(vovworld) - ຢູ່ນະຄອນໂຮ່ຈີມິນ, ມີກິດຈະກຳສະຖາປັດຕະຍະກຳແຫ່ງໜຶ່ງທີ່ເປັນຂີດໝາຍແຫ່ງປະຫວັດສາດ, ນັ້ນແມ່ນທຳນຽບ Thong Nhat (ເອກະພາບ), ເຊິ່ງກ່ອນນີ້ເອີ້ນວ່າ ທຳນຽບ Doc Lap (ເອກະລາດ), ແມ່ນສຳນັກງານຕົ້ນຕໍຂອງອຳນາດການປົກຄອງໄຊງ່ອນ. ວັນທີ 30/4/1975, ລົດຕັງຂອງທະຫານປົດປ່ອຍພາກໃຕ້ຫວຽດນາມ ໄດ້ບຸກເຂົ້າທຳນຽບເອກະລາບ, ຊັກ (ປັກ) ຄັນທຸງໄຊຊະນະເທິງດາດຟ້າທຳນຽບເອກະພາບ, ເພື່ອເປັນສັນຍານແຫ່ງສັງກາດໃໝ່, ພາກໃຕ້ໄດ້ຮັບການປົດປ່ອຍຢ່າງສົມບຸນ ແລະ ປະເທດຊາດໄດ້ຮັບການທ້ອນໂຮມເປັນເອກະພາບ
ທຳນຽບເອກະພາບ ແມ່ນກິດຈະກຳສະຖາປັດຕະຍະກຳທີ່ສວຍງາມ, ຕັ້ງຢູ່ໃຈກາງນະຄອນ ໂຮ່ຈິມິນ ໃນເນື້ອທີ່ 15 ເຮັກຕາ. ເຊິ່ງໄດ້ຮັບການກໍ່ສ້າງຕາມສະຖາປັດຕະຍະກຳປະສົມຂອງຝ່າຍຕາເວັນອອກ ແລະ ເອີລົບໃນສະຕະວັດທີ 18. ສະຖາປັດຕະຍະກຳທັງໝົດລ້ວນແຕ່ໄດ້ຮັບການປະຕິບັດຕາມເຈດຕະນາຂອງນັກສະຖາປານິກທີ່ມີຊື່ສຽງ Ngo Viet Thu ດ້ວຍຄວາມໝາຍເປັນສັນຍາລັກໃຫ້ເອກະລາດ, ອະທິປະໄຕຂອງປະເທດຊາດ, ສັນຕິພາບ, ວັດທະນາຖາວອນ… ສະຖາປັດຕະຍະກຳຍັງສະແດງໃຫ້ເຫັນຜ່ານການອອກແບບ, ການປະດັບປະດາໃນແຕ່ລະຫ້ອງ. ທຳນຽບມີທັງໝົດ 23 ຫ້ອງ, ແຕ່ລະຫ້ອງ, ລະບຽງ, ຂັ້ນໄດ… ລ້ວນແຕ່ໄດ້ຮັບການປະດັບປະດາຢ່າງກົມກຽວ, ລະອຽດລະອໍ. ໃນນັ້ນຫ້ອງຍື່ນສານຕາຕັ້ງແມ່ນຫ້ອງງາມທີ່ສຸດ, ດ້ວຍຮູບພາບໃຫຍ່ທີ່ປະກອບດ້ວຍຮູບພາບສີຂັດມັນນ້ອຍ 40 ແຜ່ນ, ທີ່ພັນລະນາກ່ຽວກັບຊີວິດສະຫົງບສຸກ, ພູຜາປ່າໄມ້ ແລະ ແມ່ນ້ຳລຳເຊທີ່ສວຍງາມຂອງຊາວຫວຽດນາມ ໃນສະຕະວັດທີ 15. ຫ້ອງໃຫຍ່ກວ່າໝູ່ຂອງທຳນຽບແມ່ນຫ້ອງໂຖງ. ເມື່ອມາຢ້ຽມຢາມທຳນຽບ, ນັກທ່ອງທ່ຽວຍັງໄດ້ທ່ຽວຊົມບັນດາກິດຈະກຳຂອງອຳນາດການປົກຄອງເກົ່າຄື: ຫ້ອງຂອງປະທານາທິບໍດີ, ຫ້ອງຮັບແຂກ, ຊັ້ນໃຕ້ດິນ, ເຊິ່ງແມ່ນແຫ່ງບໍລິຫານກົງຈັກສົງຄາມ. ທັງໝົດລ້ວນແຕ່ໄດ້ຮັບການຮັກສາໄວ້ຢ່າງເປັນລະບຽບຮຽບຮ້ອຍ. ປະຈຸບັນ, ແຕ່ລະມື້ມີນັກທ່ອງທ່ຽວມາຢ້ຽມຢາມນັບຮ້ອຍເທື່ອຄົນ. ເອື້ອຍ Bui Thi Hang, ພະນັກງານຄະນະຄຸ້ມຄອງປູຊະນີຍະສະຖານທຳນຽບເອກະພາບ, ໃຫ້ຮູ້ວ່າ
”ໃນຊຸມປີຜ່ານມາ, ຖັນແຖວພະນັກງານວິທະຍາສາດຂອງພວກຂ້າພະເຈົ້ານັບມື້ນັບເພີ່ມຂຶ້ນ. ພວກຂ້າພະເຈົ້າມີພາກສ່ວນຄົ້ນຄ້ວາ, ຮຽບຮຽງ, ຄຸ້ມຄອງຮັກສາ ເພື່ອເຮັດໃຫ້ປູຊະນີຍະສະຖານ ແລະ ວັດຖຸພັນຢູ່ທີ່ນີ້ມີຊີວິດຊີວາ”
ຢູ່ທຳນຽບເອກະພາບ, ບັນດານັກ ບັນຍາຍ ຍັງແນະນຳໃຫ້ນັກທ່ອງທ່ຽວມີຄວາມເຂົ້າໃຈກ່ຽວກັບໄລຍະທາງປະຫວັດສາດແຫ່ງສົງຄາມປະຕິວັດຫວຽດນາມ ແລະ ປະຫວັດສາດແຫ່ງບັ້ນຮົບ ໂຮ່ຈີມິນ ໃນຍາມລະດູບານໃໝ່ 1975 ຜ່ານຮູບພາບ, ວັດຖຸພັນທີ່ວາງສະແດງໃນທຳນຽບເອກະພາບ. ພິເສດ, ຢູ່ນອກທຳນຽບຍັງຄົງຮັກສາ ແລະ ວາງສະແດງລົດຕັງໝາຍເລກ 843 ໂດຍຫົວໜ້າກອງຮ້ອຍ, ຮ້ອຍເອກ Bui Quang Than ບັນຊາໄດ້ປັກທຸງຊາດເທິງດາດຟ້າທຳນຽບ, ແລະ ລົດຕັງ 390 ເຊິ່ງແມ່ນລົດຕັງທີ່ໄດ້ຕ່ຳໃສ່ປະຕູໂຂງໃຫຍ່ດ້ານໜ້າເພື່ອບຸກເຂົ້າທຳນຽບເອກະລາບໃນວັນໄຊຊະນະ 30/4/1975, ພ້ອມກັບເຮືອບິນໂດຍນັກວິລະຊົນກຳລັງປະກອບອາວຸດ Nguyen Thanh Trung ຂັບ ແລະ ຖີ້ມລະເບີດເຂົ້າທຳນຽບເອກະລາດ ໃນວັນທີ 8/4/1975.
ລົດຕັງທີ່ຕຳໃສ່ປະຕູໂຂງເພື່ອບຸກເຂົ້າທຳນຽບເອກະພາບ
(ພາບ: google.com.vn)
ເຖິງວ່າ ສົງຄາມໄດ້ລ່ວງເລີຍໄປເປັນເວລາ 37 ປີ ແລ້ວກໍ່ຕາມ, ແຕ່ເມື່ອມາຢ້ຽມຢາມທຳນຽບເອກະພາບນີ້, ນັກຮົບເກົ່າ Le Van Phuong, ທະຫານປືນໃຫຍ່ໃນລົດຕັງໝາຍເລກ 390 ດັ່ງກ່າວຍັງຄົງຮູ້ສຶກຕື້ນຕັນໃຈຢູ່
”ແຕ່ລະເທື່ອເມື່ອມານະຄອນໂຮ່ຈິມິນ, ໄດ້ສຳຜັດກັບປະຕູໂຂງເຫຼັກ ເຊິ່ງກ່ອນນີ້ຕົນເອງໄດ້ຕຳໃສ່ນັ້ນ, ຂ້າພະເຈົ້າຮູ້ສຶກຕື້ນຕັນໃຈຫຼາຍ. ຂ້າພະເຈົ້າຈື່ຈຳຊຸມເດືອນປີແຫ່ງການສູ້ຮົບອັນດຸເດືອດ, ດ້ວຍໄຊຊະນະອັນຍິ່ງໃຫຍ່. ປະຈຸບັນ, ເຖິງປະເທດຊາດໄດ້ມີສັນຕິພາບ, ປະຊາຊົນໄດ້ດຳລົງຊີວິດໃນຄວາມເສລີພາບກໍ່ຕາມ, ແຕ່ຂ້າພະເຈົ້າຍັງຄິດວ່າ, ເມື່ອປະເທດຊາດຕົກເຂົ້າສູ່ສະພາບອັນຕະລາຍ, ມູນເຊື້ອແຫ່ງຄວາມສາມັກຄີຕໍ່ສູ້ປົກປັກຮັກສາປະເທດຊາດຂອງປະຊາຊົນຈະສືບຕໍ່ໄດ້ຮັບການເສີມຂະຫຍາຍ”.
ປະຕູໂຂງທຳນຽບເອກະພາບ (ພາບ: google.com.vn)
ປະຈຸບັນ, ກິດຈະກຳທຳນຽບເອກະພາບຍັງຄົງໄດ້ຮັບການບຸລະນະຮັກສາຢ່າງສວຍງາມ ແລະ ໃຫຍ່ໂຕໂອໂຖງກວ່າເກົ່າ. ທ່ານ Bui Duc Huy ຜູ້ອຳນວຍການຄະນະຄຸ້ມຄອງປູຊະນີສະຖານທຳນຽບເອກະພາບ, ໃຫ້ຮູ້ວ່າ:
”ກ່ອນນີ້, ທຳນຽບແມ່ນອົງການບັນຊາການສູງສຸດຂອງລະບອບເກົ່າ, ປະຊາຊົນບໍ່ໄດ້ເຂົ້າ. ແຕ່ປະຈຸບັນ, ພາຍຫຼັງວັນພາກໃຕ້ໄດ້ຮັບການປົດປ່ອຍວັນທີ 30/4, ສິ້ນສຸດບັ້ນຮົບໂຮ່ຈີມິນດ້ວຍໄຊຊະນະປະຫວັດສາດນັ້ນ, ທຳນຽບໄດ້ກາຍເປັນສະຖານທີ່ທ່ຽວຊົມ, ແມ່ນຊັບສົມບັດຂອງປະຊາຊົນທຸກຄົນ. ດັ່ງນັ້ນ, ພວກຂ້າພະເຈົ້າຍິ່ງມີຄວາມຮັບຜິດຊອບໜ້າທີ່ປົກປັກຮັກສາ ເພື່ອເຮັດໃຫ້ປູຊະນີຍະສະຖານແຫ່ງນີ້ນັບມື້ນັບສວຍງາມ, ໃຫຍ່ໂຕໂອໂຖງກວ່າ ແລະ ສົມກັບຂອບຂະໜາດປະຫວັດສາດ”
ປະຈຸບັນທຳນຽບເອກະພາບ ທັງເປັນບ່ອນທ່ຽວຊົມຢ້ຽມຢາມ, ທັງເປັນບ່ອນຈັດການປະຊຸມ, ພິການທີ່ສົມກຽດຂອງລັດຖະບານ, ນະຄອນ ແລະ ເປັນບ່ອນຈັດກອງປະຊຸມ, ສຳມະນາ, ຕ້ອນຮັບແຂກຈາກພາຍໃນ ແລະ ຕ່າງປະເທດ ດ້ວຍບັນດາຫ້ອງປະຊຸມທີ່ຫຼູຫຼາ ສາມາດຮອງຮັບໄດ້ ແຕ່ 100ຫາ 500 ຄົນ. ເດີນເລາະຫຼິ້ນຕາມໃຕ້ຮົ່ມໄມ້ຂຽວງາມ, ແຂກທ່ອງທ່ຽວຈະຮູ້ສຶກວ່າຕົນເອງພວມກ້າວເຂົ້າສູ່ບັນຍາກາດທີ່ສະຫງົບງຽບ, ແຕ່ຢູ່ໃນຄວາມສະຫງົບງຽບນັ້ນພວກເຮົາຍັງເຫັນໄດ້ເຖິງຂີດໝາຍປະຫວັດສາດ, ມູນເຊື້ອການຕໍ່ສູ້ປະຕິວັດຂອງຊາດຫວຽດນາມ.