(vovworld)- ມາຢ້ຽມຢາມນະຄອນໂຮ່ຈິມີນ, ນັກທ່ອງທ່ຽວຈະພົບເຫັນບັນດາກິດຈະກຳສະຖາປັດຕະຍະກຳທັງເກົ່າແກ່ ແລະ ທັນສະໄຫມ. ຄຽງຂ້າງ ບັນດາອາຄານ, ວີນລາບູຮານຊື່ງໄດ້ຮັບການກໍ່ສ້າງຕາມສະຖາປັດຕະຍະກຳຝລັ່ງນັ້ນ ຍັງມີ ວັດວາອາຮາມບາງແຫ່ງທີ່ເຂັ້ມຂົ້ນໄປດ້ວຍສະຖາປັດຕະຍະກຳ ອາຊີຕາເວັນອອກ. ເຖິງວ່າຜ່ານໄລຍະຮັບຮ້ອຍປີແລ້ວກໍຕາມ ແຕ່ວັດວາອາຮາມຫລາຍແຫ່ງຢູ່ທີ່ນີ້ຍັງຄົງຮັກສາຮູບເດີມ ໄວ້ໄດ້, ທັງແມ່ນສະຖານທີ່ດຶງດູດພຸດທະສາສະນິກະຊົນກໍຄືນັກທ່ອງທ່ຽວສາກົນມາຢ້ຽມຢາມເປັນຈຳນວນຫລວງຫລາຍ.
ວັດຫວີງງຽມ
ພາບ:http://mytour.vn
|
ວັດ ຢາກເລີມ ຕັ້ງຢູ່ເລກທີ 118 ຖະຫນົນ ລາກລອງກວັນ, ເມືອງ ເຕີນບີງ ແມ່ນຫນຶ່ງໃນບັນດາວັດບູຮານທີ່ມີຊື່ສຽງຢູ່ ນະຄອນ ໂຮ່ຈິມີນ. ວັດແຫ່ງນີ້ເຂັ້ມຂົ້ນໄປດ້ວຍສະຖາປັດຕະຍະກຳສາສະຫນາຢູ່ເຂດດິນ ພາກໃຕ້. ວັດແຫ່ງນີ້ ໂດຍປັນຍາຊົນລີຖູ້ຍລອງ ອະນຸຍາດໃຫ້ກໍ່ສ້າງ ແລະ ຕັ້ງຊື່ວ່າ ຢາກເລີມ. ພະອາຈານ ທີກຈີດືກ, ຢູ່ ວັດ ຢາກເລີມ ໃຫ້ຮູ້ວ່າ:
“ວັດ ຢາກເລີມ ໄດ້ຮັບການກໍ່ສ້າງເມື່ອ ປີ 1744 ແລະ ຄົງຕົວມາຮອດປະຈຸບັນ. ກ່ອນນີ້ ວັດຢາກເລີມຕັ້ງຢູ່ກາງເຂດປ່າໄມ້, ສະນັ້ນ ຈື່ງມີຊື່ວ່າ ຢາກເລີມ.”
ຢູ່ຕໍ່ຫນ້າວັດ ຢາກເລີມ ແມ່ນ ທາດ ຊາເລີ້ຍເປັນຮູບ 6 ແຈ, ລວມມີທາດ 7 ຊັ້ນ. ເດີນວັດມີພະພຸດທະຮູບເຈົ້າແມ່ກວນອີນໃຕ້ຮົ່ມຕົ້ນໂພ. ນີ້ແມ່ນຕົ້ນໂພໂດຍພະອາຈານ Narada ນຳມາຈາກ ສີລັງກາ ແຕ່ປີ 1953. ວັດຢາກເລີມ ຍັງໄດ້ຮັບຖືວ່າ ແມ່ນຫໍພິພິດທະພັນນ້ອຍ, ຮັກສາຜະລິດຕະພັນປະຕິມາກຳຫລາຍຢ່າງ. ໃນວັດມີພະພຸດທະຮູບ113 ອົງ, ສ່ວນຫລາຍແມ່ນເຮັດດ້ວຍໄມ້. ດ້ວຍປະຫວັດສາດທີ່ມີມາແຕ່ດົນນານພ້ອມກັບສະຖາປັດຕະຍະກຳພົ້ນເດັ່ນ, ປີ 1988 ວັດແຫ່ງນີ້ໄດ້ຮັບການຮັບຮອງວ່າ ແມ່ນປູຊະນີຍະສະຖານປະຫວັດສາດວັດທະນະທຳແຫ່ງຊາດຂອງຫວຽດນາມ.
ຢູ່ໃຈກາງນະຄອນໂຮ່ຈິມີນ ຍັງມີວັດບູຮານອີກແຫ່ງຫນຶ່ງ ຊື່ງນັກທ່ອງທ່ຽວເຄີຍແວ່ຢາມ ນັ້ນແມ່ນ ວັດເຟືອກຫາຍ ຫລືເອີ້ນວ່າ ວັດ ງອກຮ່ວາງ (ເທພະຍະເຈົ້າ) ຢູ່ ເມືອງ 3. ວັດແຫ່ງນີ້ໄດ້ຮັບການກໍ່ສ້າງເມື່ອປີ 1892 ຕາມສະຖາປັດຕະຍະກຳຂອງ ຊາວຈີນ. ສິ່ງພິເສດຂອງວັດແຫ່ງນີ້ ນັ້ນແມ່ນຢູ່ໃນວັດມີພະພຸດທະຮູບເຮັດດ້ວຍເຈ້ຍເຖິງວ່າໄດ້ຄົງຕົວມາເປັນເວລາເກືອບ 100 ປີແລ້ວກໍຕາມ, ແຕ່ບັນດາພະພຸດທະຮູບນີ້ ຍັງຄົງຮັກສາຮູບເດີມໄວ້ໄດ້. ອ້າຍ ຫງວຽນບາດັງ, ຜູ້ນິຍົມຖ່າຍຮູບຢູ່ ນະຄອນ ໂຮ່ຈິມີນ ໃຫ້ຮູ້ວ່າ:
“ຂ້າພະເຈົ້າເຄີຍມາວັດແຫ່ງນີ້ເພື່ອຖ່າຍຮູບ. ບໍລິເວນວັດບໍ່ກວ້າງປານໃດ, ແຕ່ສວຍງາມຫລາຍ, ສະຖາປັດຕະຍະກຳທີ່ເປັນເອກະລັກສະເພາະຢູ່ວັດແຫ່ງນີ້ແມ່ນຕ່າງກັບວັດແຫ່ງອື່ນ. ມາຢ້ຽມຢາມວັດນີ້ໃນຍາມເຊົ້າ ພວກເຮົາຈະໄດ້ຊົມທິວທັດພິເສດທີ່ສຸດ, ເປັນຕົ້ນເມື່ອແດດສ່ອງແສງລົງ, ຂ້າພະເຈົ້າສາມາດຖ່າຍຮູບໄດ້ຫລາຍແຜ່ນທີ່ງາມຕາ.”
ເມື່ອເວົ້າເຖິງບັນດາວັດວາອາຮາມຢູ່ ນະຄອນ ໂຮ່ຈິມີນ ແມ່ນຕ້ອງເວົ້າເຖິງວັດ ຫວີງງຽມ ຢູ່ຖະຫນົນ ນາມກີເຂີຍເຫງ້ຍ, ເມືອງ 3 ຊື່ງແມ່ນກິດຈະກຳສະຖາປັດຕະຍະກຳສາສະຫນາທີ່ໃຫຍ່ໂຕກວ່າໝູ່ຢູ່ ນະຄອນໂຮ່ຈິມີນ. ສັງເກດຈາກທາງໄກ, ວັດແຫ່ງນີ້ພົ້ນເດັ່ນຂຶ້ນດ້ວຍ ທາດ 7 ຊັ້ນ, ມີຄວາມສູງ 40 ແມັດ. ວັດແຫ່ງນີ້ ໄດ້ຮັບການອອກແບບຄ້າຍຄືກັນກັບວັດຫວີງງຽມ ຢູ່ ແຂວງ ບັກຢາງ ແຕ່ໄດ້ຮັບການກໍ່ສ້າງດ້ວຍເຕັກນິກ ແລະ ວັດສະດຸກໍ່ສ້າງທັນສະໄຫມ. ນີ້ແມ່ນຫນຶ່ງໃນບັນດາກິດຈະກຳພົ້ນເດັ່ນຂອງສະຖາປັດຕະຍະກຳສາສະຫນາ ຫວຽດນາມ ໃນສັດຕະວັດທີ 20. ວັດຫວີງງຽມ ໃນປະຈຸບັນ ກໍມີຊື່ສຽງ ດ້ວຍບັນດາການເຄື່ອນໄຫວສາສະຫນາພຸດໃນທົ່ວປະເທດ. ພະອາຈານໃຫຍ່ ທີກແທງຟອງ, ເຈົ້າອາວາດ ວັດຫວີງງຽມ ໃຫ້ຮູ້ວ່າ:
“ພວກອາຕະມາຍັງຄົງປະຕິບັດພິທີການຕ່າງໆຕາມມູນເຊື້ອຂອງສາສະຫນາ ຈຸກເລີມ. ບັນດາພະສົງສຳມະເນນ, ພຸດທະສາສະນິກະຊົນມາຈາກທຸກສາລະທິດມາວັດແຫ່ງນີ້ລ້ວນແຕ່ໄດ້ຮັບການຕ້ອນຮັບຢ່າງສະຫນິດສະຫນົມ.”
ບັນດາວັດວາອາຮາມຢູ່ນະຄອນ ໂຮ່ຈິມີນ ປະຈຸບັນ ບໍ່ພຽງແຕ່ແມ່ນສະຖານທີ່ບູຊາພະພຸດທະເຈົ້າເທົ່ານັ້ນ ຫາກຍັງແມ່ນສູນດຳເນີນຊີວິດວັດທະນະທຳດ້ານຈິດວິນຍານຂອງທັງປະຊາຄົມອີກດ້ວຍ. ນັກທ່ອງທ່ຽວມາຢ້ຽມຢາມວັດແຫ່ງນີ້ ບໍ່ພຽງແຕ່ໄດ້ຮັບຟັງບັນດາເລື່ອງລາວຕ່າງໆເພື່ອເຂົ້າໃຈຕື່ມອີກກ່ຽວກັບປະຫວັດຄວາມເປັນມາຂອງສາສະຫນາ, ການເຫລື້ອມໃສເທົ່ານັ້ນ, ຫາກຍັງມີໂອກາດໃສ່ບາດທຳບຸນ, ເພື່ອໃຫ້ຈິດໃຈສະຫວາດສະເຫວີຍກວ່າ, ຮູ້ສຶກໄດ້ຄວາມໝາຍຂອງຊີວິດ.