ຕຶກ Bitexcoສັນຍາລັກຂອງຄວາມວັດທະນາຖາວອນ

ວັນອາທິດ ທີ 14 ມິຖຸນາ ຄ.ສ. 2015 | 16:49:35

(vovworld)- ຕຶກ Bitexco ຢູ່ໃຈກາງນະຄອນໂຮ່ຈິມີນ ໄດ້ຮັບການກໍ່ສ້າງຕາມຮູບດອກບົວ ແມ່ນສະຖານທີ່ດຶງດູດນັກທ່ອງທ່ຽວເປັນຈຳນວນຫລວງຫລາຍເມື່ອມາຢ້ຽມຢາມ ນະຄອນ ໂຮ່ຈິມີນ ໃນຊຸມປີມໍ່ໆມານີ້. ຕຶກ Bitexco ໄດ້ຮັບການຕີລາຄາວ່າແມ່ນກິດຈະກຳທີ່ເປັນເອກະລັກສະເພາະ ແມ່ນສັນຍາລັກຂອງຄວາມວັດທະນາຖາວອນຂອງນະຄອນ. ບົດຂຽນຂອງນັກຂ່າວ ໂຕຕວນ.

ຕຶກ Bitexcoສັນຍາລັກຂອງຄວາມວັດທະນາຖາວອນ - ảnh 1

ຕຶກ Bitexco Financial Tower
ພາບ:internet

ຕຶກ Bitexco Financial Tower ໄດ້ຮັບການກໍ່ສ້າງຢູ່ໃຈກາງເມືອງ 1 ນະຄອນໂຮ່ຈິມີນ. ຕຶກ ຫລັງນີ້ ມີເນື້ອທີ່ ເກືອບ 6.100 ຕາແມັດ ແລະ ຍອດຈຳນວນເງິນລົງທຶນ 400 ລ້ານ ໂດລາສະຫະລັດ. ຢູ່ ຊັ້ນ 50 ຂອງ ຕຶກ Bitexco ມີບ່ອນຈອດເຮືອບິນ ເອລີກອບແຕ. ແນວຄວາມຄິດອອກແບບ ຕຶກ Bitexco ແມ່ນຕາມຮູບແບບ ຕຸມດອກບົວທີ່ສວຍງາມ ຊື່ງແມ່ນສັນຍາລັກຂອງວັດທະນະທຳ ຫວຽດນາມ. ຜູ້ມີແນວຄວາມຄິດ ແລະ ຕັດສິນໃຈປະຕິບັດໂຄງການກໍ່ສ້າງ ຕຶກ Bitexco ນັ້ນແມ່ນ ທ່ານ ຫວູກວາງໂຮ້ຍ, ປະທານກຸຸ່ມບໍລິສັດ Bitexco Group, ເຈົ້າຂອງການລົງທຶນໂຄງການດັ່ງກ່າວ. ທ່ານ ໂຮ້ຍໃຫ້ຮູ້ວ່າ:

“ສິ່ງທີ່ພວກຂ້າພະເຈົ້າເອົາໃຈໃສ່ທີ່ສຸດ ແລະ ຫຍຸ້ງຍາກທີ່ສຸດ ນັ້ນແມ່ນການກໍ່ສ້າງ ຕຶກ ແຫ່ງຫນຶ່ງ ເພື່ອລົງທຶນດຳເນີນທຸລະກິດ ແຕ່ຕ້ອງແມ່ນກິດຈະກຳວັດທະນະທຳ. ນີ້ແມ່ນສິ່ງທີ່ຫຍຸ້ງຍາກຫລາຍ. ສະນັ້ນ ພວກຂ້າພະເຈົ້າໄດ້ເຊີນບັນດາຜູ້ຊ່ຽວຊານການກໍ່ສ້າງໃນໂລກມານີ້ເພື່ອປະຕິບັດໂຄງການດັ່ງກ່າວ, ສະເພາະ ຖັນແຖວນັກວິສາວະກອນກໍ່ສ້າງແມ່ນມາຈາກ ສ.ເກົາຫລີ. ຕຶກ ຫລັງນີ້ ຮັບປະກັນການເຄື່ອນໄຫວຕາມມາດຕະຖານຂອງອາຄານຊັ້ນສູງໃນໂລກ ເພື່ອຮັບໃຊ້ມະຫາຊົນກໍຄືແຂກທ່ອງທ່ຽວ.”

ກິດຈະກຳ ຕຶກ Bitexco Financial Tower ໄດ້ຮັບການກໍ່ສ້າງສຳເລັດແລະ ໄດ້ເປີດນຳໃຊ້ເມື່ອວັນທີ 31/10/2010 ແລະ ແມ່ນຫນຶ່ງໃນບັນດາອາຄານຫລາຍຊັ້ນກວ່າໝູ່ຢູ່ ຫວຽດນາມ, ຖັດຈາກ Keangnam Hanoi Landmark Tower ໄດ້ຮັບການກໍ່ສ້າງສຳເລັດເມື່ອປີ 2011. ໃນໄລຍະກໍ່ສ້າງສຳເລັດນັ້ນ, Bitexco Financial Tower ແມ່ນ ຕຶກ ຢືນອັນດັບທີ 110 ໃນໂລກ ແລະ ຕຶກ ແຫ່ງນີ້ ໄດ້ຮັບການຕີລາຄາຈາກ ຄະນະກຳມະການອາຄານຊັ້ນສູງຂອງ ອາເມລິກາ ວ່າ ແມ່ນຫນຶ່ງໃນຈຳນວນ ຕຶກ 10 ແຫ່ງທີ່ງາມກວ່າໝູ່ໃນໂລກ. ທ່ານ Zapata ຊາວອາເມລິກາ ແລະ ແມ່ນນັກສະຖາປະນິກຕົ້ນຕໍຂອງໂຄງການ ຖືວ່າ: ຕຶກແຫ່ງນີ້ໄດ້ຮັບການອອກແບບ ບໍ່ແມ່ນເພື່ອແກ້ງແຍ້ງກ່ຽວກັບຄວາມສູງເທົ່ານັ້ນ ຫາກສິ່ງສຳຄັນແມ່ນຈຸດພົ້ນເດັ່ນໃນການອອກແບບ ນັ້ນແມ່ນຮູບດອກບົວທີ່ສວຍງາມ ຊື່ງແມ່ນສັນຍາລັກຂອງວັດທະນະທຳຫວຽດນາມ ພ້ອມກັບບ່ອນຈອດເຮືອບິນ ເອລີກອບແຕ ດ້ວຍຮູບກຸບອັນຫນຶ່ງມີຄວາມງາມແບບເອກະລັກສະເພາະຂອງຫວຽດນາມ ຊື່ງບໍ່ມີຢູ່ກິດຈະກຳໃດໃນໂລກ. ຕາມການອອກແບບ, ຄວາມສູງຈາກຫນ້າດິນຈົນເຖິງຍອດ ຕຶກ ແມ່ນ 262 ແມັດ, ລວມມີ 68 ຊັ້ນ. ນອກນັ້ນ ຍັງມີຈຸດທີ່ເປັນເອກະລັກສະເພາະຫນຶ່ງອີກ ນັ້ນແມ່ນ ແຜ່ນແກ້ວປະດັບປະດາຢູ່ນອກອາຄານນັບພັນແຜ່ນ ລ້ວນແຕ່ແມ່ນນຳເຂົ້າຈາກປະເທດ ແບນຊິກ ແລະ ໄດ້ຮັບການຕິດຕັ້ງ ຢູ່ ສເກົາຫລີ, ໃນນັ້ນແກ້ວແຕ່ລະແຜ່ນລ້ວນແຕ່ມີຮູບແບບແຕກຕ່າງກັນ. ຢູ່ເບື້ອງໃນຂອງອາຄານ ມີເນື້ອທີ່ 37.700 ຕາແມັດ ແມ່ນສະຫງວນໃຫ້ຫ້ອງການມີຄຸນນະພາບສູງ, 11.000 ຕາແມັດ ແມ່ນສະຫງວນໃຫ້ສູນການຄ້າ, ບໍລິການ ແລະ ການບັນເທິງ. ເມື່ອເຂົ້າຢ້ຽມຢາມ ຕຶກ Bitexco Financial Tower, ລະບົບລິບທັນສະໄຫມຢູ່ທີ່ນີ້ ຈະພານັກທ່ອງທ່ຽວຂຶ້ນປ້ອມສັງເກດ “Saigon SkyDeck” ຢູ່ ຊັ້ນທີ 49 ເພື່ອສັງເກດທິວທັດທົ່ວນະຄອນນັບທັງກາງເວັນ ແລະ ກາງຄືນ. ອ້າຍ ໂດກວກເຫລ, ພະນັກງານຮັບໃຊ້ບໍລິການໃນຕຶກໃຫ້ຮູ້ວ່າ:

“ພ້ອມກັບຄວາມສູງທີ່ພົ້ນເດັ່ນຂອງ ຕຶກ, ປ້ອມສັງເກດຢູ່ທີ່ນີ້ຖືກຈັດເຂົ້າປື້ມຄູ່ມືທ່ອງທ່ຽວຂອງຫລາຍປະເທດໃນໂລກ, ຜ່ານນັ້ນ ເພື່ອນມິດສາກົນຮູ້ຈັກເຖິງນະຄອນໂຮ່ຈິມີນ ແລະ ຫວຽດນາມຫລາຍກວ່າ. ພິເສດ ເມື່ອຢ້ຽມຢາມ ຕຶກ ຫລັງນີ້ ນັກທ່ອງທ່ຽວໄດ້ຮັບຊົມທິວທັດທັງໝົດຂອງນະຄອນໂຮ່ຈິມີນ ແລະ ເຂົ້າໃຈຕື່ມອີກກ່ຽວກັບວິວັດການກໍ່ສ້າງ ຕຶກແຫ່ງນີ້. ກິດຈະກຳນີ້ ແມ່ນສະແດງໃຫ້ເຫັນວ່າ ຊາວຫວຽດນາມມີພູມປັນຍາ, ມີແຫລ່ງກຳລັງເພື່ອກໍ່ສ້າງ ຕຶກແຫ່ງຫນຶ່ງໃຫ້ທັດທຽມກັບລະດັບພັດທະນາຂອງບັນດາປະເທດໃນໂລກ.”

ຕຶກ Bitexcoສັນຍາລັກຂອງຄວາມວັດທະນາຖາວອນ - ảnh 2

ຕຶກ Bitexco Financial Tower ໃນຍາມຄ່ຳຄືນ
ພາບ:cafebiz.vn

ສັງເກດຈາກທາງໄກ, ຢືນຢູ່ທິດໃດ, ນັກທ່ອງທ່ຽວກໍລ້ວນແຕ່ເຫັນໄດ້ຕຶກ Bitexco ດ້ວຍຮູບດອກບົວທີ່ສວຍງາມ. ຢູ່ຊັ້ນສູງສຸດຂອງ ຕຶກ ໄດ້ຮັບການປະດັບປະດາໄຟແສງສີທີ່ສວຍງາມ ໃນຍາມຄ່ຳຄືນ. ໃນຊຸມມື້ວັນບຸນໃຫຍ່, ແສງສີ Laser ໄດ້ສ່ອງແສງສະຫວ່າງເຖິງລະບົບແກ້ວປະດັບປະດາອ້ອມຮອບ ຕຶກ ເຮັດໃຫ້ຮູບດອກບົວສວຍງາມຍິ່ງຂຶ້ນ. ໃນຊຸມປີມໍ່ໆມານີ້, ຕຶກ Bitexco Financial Tower ຍັງແມ່ນບ່ອນຍິງບັ້ງໄຟດອກໃນຊຸມມື້ບຸນເຕັດ, ວັນບຸນໃຫຍ່. ຮູບພາບສວຍງາມນັ້ນໄດ້ສ້າງຄວາມປະທັບໃຈໃຫ້ນັກທ່ອງທ່ຽວແຕ່ລະຄົນ ກ່ຽວກັບຄວາມວັດທະນາຖາວອນ, ການພັດທະນາຢ່າງແຮງຂອງນະຄອນໂຮ່ຈິມີນ ແລະ ປະເທດຫວຽດນາມໃນວິວັດການເຊື່ອມໂຍງເຂົ້າກັບສາກົນ.