(vovworld) - ແຕ່ລະມື້, ສະພາບແວດລ້ອມແຫ່ງການດຳລົງຊີວິດຂອງພວກເຮົາຕ້ອງຮັບເອົາຂີ້ເຫຍື້ອນັບຮ້ອຍໂຕນຈາກໂຮງໝໍຕ່າງໆ. ຖ້າບໍ່ໄດ້ຮັບການກຳຈັດໂດຍໄວ, ມັນຈະກໍ່ໃຫ້ເກີດພະຍາດ, ຂົ່ມຂູ່ເຖິງຊີວິດການເປັນຢູ່ຂອງປະຊາຊົນ. ນັ້ນກໍ່ແມ່ນສາຍເຫດທີ່ພາໃຫ້ທ່ານ Trinh Dinh Nang, ຢູ່ຕາແສງນົງເທື້ອງ, ເທດສະບານບັກກ້ານ, ແຂວງບັກກ້ານ, ຊອກຮູ້, ຄົ້ນຄ້ວາ ແລະ ປະດິດສ້າງລະບົບກຳຈັດຂີ້ເຫຍື້ອທາງການແພດ ດ້ວຍຍີ່ຫໍ້ HTL. ນີ້ແມ່ນຜະລິດຕະພັນທີ່ນຳມາເຊິ່ງປະສິດທິຜົນສູງທາງດ້ານເສດຖະກິດ, ບັນລຸຄຸນນະພາບແກ້ໄຂສິ່ງແວດລ້ອມສູງສຸດ ແລະ ໄດ້ຮັບໃບຢັ້ງຢືນປະດິດສ້າງຈາກກົມຊັບສິນທາງປັນຍາ, ສັງກັດກະຊວງວິທະຍາສາດ - ເຕັກໂນໂລຢີຫວຽດນາມ.
ທ່ານ Trinh Dinh Nang
ເຖິງວ່າພຽງແຕ່ໄດ້ຮັບການບຳລຸງສ້າງຢູ່ໂຮງຮຽນກຳມະກອນເຕັກນິກເຫຼັກກ້າຫວຽດບັກ ນັບແຕ່ຊຸມປີ 1970 ເທົ່ານັ້ນ, ແຕ່ຜ່ານຫຼາຍປີ, ດ້ວຍຄວາມເມົາມົວ, ຊອກຮູ້ໃນພຶດຕິກຳຕົວຈິງ, ທ່ານ Trinh Dinh Nang ຢູ່ເທດສະບາງບັກກ້ານ, ແຂວງບັກກ້ານ ພັດສາມາດປະດິດສ້າງອຸປະກອນທີ່ມີປະໂຫຍດຫຼາຍປະເພດຄື: ຈັກເຮັດປ້າຍລົດຈັກ; ບັນດາເຄື່ອງອາໄຫຼ່ກົນຈັກ, ຈັກສະກັດຄຳຈາກດິນ, ຫີນບົດ… ແລະ ຫວ່າງແລ້ວນີ້ແມ່ນລະບົບເຕົາເຜົາຂີ້ເຫຍື້ອທາງການແພດ . ທ່ານ Trinh Dinh Nang ໃຫ້ຮູ້ວ່າ:
”ຜ່ານການຊອກຮູ້ຕົວຈິງຢູ່ໂຮງໝໍຕ່າງໆ, ຂ້າພະເຈົ້າເຫັນວ່າຖ້າຫາກບໍ່ກຳຈັດຂີ້ເຫຍື້ອການແພດ ມັນຈະເປັນສິ່ງອັນຕະລາຍໃຫ້ແກ່ປະຊາຄົມ, ກໍ່ໃຫ້ເກີດພະຍາດ. ຍ້ອນເຫດນັ້ນ, ຂ້າພະເຈົ້າຈຶ່ງຄົ້ນຄ້ວາ ແລະ ປະດິດສ້າງເປັນລະບົບນີ້. ກ່ອນນີ້ເກືອບ 10 ປີ, ຂ້າພະເຈົ້າໄດ້ໃຊ້ເງິນຕົວເອງເພື່ອສ້າງສູນຄົ້ນຄ້ວາກ່ຽວກັບອຸນຫະພູມ. ຂ້າພະເຈົ້າທັງຄົ້ນຄ້ວາ, ປະດິດສ້າງ, ທັງຖອດຖອນບົດຮຽນຈາກການຄົ້ນຄ້ວາຂອງຕົນ. ສິ່ງສຳຄັນແມ່ນຕ້ອງມີຄວາມຮູ້, ພິເສດແມ່ນຄວາມຮູ້ຈາກພຶດຕິກຳກຳຕົວຈິງ”
ລະບົບກຳຈັດຂີ້ເຫຍື້ອການແພດຂອງທ່ານ Trinh Dinh Nang ແມ່ນລະບົບຄົບຊຸດ, ຖືກເຜົາຢ່າງລຽນຕິດ ແລະ ເຜົາດ້ວຍອຸປະກອນເຕັກໂນໂລຢີ Nano, ດັ່ງນັ້ນຈຶ່ງສາມາດເຮັດໃຫ້ຄວັນ, ຟຸ່ນ ແລະ ກິ່ນພິດທະລາຍໄປຢ່າງສິ້ນເຊີງ. ຈຸດເດັ່ນທີ່ສຸດນັ້ນແມ່ນ, ຂີ້ເຫຍື້ອຈະຖືກເຜົາໝົດກ້ຽງ. ໃນເວລາກຳລັງເຜົາ, ພວກເຮົາກໍ່ສາມາດຖິ້ມຂີ້ເຫຍື້ອເຂົ້າເຕົາໄດ້. ທ່ານ Trinh Dinh Nang ຢືນຢັນວ່າ:
”ນີ້ແມ່ນລະບົບສົມບູນ, ສາມາດຍົກຍ້າຍໄປບ່ອນອື່ນໄດ້. ເຕັກໂນໂລຢີໃໝ່ຂອງເຕົາເຜົານີ້ນັ້ນແມ່ນເຜົາດ້ວຍໄຟ, ຫາກບໍ່ແມ່ນດ້ວຍນ້ຳມັນຄືເຕົາອື່ນໆ. ອຸນຫະພູມສູງສຸດອາດຈະຂຶ້ນເຖິງ 1.800 ອົງສາ. ເວລາເຜົາກໍ່ໄວທີ່ສຸດ. ຂ້າພະເຈົ້າຫວັງວ່າຕ້ອງເຮັດແນວໃດທັງຫາເງິນລ້ຽງຊີບ, ທັງປະກອບສ່ວນຮັກສາສິ່ງແວດລ້ອມໃຫ້ແກ່ປະເທດຊາດໄດ້”.
ລະບົບກຳຈັດຂີ້ເຫຍື້ອທາງການແພດ
ຕາມການຕີລາຄາຂອງກະຊວງວິທະຍາສາດ ແລະ ເຕັກໂນໂລຢີແລ້ວ, ເຕົາເຜົາ ໂດຍທ່ານ Trinh Dinh Nang ປະດິດສ້າງນັ້ນ, ແມ່ນເຕົາເຜົາຂີ້ເຫຍື້ອການແພດທຳອິດຢູ່ຫວຽດນາມ ທີ່ບັນລຸມາດຖານຂອງກະຊວງຊັບພະຍາກອນ ແລະ ສິ່ງແວດລ້ອມ, ສາມາດປະຢັດເຊື້ອເພີງໄດ້ກວ່າ 80% ເມື່ອທຽບໃສ່ເຕົາເຜົາທີ່ນຳເຂົ້າຈາກຕ່າງປະເທດ. ໃນຂະນະນັ້ນ, ເມື່ອທຽບໃສ່ບັນດາເຕົາເຜົາຂອງອາເມລິກາ ແລະ ຍີ່ປຸ່ນ ຄ່າໃຊ້ຈ່າຍຂອງເຕົາເຜົານີ້ພັດຖືກກວ່າຫຼາຍ. ປະຈຸບັນ, ບໍລິສັດຂອງທ່ານ Trinh Dinh Nang ພວມຜະລິດບັນດາເຕົາເຜົາທີ່ມີຄວາມສາມາດເຜົາຂີ້ເຫຍື້ອໄດ້ແຕ່ 15 – 500 ກິໂລກຼາມ/ຊົ່ວໂມງ. ລະບົບກຳຈັດຂີ້ເຫຍື້ອນີ້ໄດ້ຮັບລາງວັນທີ 1 ໃນການເສັງປະດິດສ້າງດ້ານເຕັກນິກຂອງແຂວງບັກກ້ານ. ຕີລາຄາກ່ຽວກັບຜະລິດຕະພັນນີ້, ທ່ານ Do Tuan Khiem, ຫົວໜ້າພະແນກວິທະຍາສາດ - ເຕັກໂນໂລຢີແຂວງບັກກ້ານ, ໃຫ້ຮູ້ວ່າ:
”ລະບົບກຳຈັດຂີ້ເຫຍື້ອນີ້ເໝາະສົມກັບບ່ອນທີ່ມີຂີ້ເຫຍື້ອພໍສົມຄວນ, ເຕົາເຜົານີ້ນຳໃຊ້ບັນດາເຕັກໂນໂລຢີທີ່ກ້າວໜ້າ. ມີປະສິດທິພາບນຳໃຊ້ສູງ ແລະ ປະຢັດເຊື້ອເພີງ. ນີ້ແມ່ນບັນຫາທີ່ໄດ້ຮັບຄວາມສົນໃຈທີ່ສຸດ ເພື່ອຫຼຸດຜ່ອນລາຄາແລະຈຳກັດມົນລະພິດສິ່ງແວດລ້ອມ. ປະຈຸບັນ, ລະບົບກຳຈັດຂີ້ເຫຍື້ອນີ້ພວມໄດ້ຮັບການນຳໃຊ້ຢູ່ບາງໂຮງໝໍ ແລະ ໄດ້ຮັບການຕີລາຄາສູງທີ່ສຸດ”
ຜົນສຳເລັດຂອງລະບົບກຳຈັດຂີ້ເຫຍື້ອການແພດນີ້ ແມ່ນປະຖົມປັດໃຈ ເພື່ອໃຫ້ທ່ານ Trinh Dinh Nang ສືບຕໍ່ຄົ້ນຄ້ວາລະບົບກຳຈັດຂີ້ເຫຍື້ອຢູ່ບັນດາເຂດຕົວເມືອງ, ຮັບໃຊ້ໃຫ້ແກ່ການປົກປັກຮັກສາສິ່ງແວດລ້ອມ. ທ່ານ Trinh Dinh Nang ຫວັງວ່າ, ໃນໄລຍະໃກ້ໆນີ້, ຜະລິດຕະພັນດັ່ງກ່າວຈະໄດ້ຮັບການນຳໃຊ້ຢ່າງກວ້າງຂວາງຢູ່ຫວຽດນາມ ແລະ ສາມາດສົ່ງອອກຕ່າງປະເທດໄດ້.