ໂດຍຖືກຕັ້ງຢູ່ທາງທິດຕາເວັນອອກສ່ຽງໃຕ້ຂອງເຂດທົ່ງພຽງແມ່ນ້ຳແດງ, ແຂວງນາມດິ້ງພວມອະນຸລັກ ແລະ ຮັກສາບັນດາຄຸນຄ່າວັດທະນະທຳພື້ນເມືອງທີ່ເປັນເອກະລັກສະເພາະ, ໃນນັ້ນ ມີບັນດາຮີດຄອງປະເພນີ, ການເຫຼືອມໃສ, ງານບຸນ, ໝູ່ບ້ານອາຊີບ, ປູຊະນີຍະສະຖານປະຫວັດສາດວັດທະນະທຳ… ນອກຈາກບັນດາຄູນຄ່າມໍລະດົກວັດທະນະທຳແລ້ວ, ນາມດິ້ງຍັງມີເງື່ອນໄຂເພື່ອພັດທະນາການທ່ອງທ່ຽວທຳມະຊາດ, ພິເສດແມ່ນການທ່ອງທ່ຽວທະເລ. ດິນແດນແຫ່ງນີ້, ຍາມໃດກໍຍິນດີຕ້ອນຮັບແຂກທ່ອງທ່ຽວທັງຢູ່ໃກ້ຫຼືໄກມາຄົ້ນຫາ ແລະ ທ່ຽວຊົມ.
ວັດໂກເລ້ໃນແຂວງນາມດີ້ງ |
ນາມດິ້ງຖືກຕັ້ງຢູ່ຫ່າງຈາກຮ່າໂນ້ຍປະມານ 100 ກມ. ເສັ້ນທາງຈາກຮ່າໂນ້ຍໄປນາມດິ້ງ ແມ່ນທາງດີ, ມີຄວາມສະດວກ ແລະ ທັນສະໄໝ, ດັ່ງນັ້ນແຂກທ່ອງທ່ຽວສາມາດໄປດ້ວຍລົດໄຟ, ລົດໂອໂຕຫຼືລົດຈັກ. ນາມດິ້ງແມ່ນດິນແດນທີ່ເຕັມໄປດ້ວຍສີສັນວັດທະນະທຳດ້ວຍຫຼາຍງານບຸນປະເພນີ. ນາມດິ້ງໃນປະຈຸບັນ, ມີປູຊະນີຍະສະຖານປະຫວັດສາດວັດທະນະທຳເກືອບ 4000 ແຫ່ງຊຶ່ງພົ້ນເດັ່ນແມ່ນວັດໂກເລ້, ວັດແກວແຮ່ງຖ້ຽນ, ເສົາທຸງ ນາມດິ້ງ…ນອກຈາກນັ້ນ, ກໍຍັງມີບັນດາປູຊະນີຍະສະຖານປະຫວັດສາດວັດທະນະທຳທີ່ຕິດພັນກັບບັນດາບຸລຸດຜູ້ທີ່ມີຊື່ສຽງຄື ປະລິນຍາເອກ ຫງວຽນຮ່ຽນ, ນັກກະວີຕູ້ເຊືອງ, ເຂດອະນຸສອນສະຖານອະດີດເລຂາທິການໃຫຍ່ພັກກອມມູນິດຫວຽດນາມ ເຈື່ອງຈິງ… ພ້ອມກັບບັນດາປູຊະນີຍະສະຖານປະຫວັດສາດວັດທະນະທຳນັ້ນ, ນາມດິ້ງຍັງມີກວ່າ 70 ຫມູ່ບ້ານອາຊີບຄືຫມູ່ບ້ານຄວັດສະຫຼັກໄມ້, ຫຼໍ່ທອງ, ຫມູ່ບ້ານຜະລິດເຄື່ອງຈັກສານ, ໝູ່ບ້ານປູກຕົ້ນໄມ້ປະດັບ. ທ່ານ ໂດ້ວູ້ເລີ້ຍ ສັງກັດສະຖາບັນສະຖາປັດຕະຍະກຳແຫ່ງຊາດ ໃຫ້ຮູ້ວ່າ :
“ ກ່ຽວກັບມໍລະດົກຢູ່ນາມດິ້ງ, ຈຸດພິເສດສະເພາະແມ່ນມໍລະດົກວັດທະນະທຳ ແລະ ທ່າແຮງແມ່ນການທ່ອງທ່ຽວຢູ່ຕາມວັດວາອາຮາມ. ຜ່ານໄລຍະປະຫວັດສາດນັບພັນປີ, ນາມດິ້ງໄດ້ກາຍເປັນແຫ່ງເຕົ້າໂຮມບັນດາກິດຈະກຳວັດທະນະທຳທີ່ມີຄຸນຄ່າພິເສດ, ນັ້ນແມ່ນບັນດາປູຊະນີຍະສະຖານໃນສະໄໝລາດຊະວົງຫຼີ, ເຈີນ, ເລ. ໃນອະນາຄົດອັນໃກ້ໆນີ້, ຖ້າຫາກປູຊະນີຍະສະຖານເຫຼົ່ານີ້ໄດ້ຮັບດານຂຸດຄົ້ນນັ້ນ, ຈະສົ່ງຜົນກະທົບຢ່າງໃຫຍ່ຫຼວງທາງດ້ານວັດທະນະທຳສັງຄົມຂອງແຂວງ ”
ສິ່ງທີ່ພົ້ນເດັ່ນໃນແຂວງນາມດິ້ງແມ່ນບັນດາຄຸນຄ່າທາງດ້ານປະຫວັດສາດ, ວັດທະນະທຳພື້ນເມືອງໃນສະໄໝລາດຊະວົງເຈີນ, ອັນໄດ້ສ້າງຮູບແບບການທ່ອງທ່ຽວວັດທະນະທຳຢູ່ຕາມວັດວາອາຮາມທີ່ອຸດົມສົມບູນ. ໂດຍຕິດພັນກັບເຂດດິນແທ່ງນາມນັ້ນ, ກໍຕ້ອງເຕື້ອງເຖິງບັນດາງານບຸນ ແລະ ບັນດາໝູ່ບ້ານອາຊີບທີ່ເປັນເອກະລັກສະເພາະ. ທ່ານ ຫງວຽນກົງເຄືອງ ຫົວໜ້າຂະແໜງວິຊາການທ່ອງທ່ຽວ, ພະແນກວັດທະນະທຳ, ກິລາ ແລະ ທ່ອງທ່ຽວແຂວງ ນາມດິ້ງ ໃຫ້ຮູ້ວ່າ :
“ ນາມດີ້ງແມ່ນບ້ານເກີດຂອງລາດຊະວົງເຈີນ. 750 ປີຄືນຫຼັງ, ລາດຊະວົງເຈີນໄດ້ສ້າງພາລະກິດຢູ່ເຂດດິນແທ່ງນາມ. ໃນເຂດດິນທີ່ເກົ່າແກ່ຂອງນາມດີ້ງທີ່ມີແຫຼ່ງຊັບພະຍາກອນທ່ອງທ່ຽວວັດທະນະທຳທີ່ອຸດົມສົມບູນ, ຫຼາຍຮູບຫຼາຍສີ. ໃນບໍລິເວນແຂວງ ກໍຍັງມີຫຼາຍງານບຸນຕິດພັນກັບປູຊະນີຍະສະຖານ, ງານບຸນຍາມຕົ້ນລະດູບານໃໝ່, ງານບຸນໝູ່ບ້ານອາຊີບ. ເຂົ້າຮ່ວມງານບຸນຢູ່ນາມດີ້ງ, ແຂກທ່ອງທ່ຽວຈະໄດ້ເຫັນບັນດາລາຍການສະແດງສິລະປະຄື ການສະແດງລະຄອນຕຸກກະຕານ້ຳ, ບຸນຈັບເປັດ…ມາທ່ອງທ່ຽວຢູ່ນາມດີ້ງ, ແຂກທ່ອງທ່ຽວຍັງໄດ້ໄປທັດສະນະສຶກສາຢູ່ບັນດາໝູ່ບ້ານອາຊີບຫັດຖະກຳອີກດ້ວຍ ”
ນາມດີ້ງມີຝັ່ງທະເລຍາວ 72 ກມດ້ວຍບັນດາຫາດຊາຍທະເລໄດ້ຮັບການຂຸດຄົ້ນ, ກໍ່ສ້າງເປັນບັນດາເຂດທ່ອງທ່ຽວທະເລທີ່ດູດດື່ມຄື ທີ້ງລອງ, ເມືອງຫາຍເຫົ້າ, ກ໋ວດເລີມ, ເມືອງຢາວຖີ. ພິເສດ, ເຂດປ່າສະຫງວນແຫ່ງຊາດ ຊວນຖີ ດ້ວຍລະບົບນິເວດວິທະຍາ ປ່າຊາຍເລນ ຊຶ່ງແມ່ນບ່ອນເຕົ້າໂຮມຝູງນົກອົບພະຍົບ. ນີ້ແມ່ນສະຖານທີ່ທ່ອງທ່ຽວທີ່ດູດດື່ມສຳລັບແຂກທ່ອງທ່ຽວ. ທ່ານ ຫງວຽນຟຸກໂຫ້ຍ ຮອງຜູ້ອຳນວຍການເຂດປ່າສະຫງວນແຫ່ງຊາດ ຊວນຖີ ໃຫ້ຮູ້ວ່າ :
“ເຂດປ່າສະຫງວນແຫ່ງຊາດ ຊວນຖີມີຈຸດພິເສດແມ່ນ ປ່ານ້ຳຖ້ວມ, ນອນຢູ່ປາກແມ່ນ້ຳ ແຄມທະເລ. ລະບົບນິເວດວິທະຍາມີຈຸດພິເສດສະເພາະແມ່ນລະບົບວິເວດນ້ຳຖ້ວມທີ່ເປັນຕົວແບບຂອງເຂດພາກເໜືອຫວຽດນາມ ແຄມທະເລ ຊຶ່ງລວມທັງບັນດາເຂດປ່າຊາຍເລນ, ໜອງບຶງ, ເກາະດອນ…”
ເຂົ້າມາທ່ອງທ່ຽວຢູ່ນາມດີ້ງ, ແຂກທ່ອງທ່ຽວຈະໄດ້ທ່ຽວຊົມຢູ່ເຂດວັດທະນະທຳອາຫານການກິນພິເສດສະເພາະ ດ້ວຍອາຫານຫຼາຍເຍື່ອງ, ສິນພິເສດທີ່ມີຊື່ສຽງ, ອັນໄດ້ສ້າງເປັນເຄື່ອງໝາຍການຄ້າໃຫ້ແກ່ເຂດດິນແທ່ງນາມຄື ເຝີນາມດີ້ງ, ປັນກວນ ບ້ານເກັງ, ເຂົ້າໜົມຖົ່ວດິນ ຊີ່ວເຈົາ….ນອກຈາກນັ້ນ, ນາມດີ້ງຍັງມີຫຼາຍສິ່ງຫຼາຍຢ່າງທີ່ເປັນໜ້າຈັບໃຈ ພວມຄ່ອຍຖ້າແຂກທ່ອງທ່ຽວມາຢ້ຽມຊົມ, ທັດສະນະສຶກສາ.