ຟູ້ກ໋ວກ, ກຽນຢາງ ບໍ່ພຽງແຕ່ມີຄວາມງາມທາງດ້ານທິວທັດທຳມະຊາດເທົ່ານັ້ນ, ຫາກຍັງມີບັນດາຜະລິດຕະພັນພິເສດຄື: ນ້ຳປາ, ໝາກພີກໄທ, ເຫຼົ້າ….ອີກດ້ວຍ. ບັນດາຜະລິດຕະພັນທີ່ມີເຄື່ອງໝາຍຂອງຟູ້ກ໋ວກເອງນີ້ ໄດ້ປະກອບສ່ວນດຶງດູດແຂກທ່ອງທ່ຽວເຂົ້າມາທ່ອງທ່ຽວຢູ່ເກາະທີ່ງົດງາມນີ້ນັບມື້ນັບຫຼາຍຂຶ້ນ.
ຫາດຊາຍທະເລຢູ່ຟູ້ກ໋ວກທີ່ສວຍສົດງົດງາມ |
ເຂົ້າມາທ່ອງທ່ຽວຢູ່ຟູ້ກ໋ວກ, ກຽນຢາງ, ນອກຈາກຄວາມງາມຂອງທະເລແລ້ວ, ຮາກຖານຜະລິດນ້ຳປາກໍແມ່ນສະຖານທີ່ດຶງດູດແຂກທ່ອງທ່ຽວ. ການຜະລິດນ້ຳປາຢູ່ເມືອງເກາະ ຟູ້ກ໋ວກ ແມ່ນອາຊີບທີ່ມີມາແຕ່ດົນນານ, ຊຶ່ງມີມາກ່ອນນີ້ປະມານ 200 ປີ. ຜະລິດຕະພັນນ້ຳປາ ຟູ້ກ໋ວກ ແມ່ນມີຄຸນນະພາບ ແລະ ມີຊື່ສຽງທັງຢູ່ພາຍໃນ ແລະ ຕ່າງປະເທດ. ແຂກທ່ອງທ່ຽວເມື່ອມາຢ້ຽມຊົມ ຈະເຫັນປະຈັກຕາບັນດາຂັ້ນຕອນຜະລິດນ້ຳປາຢູ່ຮາກຖານແຫ່ງນີ້. ທ່ານນາງ ໂຮ່ກິມລຽນ ເຈົ້າຂອງບໍລິສັດນ້ຳປາ ຂາຍຮ່ວານ, ຟູ້ກ໋ວກ ໃຫ້ຮູ້ວ່າ:
“ ນ້ຳປາຟູ້ກ໋ວກ ແມ່ນຜະລິດຕາມບັນດາຂັ້ນຕອນທີ່ມີມາແຕ່ດົນນານ. ຖ້າຫາກຄິດໄລ່ທາງດ້ານມູນຄ່າ ແລະ ວົງວຽນເສດຖະກິດ, ເມື່ອທຽນໃສ່ດ້ານການທ່ອງທ່ຽວນັ້ນ, ປະສິດທິຜົນທາງດ້ານເສດຖະກິດແມ່ນບໍ່ສູງ, ແຕ່ນັ້ນແມ່ນໝູ່ບ້ານອາຊີບທີີ່ມີມາແຕ່ດົນນານຂອງປູຍ່າຕາຍາຍປະໄວ້ໃຫ້. ກະໂຕຂ້າພະເຈົ້າເອງ, ກໍມີຄວາມເອກອ້າງທະນົງໃຈທີ່ສຸດເພື່ອເສີມຂະຫຍາຍໝູ່ບ້ານອາຊີບນີ້, ເຖິງວ່າ ຜົນກຳໄລບໍ່ສູງ. ບໍລິສັດຂາຍຮ່ວານ ຍາມໃດກໍຍົກສູງຄຸນນະພາບຜະລິດຕະພັນເພື່ອຮັບໃຊ້ຜູ້ບໍລິໂພກທັງຢູ່ພາຍໃນ ແລະ ຕ່າງປະເທດ. ນີ້ກໍຖືກຖືວ່າແມ່ນຄວາມເອກອ້າງທະນົງໃຈຂອງຊາວຟູ້ກ໋ວກ ”
ເກາະຟູ້ກ໋ວກ ແມ່ນແຫ່ງທີ່ມີເຂດສວນໝາກພີກໄທທີ່ກ້ວາງໃຫຍ່ກວ່າໝູ່ໃນເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ ໂດຍປູກແບບລວມສູນ ແລະ ມີຄຸນນະພາບສູງກວ່າເມື່ອທຽບໃສ່ໝາກພີກໄທປູກຢູ່ແຫ່ງອື່ນໆ. ບັນດາເນື້ອທີ່ໝາກພີກໄທຍາມໃດກໍຖືກນຳເຂົ້າບັນຊີລາຍຊື່ບັນດາສະຖານທີ່ທ່ອງທ່ຽວສຳລັບບັນດາສາຍທ່ອງທ່ຽວຍາມລະດູແລ້ງຢູ່ຟູ້ກ໋ວກ. ໝາກພີກໄທແມ່ນສິນພິເສດສຳລັບແຂກທ່ອງທ່ຽວ. ເມື່ອເຂົ້າໄປສວນໝາກພີກໄທຟູ້ກ໋ວກ, ແຂກທ່ອງທ່ຽວທັງຫຼາຍ ລ້ວນແຕ່ມີຄວາມປະທັບໃຈ. ທ່ານ ວີຊັງ ແຂກທ່ອງທ່ຽວຊາວຝະລັ່ງໃຫ້ຮູ້ວ່າ :
“ ຂ້າພະເຈົ້າໄດ້ຍິນກ່ຽວກັບ ໝາກພີກໄທຢູ່ຟູ້ກ໋ວກແມ່ນມີຊື່ສຽງ ແລະ ຂ້າພະເຈົ້າເອງ ກໍມັກລົດຊາດຂອງ ໝາກພີກໄທຢູ່ນີ້ທີ່ສຸດ, ເພາະມັນມີຄຸນນະພາບ ແລະ ລົດຫອມພິເສດ. ຂ້າພະເຈົ້າຈະຊື້ ໝາກພີກໄທເມືອເປັນຂອງຕ້ອນໝູ່ເພື່ອນ ແລະ ຂ້າພະເຈົ້າຈະແນະນຳວ່າ ນີ້ແມ່ນ ໝາກພີກໄທຟູ້ກ໋ວກຂອງຫວຽດນາມ ”
ຊາວຟູ້ກ໋ວກໄດ້ເກັບກູ້ໝາກພີກໄທຢູ່ນີ້ເປັນແຕ່ລະງວດ ແລະ ຖືກເກັບກູ້ດ້ວຍມື. ທ່ານ Ruffino ແຂກທ່ອງທ່ຽວຊາວຝະລັ່ງ ເວົ້າວ່າ :
“ ຂ້າພະເຈົ້າໂຊກດີທີ່ມີໂອກາດໄດ້ມານີ້ ແລະ ສາມາດຮູ້ຈັກໄດ້ເຖິງ ໝາກພີກໄທຊະນິດຕ່າງໆ. ຂ້າພະເຈົ້າເອງ, ມັກລົດຊາດຂອງ ໝາກພີກໄທທີ່ສຸດ ແລະ ເມື່ອມານີ້, ບໍ່ພຽງແຕ່ໄດ້ເຫັນສີ ແລະ ຊະນິດໝາກພີກໄທຕ່າງໆເທົ່ານັ້ນ, ຫາກຍັງໄດ້ຮູ້ຈັກກ່ຽວກັບວິທີນຳໃຊ້ ໝາກພີກໄທເພື່ອປຸງແຕ່ງເຍື່ອງອາຫານຕ່າງໆອີກດ້ວຍ ”
ພ້ອມກັບນ້ຳປາ, ໝາກພີກໄທນັ້ນ, ບັນດາຜະລິດຕະພັນທີ່ປຸງແຕ່ງຈາກໝາກຊິມຢູ່ຟູ້ກ໋ວກ ໄດ້ກາຍເປັນຂອງຂວັນພິເສດຂອງແຂກທ່ອງທ່ຽວທັງຫຼາຍ. ແລະ ໃນຂອບເຂດການເດີນທາງທ່ອງທ່ຽວຢູ່ຟູ້ກ໋ວກ, ແຂກທ່ອງທ່ຽວກໍລ້ວນແຕ່ມັກແວ່ຢາມສວນໝາກຊິມຕ່າງໆ ແລະ ຊອກຮູ້ກ່ຽວກັບບັນດາຂັ້ນຕອນຜະລິດບັນດາຜະລິດຕະພັນທີ່ປຸງແຕ່ງຈາກໝາກຊິມ. ທ່ານຫງວຽນແທງເຊີນ ເຈົ້າຂອງສວນຊິມຢູ່ຟູ້ກ໋ວກໃຫ້ຮູ້ວ່າ :
“ ປະຈຸບັນ, ບັນດາຜະລິດຕະພັນທີ່ປຸງແຕ່ງຈາກໝາກຊິມ ກໍແມ່ນທ່າແຮງຂອງຟູ້ກ໋ວກ. ໝາກຊິມໃນປະຈຸບັນ ແມ່ນສາມາດຜະລິດເຫຼົ້າແວງ, ຊາ, ກວນຊິມ… ບັນດາຜະລິດຕະພັນທີ່ປຸງແຕ່ງຈາກໝາກຊິມແມ່ນອາຫານທີ່ມີທາດບຳລຸງດີ ”
ເມື່ອລາຈາກຟູ້ກ໋ວກ, ແຂກທ່ອງທ່ຽວທັງຫຼາຍ ກໍລ້ວນແຕ່ຄິດຮອດຄິດເຖິງບັນດາຫາດຊາຍທະເລຂາວຍາມຢຽດສຸດສາຍຕາ, ທະເລຂຽວ ແລະ ໃສເຢັນ ພ້ອມກັບບັນດາເຍື່ອງອາຫານພິເສດ. ແຂກທ່ອງທ່ຽວທຸກໆຄົນລ້ວນແຕ່ຊື້ເອົາຜະລິດຕະພັນທ່ອງທ່ຽວບາງຢ່າງ ເມືອເປັນຂອງຕ້ອນໝູ່ເພື່ອນ ແລະ ຍາດພີນ້ອງ.