຫ້ເຫັນຈຸດທັນສະໄໝປະສານກັບສີສັນວັດທະນະທຳບັນດາເຜົ່າໃນແຂວງດ້ຽນບຽນ ແລະ ຕິດພັນກັບຄວາມງາມຂອງ ດອກບານ. ບັນດາການເຄື່ອນໄຫວໃນຂອບເຂດງານບຸນດອກບານ ແລະ ສັບປະດາວັດທະນະທຳ-ທ່ອງທ່ຽວຂອງດ້ຽນບຽນຖືກດຳເນີນແຕ່ວັນທີ 11 ຫາວັນທີ 15/3 ດ້ວຍການເຄື່ອນໄຫວຫຼາຍຢ່າງ. ໃນນັ້ນ, ມີບັນດາການເຄື່ອນໄຫວວັດທະນະທຳ-ກິລາ-ທ່ອງທ່ຽວຢູ່ບັນດາເມືອງ, ເທດສະບານ, ນະຄອນຕະຫຼອດຮອດບັນດາໝູ່ບ້ານ ເພື່ອແນະນຳຄວາມງາມທາງດ້ານວັດທະນະທຳທີ່ເປັນມູນເຊື້ອຂອງບັນດາຫົວໜ່ວຍຈັດຕັ້ງ ”
ງານບຸນດອກບານປີນີ້ ມີເນື້ອໃນສຳຄັນ 10 ປະການ, ຊຶ່ງຖືກຈັດຂຶ້ນຢູ່ສະຖານທີ່ຫຼາຍແຫ່ງໃນທົ່ວບໍລິເວນນະຄອນດ້ຽນບຽນຝູ ຄື : ງານວາງສະແດງວັດທະນະທຳທີ່ເປັນມູນເຊື້ອຂອງບັນດາເຜົ່າສ່ວນໜ້ອຍໃນແຂວງດ້ຽນບຽນ, ງານມະໂຫລານຂັບລຳທຳເພງພື້ນເມືອງ, ຟ້ອນ, ດົນຕີພື້ນເມືອງຂອງບັນດາເຜົ່າ; ລາຍການສະແດງສິລະປະໃນງານບຸນ, ພິທີກຳທາງດ້ານວັດທະນະທຳພື້ນເມືອງ. ທ່ານ ເລວັນກຸຍ ຮອງປະທານຄະນະກຳມະການປະຊາຊົນແຂວງ ດ້ຽນບຽນ ໃຫ້ຮູ້ວ່າ ດ້ຽນບຽນແມ່ນບ່ອນເຕົ້າໂຮມ ແລະ ດຳລົງຊີວິດຢູ່ຮ່ວມກັນຂອງ 21 ເຜົ່າ ແລະ ແຕ່ລະເຜົ່າກໍມີຈຸດພິເສດສະເພາະທາງດ້ານຮີດຄອງປະເພນີ, ວັດທະນະທຳ...ສິ່ງນີ້ສ້າງເປັນຮູບພາບຫຼາກຫຼາຍສີສັນໃຫ້ບັນດາການເຄື່ອນໄຫວຂອງງານບຸນປີນີ້. ທ່ານ ເລວັນກຸຍ ຮອງປະທານຄະນະກຳມະການປະຊາຊົນແຂວງ ດ້ຽນບຽນ ກ່າວວ່າ :
“ ງານບຸນປີນີ້, ພວກຂ້າພະເຈົ້າຈັດຕັ້ງການເຄື່ອນໄຫວໃໝ່ບາງຢ່າງ, ກ່ອນອື່ນໝົດແມ່ນງານປະກວດ “ ນາງງາມດອກບານ” ຊຶ່ງມີການເຂົ້າຮ່ວມຂອງບັນດານາງງາມທີ່ມາຈາກ 8 ແຂວງເຂດທາງທິດຕາເວັນຕົກສ່ຽງເໜືອ. ນີ້ແມ່ນການເຄື່ອນໄຫວເພື່ອໃຫ້ພວກຂ້າພະເຈົ້າແນະນຳກ່ຽວກັບດິນແດນ, ຊາວດ້ຽນບຽນ, ພ້ອມທັງແມ່ນໂອກາດເພື່ອໃຫ້ 8 ແຂວງເຂດທາງທິດຕາເວັນຕົກສ່ຽງເໜືອໄດ້ພົບປະແລກປ່ຽນ, ຖອດຖອນບົດຮຽນຊຶ່ງກັນ ແລະ ກັນໃນການພັດທະນາການທ່ອງທ່ຽວ. ຖັດຈາກນັ້ນ ແມ່ນຮອດການກະກຽມຈັດຕັ້ງສະເຫຼີມສະຫຼອງວັນໄຊຊະນະດ້ຽນບຽນຝູຄັ້ງປະຫວັດສາດເມື່ອວັນທີ 7/5. ນີ້ແມ່ນບັນດາການເຄື່ອນໄຫວວັດທະນະທຳເພື່ອເຊື້ອເຊີນແຂກທ່ອງທ່ຽວທັງຫຼາຍເຂົ້າມາດ້ຽນບຽນ ”
ມາຮ່ວມງານບຸນດອກບານ, ນອກຈາກໄດ້ເຂົ້າຮ່ວມບັນດາການເຄື່ອນໄຫວວັດທະນະທຳແລ້ວ, ແຂກທ່ອງທ່ຽວຈະໄດ້ຊິມລົດຊາດພິເສດຂອງບັນດາເຍື່ອງອາຫານຂອງພໍ່ແມ່ປະຊາຊົນບັນດາເຜົ່າໃນເຂດທາງທິດຕາເວັນຕົກສ່ຽງເໜືອ, ໃນນັ້ນມີອາຫານບາງເຍື່ອງທີ່ເຮັດດ້ວຍດອກບານ. ສຳລັບພໍ່ແມ່ພີນ້ອງເຜົ່າຜູ້ໄທຢູ່ເຂດທາງທິດຕາເວັນຕົກສ່ຽງເໜືອແລ້ວ, ດອກບານແມ່ນສິນພິເສດເພື່ອປຸງແຕ່ງເຍື່ອງອາຫານຍຳດອກບານທີ່ເປັນເອກະລັກຊຶ່ງມີຄົບລົດສົ້ມ, ເຜັດ, ຫວານ ແລະ ເຄັມ. ເພື່ອປຸງແຕ່ງເຍື່ອງອາຫານຍຳດອກບານໃຫ້ແຊບນັ້ນ, ແມ່ນຕ້ອງເຂົ້າໄປປ່າເພື່ອເດັດເອົາດອກບານມາເຮັດ, ເພາະດອກບານທີ່ເດັດມາຈາກປ່າ ແມ່ນມີລົດຫອມ ແລະ ຫວານພິເສດ. ນາງຫຼໍ່ທິຕ່ຽວແອງ, ຢູ່ບ້ານວັດທະນະທຳໜອງຈືນ, ຕາແສງນາມແທງ, ນະຄອນດ້ຽນບຽນຝູ, ແຂວງດ້ຽນບຽນ ໃຫ້ຮູ້ວ່າ:
“ ສຳລັບດອກບານ, ພໍ່ແມ່ພີນ້ອງເຜົ່າຜູ້ໄທສາມາດປຸງແຕ່ງອາຫານໄດ້ຫຼາຍເຍື່ອງ. ໃນນັ້ນ, ພວກຂ້າພະເຈົ້າມັກປຸງແຕ່ງທີ່ສຸດແມ່ນເຍື່ອງອາຫານຍຳດອກບານ. ເພາະວ່າລົດຫອມຂອງດອກບານ ປະສານກັບລົດຫອມຂອງຜັກ, ໜໍ່ໄມ້ຫຼາຍຊະນິດ”
ຊ່ວງເວລານີ້, ດອກບານເລີ່ມບານສະພັ່ງ . ສີບົວ ແລະ ສີຂາວຂອງດອກບານໄດ້ປົກຫຸ້ມໄປທົ່ວ 2 ຟາກທາງໄປດ້ຽນບຽນ. ມາຮ່ວມງານບຸນດອກບານໃນຊຸມວັນນີ້, ແຂກທ່ອງທ່ຽວຈະມີໂອກາດໄດ້ຄົ້ນຫາຄວາມງາມທີ່ໃຫຍ່ໂຕມະໂຫຖານຢູ່ເຂດພູຜາປ່າໄມ້ພູສູງທາງທິດຕາເວັນຕົກສ່ຽງເໜືອຂອງປະເທດຫວຽດນາມ, ໄດ້ຊິມລົດຊາດພິເສດຂອງບັນດາເຍື່ອງອາຫານທີ່ເຮັດດ້ວຍດອກບານ, ໄດ້ເຂົ້າຮ່ວມບັນດາການເຄື່ອນໄຫວວັດທະນະທຳທີ່ເຂັ້ມຂົ້ນໄປດ້ວຍສີສັນຂອງພໍ່ແມ່ປະຊາຊົນບັນດາເຜົ່າຢູ່ແຫ່ງນີ້ອີກດ້ວຍ.