vovworld)- ໂດຍຫ່າງຈາກນະຄອນຮ່າຢາງ ປະມານ 2 ກິໂລແມັດ, ບ້ານທາ ຂອງຊາວເຜົ່າໄຕ ມີຄວາມງາມແບບທຳມະຊາດ ແລະ ດຶງດູດນັກທ່ອງທ່ຽວມາຢ້ຽມຢາມເປັນຈຳນວນຫລວງຫລາຍ. ບ້ານທາ ແມ່ນເຂດບ້ານນາຢູ່ເຂດພູດອຍ ທີ່ສະຫງົບສຸກ ດ້ວຍເຮືອນຮ້ານ, ນາຂັ້ນໄດ, ຕົ້ນໄມ້ໄຜ່ທີ່ຂຽວອຸ່ມທຸ່ມ ພ້ອມດ້ວຍບັນດາຈຸດວັດທະນະທຳທີ່ເປັນເອກກະລັກສະເພາະຂອງຊາວເຜົ່າໄຕ ຢູ່ ຮ່າຢາງ. ມາຢ້ຽມຢາມບ້ານທາ, ນັກທ່ອງທ່ຽວ ຢາກມີພົວພັນແລກປ່ຽນ ແລະ ຊອກຮູ້ແບບແຜນການດຳລົງຊີວິດ, ຈຸດວັດທະນະທຳຂອງ ຊາວທ້ອງຖິ່ນ ຄວນເລືອກເຟັ້ນບໍລິການ Homestay.
ບ້ານທາ
|
ກົງກັນຂ້າມກັບບັນດາບ້ານທີ່ຕັ້ງຢູ່ແຄມເນີນພູຫີນທີ່ໃຫຍ່ໂຕມະໂຫຖານ, ຫຼຽວເບິ່ງບ່ອນໃດກໍ່ມີແຕ່ຫີນ, ສ່ວນບ້ານທາແມ່ນບ້ານຫນຶ່ງທີ່ມີທິວທັດທຳມະຊາດສວຍງາມເຕັມໄປດ້ວຍສີຂຽວຂອງທົ່ງນາ, ສວນໝາກຄໍ້ ບັນຍາກາດຢູ່ ບ້ານທາ ແມ່ນສະຫງົບງຽບທີ່ສຸດ, ບໍ່ມີສຽງດົນຕີ, ສຽງລົດແລ່ນໄປ-ມາ, ເມື່ອໄປຮອດຫົວບ້ານ ໄດ້ຍິນແຕ່ສຽງນ້ຳໄຫຼຢູ່ກ້ອງຄອງເໝືອງນ້ອຍຕະຫລອດເວັນ ແລະ ຄືນ. ນອກນັ້ນ ບ້ານທາ ຖືກຕັ້ງຢູ່ຮ່ອມພູ, ອ້ອມຮອບແມ່ນປ່າໄມ້ທີ່ຂຽວອຸ່ມທຸ່ມ, ມີນ້ຳໝອກປົກຄຸມຕະຫລອດ ປີ. ບໍ່ພຽງແຕ່ເທົ່ານັ້ນ ບ້ານທາ ແມ່ນບ້ານຫນຶ່ງ ຍັງຄົງຮັກສາບັນດາຄຸນຄ່າວັດທະນະທຳທີ່ເປັນມູນເຊື້ອຂອງຊາວເຜົ່າໄຕຢູ່ ຮ່າຢາງ. ພົ້ນເດັ່ນແມ່ນບັນດາເຮືອນຮ້ານໄດ້ຮັບການຮັກສາຈຸດດັ້ງເດີມໄວ້. ໂດຍຫ່າງຈາກນະຄອນ ຮ່າຢາງ ດ້ວຍໄລຍະທາງບໍ່ຍາວປານໃດ ແຕ່ບ້ານທາແມ່ນເຂດບ້ານນາທີ່ສະຫງົບງຽບ, ບໍ່ມີອາຄານຊັ້ນສູງ, ລົດແລ່ນໄປ-ມາກໍບໍ່ຫລາຍ. ເມື່ອຖາມຊາວບ້ານວ່າ ເປັນຫຍັງບໍ່ປຸກສ້າງເຮືອນເບຕົງເພື່ອໃຫ້ໄດ້ຢູ່ ອາໄສສະດວກກວ່າ, ຜູ້ເຖົ້າຜູ້ແກ່ຕະຫລອດຮອດເດັກນ້ອຍໃນບ້ານ ຜູ້ໃດກໍໃຫ້ຄຳຕອບເຊັ່ນດຽວກັນກັບອ້າຍ ຫງວຽນວັນເທືອງ ວ່າ:
“ເຮືອນຮ້ານ ແມ່ນສີສັນຂອງຊົນເຜົ່າຕົນ ສະນັ້ນ ປະລະບໍ່ໄດ້ ແລະ ຕ້ອງໄດ້ສືບຕໍ່ຮັກສາໄວ້. ເຮືອນເບຕົງ ພວກຂ້າພະເຈົ້າ ບໍ່ມັກຢູ່, ມີແຕ່ມັກຢູ່ເຮືອນຮ້ານເທົ່ານັ້ນ. ປະຈຸບັນ ລາຍຈ່າຍເພື່ອປຸກສ້າງເຮືອນຮ້ານຫລັງຫນຶ່ງ ແມ່ນ 300 ລ້ານດົງ. ເຮືອນຮ້ານແມ່ນກວ້າງກວ່າ, ເຢັນກວ່າ. ໃນຍາມລະດູຮ້ອນບໍ່ຮູ້ສຶກຮ້ອນຄືຢູ່ເຮືອນເບຕົງ.”
ນາຂັ້ນໄດຢູ່ ຮ່າຢາງ
|
ໄປຍ່າງຫລິ້ນຢູ່ອ້ອມແອ້ມບ້ານທາ, ສູບອາກາດປອດໂປ່ງ, ນັກທ່ອງທ່ຽວຈຶ່ງເຫັນໄດ້ຄວາມງາມສະເພາະຢູ່ທີ່ນີ້. ບັນດາຄອບຄົວຊາວເຜົ່າໄຕລ້ວນແຕ່ແມ່ນຜູ້ຮັກແພງແຂກຄົນ ແລະ ສະຫນິດສະຫນົມທີ່ສຸດ ຍາມໃດກໍພ້ອມແລ້ວທີ່ຈະຕ້ອນຮັບແຂກ ມາຈາກທຸກສາລະທິດເຂົ້າຢ້ຽມຢາມເຮືອນຂອງຕົນ. ຊາວເຜົ່າໄຕ ຢູ່ ບ້ານທາ ຍັງຄົງຮັກສາອາຊີບຕ່ຳແຜ່ນແພພື້ນເມືອງທີ່ເປັນມູນເຊື້ອ ແລະ ຜະລິດບັນດາຜະລິດຕະພັນຄື ກະເປົາ, ຜ້າພັນຄໍ, ໂສ້ງເສື້ອ … ສະນັ້ນ ນັກທ່ອງທ່ຽວທີ່ມາຢ້ຽມຢາມບ້ານທາ ຍັງມີໂອກາດໄດ້ຊອກຮູ້ຂັ້ນຕອນການຕ່ຳຜ້າແພຂອງຊາວເຜົ່າໄຕ ຊ້ຳບໍ່ໜຳ ຍັງໄດ້ຮັບການແນະນຳຕ່ຳທົດລອງອີກດ້ວຍ.
ບ້ານທາ ມີເຮືອນຮ້ານ ທີ່ກວ້າງຂວາງ ສວຍງາມ ແລະ ສະດວກຕໍ່ທີ່ພັກພາອາໄສຂອງນັກທ່ອງທ່ຽວ ເກືອບ 10 ຫລັງ, ແຕ່ລະຫລັງລ້ວນແຕ່ປະກອບດ້ວຍເຄື່ອງໃຊ້ໃນເຮືອນຄົບຖ້ວນ ແລະ ສະອາດ. ສະນັ້ນ ເມື່ອນັກທ່ອງທ່ຽວມາທີ່ນີ້ ລ້ວນແຕ່ພັກເຊົາກັບຄອບຄົວຊາວເຜົ່າໄຕ, ພ້ອມທັງໄດ້ເຊື່ອມຕົວເຂົ້າກັບຊີວິດການເປັນຢູ່ຂອງຊາວຊົນເຜົ່າ ແລະ ພ້ອມທັງໄດ້ຮັບປະທານບັນດາເຍື່ອງອາຫານທີ່ເປັນເອກະລັກສະເພາະຄື: ແກງປາໃສ່ໜໍ່ໄມ້ສົ້ມ, ຍຳໄກ່ຍັດໄສ້, ໝູປີ້ງໃສ່ບັ້ງໄມ້ໄຜ່…...ຊາວເຜົ່າໄຕແຕ່ງກິນແຊບທີ່ສຸດ, ສະບຽງອາຫານສ່ວຍຫຼາຍແມ່ນລ້ຽງ,ປູກເອງຕາມທຳມະຊາດ, ເຂົ້າຫນຽວ ແລະ ຫອມ. ຄາບອາຫານຂອງຊາວເຜົ່າໄຕຢູ່ບ້ານທາແມ່ນຈັບອົກຈັບໃຈນັກທ່ອງທ່ຽວທີ່ສຸດ. ປ້າ ມາຍທິຈູງ ຊາວບ້ານທາ ແບ່ງປັນວ່າ:
“ນັກທ່ອງທ່ຽວມາຢ້ຽມຢາມບ້ານທາ ຈະໄດ້ຕ້ອນຮັບດ້ວຍຮີດຄອງປະເພນີຂອງຊາວເຜົ່າໄຕ. ສີສັນວັດທະນະທຳຂອງຊາວເຜົ່າໄຕ ຍາມໃດກໍໄດ້ຮັບການຮັກສາໄວ້ຕະຫລອດ. ຊາວເຜົ່າໄຕ ປຸງແຕ່ງບັນດາເຍື່ອງອາຫານພື້ນເມືອງແຊບທີ່ສຸດ, ພົ້ນເດັ່ນແມ່ນ ຊີ້ນປີ້ງ ແມ່ນເຍື່ອງອາຫານພິເສດຂອງຊາວເຜົ່າໄຕ ແລະ ເຄີຍໄດ້ຮັບການປຸງແຕ່ງໃນບຸນເຕັດ ຫລື ໂອກາດປຸກສ້າງເຮືອນໃຫມ່.”
ນັກທ່ອງທ່ຽວໄດ້ທົດລອງຕ່ຳຜ້າແພ
|
ເມື່ອຍາມຄ່ຳມາ, ນັກທ່ອງທ່ຽວມີໂອກາດໄດ້ຮັບຟັງສຽງຂັບຮ້ອງ, ສຽງພິນຈາກຜູ້ບ່າວ-ຜູ້ສາວ ຊາວເຜົ່າໄຕ. ນີ້ແມ່ນໂອກາດພິເສດ ເພື່ອໃຫ້ບັນດາແຂກມາຈາກທຸກສາລາທິດ ໄດ້ຮູ້ຈັກເຖິງບັນດາທຳນອງເພງພື້ນເມືອງ ໂດຍຊາວເຜົ່າໄຕໄດ້ຮັກສາໄວ້ຜ່ານຫລາຍລຸ້ນຄົນ. ບັນດາເພງພື້ນເມືອງທີ່ເປັນເອກະລັກສະເພາະທີ່ສຸດ ແມ່ນຂັບແທນ, ເນື້ອເພງສ່ວນຫລາຍແມ່ນເວົ້າເຖິງການຂໍພາວະນາໃຫ້ດິນຟ້າອາກາດເອື້ອອຳນວຍຄວາມສະດວກ, ລະດູເກັບກ່ຽວໄດ້ຮັບຜົນດີ. ບັນດາລາຍການສະແດງສິລະປະຂອງຊາວເຜົ່າໄຕແມ່ນມີຊີວິດຊີວາທີ່ສຸດ , ທັງຮ້ອງເພງ ທັງຟ້ອນ ຈັບອົກຈັບໃຈນັກທ່ອງທ່ຽວທີ່ສຸດ.
ຄວາມງາມແບບທຳມະຊາດ ແລະ ຄວາມສະຫງົບສຸກຢູ່ບ້ານທາ ພ້ອມດ້ວຍຄວາມຮັກແພງແຂກຄົນ ແລະ ບັນດາຈຸດວັດທະນະທຳທີ່ເປັນເອກະລັກສະເພາະ ຂອງຊາວເຜົ່າໄຕ ຍາມໃດກໍເປັນສິ່ງທີ່ສ້າງຄວາມປະທັບໃຈໃຫ້ນັກທ່ອງທ່ຽວໃນລາຍການຄົ້ນຫາເຂດດິນຮ່າຢາງ.